1 Corintios 3 - NandevaBiblia

Tũpa pevarã mba'apovare

¹ Shyryvyre, katuãny aijetape kuaretare kurimba jyrojavare rãĩmi, koñeĩ pyrãtambateriva hareka sanjaymire rãĩmi Cristo rehe.

² Hãrã javai'ova apyrỹmbo'ẽãhe, javaimbaveĩ ambeupe, shara pyndy'ova sanjaymi kambyĩteri mbyho'uhakava, ha'ẽãjy ho'uava tantava. Hokape katuãteri pikuaa mbai javai'ova, kyrãteripi ã'ẽpeve,

³ shara nde'iave pynypyrãta. Ĩmeteri ã'ãmore pynymbytepe pota ha'epaite'iarã hareka poshyvarã, pikoteri kuaretare jyrojambare ikova rãĩmi,

⁴ ĩme'ẽ heiva: She hai Pablo ryheva, ĩrũre hei: She hai Apolo ryheva, kyrãrã pikoteri kuaretare jyrojambare rãĩmi.

⁵ Hãrã, mbaivara hai Pablo? Mbaivara hai Apolo? Jesucristo jokueva retãĩ rãnga, haire pynymbory rãmeĩ rãnga, pirojahe Jesucristo. Pepenteĩ oreva japo Ñandeja hei oreva japoha verã.

⁶ She rãnga ãñoty, hãrã Apolo maky jyve, hãma Tũpa mupũã ñotyãva.

⁷ Hãme rãnga, ñoty'ia hareka maky'ia mba'ẽã hai reta, koñeĩ Tũpa hai opa japova shara mupũã ñotyãva.

⁸ Hãrã ma'ẽty'ia hareka ñotyãva maky'ia, mba'ety vateve'õ, jyvacheĩ reta. Pepenteĩpo Tũpa meẽshu retakui japova hepykue.

⁹ Apolo hareka she, hai Tũpa japovape mboryhareva, pee hai Tũpa ikokue, oo Tũpa mupuãva. Tũpa hai Ija.

¹⁰ Tũpa pya kavirã shypyhyrõ ãñono verã oo jypyrã. Hãma ĩme'ẽ oo mupũãheva, tẽvã pepenteĩpo ñyngarekokavihe marãra mupũã,

¹¹ shara mba'etyma oo jypy yngava ñonojy verã ẽẽma vekuaivi, hokava oo jypy hai Jesucristo,

¹² hãma ĩme'ẽ oo jypyre mupũãva ita vera ijuva, ita vera tĩĩva, maĩrã ita veravapy, yvyraivi, kapi'i hareka takuarape,

¹³ Tẽvã japo vekuare pepenteĩpo ijykuaakui ara opamarã; shara tata ryhevepo oukui hoka ara, hãrã tatapo heshakakui mbaivapera ñamupũã oo.

¹⁴ Hãrã ĩme'ẽ oo japohava tatajepyãherã, me'ẽãposhukui japova hepykue.

¹⁵ Tẽvã japo vekua opa okerã, opareiiposhikui japotẽ vekua. Katy hai ohojepepokui. Tataivi ñyvãhẽ vekua rãĩmi.

¹⁶ Pikuãra pee haiva Tũpa jytũpao, hareka Espiritu Santo ikova pyndypyape?

¹⁷ Hãrã ĩme'ẽ Tũpa hoo opa mambaivarã, Tũpateivapo jahehekui, shara Tũpa hoo hai kyambava, hãrã pee hai hokava oo.

¹⁸ Avy mbava ijupei tiñymbytavy. Ĩme'ẽ pynymbytepe hei ijeheva heta ko yvy'ĩãrẽ'õ kuaavarã, tiko mbaimba kuaava rãĩmi, hãmepo ãñeteĩte mbai kuaakui.

¹⁹ Shara Tũpa pevarã ko yvy'ĩãrẽ'õ ãrãndu mba'erãveãshu hai. Kuatia mbyparahava heiva rãĩmi: Tũpa itypy ĩñarãnduvare, ha'ei ñono vekuapy.

²⁰ Haivi heijy: “Ñandeja opa kuaa ĩñarãnduvare pya mbijetarã, hareka mba'erããveãshu hai”.

²¹ Hãme rãnga avy mbava tiroja ijehe kuaretare japova rehe, shara opa mba'e hai pa'ãpova,

²² ajemaĩpo Pablo, Apolo, Pedro, maĩrã, ko yvy. Ajemaĩpo tykove, ñymano, ara ã'ẽpeva hareka ara ou verã; opaiteva rãnga hai pa'ãpovare.

²³ Pee rãnga hai Cristo ña'ãpova, hareka Cristo hai Tũpa ña'ãpova.