1 Corintios 15 - NandevaBiblia

Cristo kuerajy manovare mbyteivi

¹ Ã'ẽ shyryvyre, aipota apyrỹmymandu'aka Ñee kaviva ambeupe vekua, hai pymyvãhẽ vekua hareka tãntapeĩheva.

² Kova Ñee kaviva rupii pehojepema, tantapẽĩhe ñee ambeupe vekuarã; kyrããrã pyrojareiimbapo.

³ Shara tynonde ãmbeupe, sheteiva me'ẽãshe vekua, hokava hai Cristo mano mbai porãmba jajapo vekua rehe, Mbyparaha vekua heiva rãĩmi,

⁴ hai ñotỹha hareka kuerajy mbahapy arape, Mbyparaha vekuape heiva rãĩmi.

⁵ Hareka ijeshakashu Pedro, haivi 12 apostol retape.

⁶ Haivi 500 rupi ijeshakajyshu kuareta jyrojaheare, hokava retaivi hetateri'ẽ ndei manovare, tẽvã ĩrũre opama mano.

⁷ Kỹỹma'ẽrã ijeshakajyshu Jacobo, haivi opaite apostol retape ijeshaka.

⁸ Koñemahea ijeshaka jyveshe, shy'ova sanjay jy'arapemba oava.

⁹ She rãnga hai apostolre mbytepe mbai'ãĩteveva, hareka ẽẽãny shymbyhea verã apostol, shara ãmoña'ai arykai Tũpa ryhevare.

¹⁰ Tẽvã, Tũpa ñymbai kavirãmeĩ ã'ẽ ikoshyhevi apostol, hareka mbai kavikue she pevarã pytareĩã; tẽvã hetaiteve ãmba'aposhi reta, ajemaĩ shembatẽvã, Tũpa rãnga pyakavirã shymbory.

¹¹ Shara haikaviva hai, she maĩrã haire, kyrã mbe'uha, hareka hokava hai pyroja vekua.

¹² Tẽvã mbe'uha Cristo mupũ'ãhajyva manovare mbyteivi, hãmera marã'ĩrã ĩme'ẽjy pynymbytepe heiva kuerajymbava manovare?

¹³ Shara manovare kuerajyvyãrã, akuarã Cristo kuerajyvyãmba jyve.

¹⁴ Cristo kuerajyvyãrãmeãra, ñimiñe'ẽãreimbapo'i, hareka mba'eãpo jyve jyrojakue ĩmepyreva.

¹⁵ Kyrãrã ore yrapureiimbapo he'iha Tũpa mynguerajyva Cristo; ãñete kyrããmbapo jehu manovare kuerajyvyarã.

¹⁶ Shara manovare kuerajyvyarã, Cristo kuerajyvyamba jyve.

¹⁷ Ãñete Cristo kuera jyvyãrã, mba'eã rãngapo jyrojakue ĩmepyreva, pimeteripeĩva mbai porãmbape.

¹⁸ Kyrãrã Cristo jyrojaheva mano vekuare, jyvarehama jyvehe.

¹⁹ Ñahãrõñaĩva Cristoivi hai ko yvy'ĩãrẽ'õ tykove pevarãĩrã, ñande haipo kuaretare mbytepe hasa'asyveva.

²⁰ Tẽvã Cristo kuerajy! Kova rãnga ñanymboihe opaite manovare kuerajy handi verã jyve.

²¹ Shara ñymano icheva rãĩmi pente kuimbai rupii, kyrã pente kuimbai rupii iche jyve manova kuerajyva.

²² Adán rupii opava kuaretare mano, kyrã jyve Cristo rupii opavare kuerajypo.

²³ Tẽvã pepenteĩ myhenda: Cristo tynonde'ẽ, haivi Cristo oujymarã, kuerajypo jyve hai ryhevare.

²⁴ Haivipo ou ara japyma verãpe, Cristo opama õhũndi mburuvisha vasure, mbaikatu ĩmereare hareka pyrãtãkue, opa ñono verã Teru ipope, Tũpa ẽvãpe.

²⁵ Shara Cristo mburuvisha vasurãñoĩpo'ẽ opa ñonopeve ipy ipe hyvaishorãreare.

²⁶ Tyvaisho koñemahea õhũndi verã hai, ñymano.

²⁷ Shara Tũpa opa mbaipo ñono Cristo ipy ipe. Hãrã opaiteva mburuvishare ñonohã ipope heirã, he'iseã Tũpa ñonoãjyveva Cristo ipope. Shara Tũpa hai opa mbai ñonova Cristo ipope.

²⁸ Hãma opama Cristo ipope ñonoãrã, haivi Cristo haiva Tyray, iñiñonopo jyvekui Tũpa ipope, shara hai opa mbai ñono hai ipope. Kyrã, Tũpa ha'epaitepokui opa mbaipe.

²⁹ Kyrãrãra, mbaiva japopo manoma vekuare ñymyngaraikava? Manovare kuerajyvyãrã, marã'ĩrãra ñymyngaraikahe reta?

³⁰ Hãmera mbaiva rehepo opa ara õĩhã yryrykove porãmba jehushu verãpe?

³¹ Shara shyryvyre, opa ara ãĩ shukaha verã. Hokava ãñete, añeteva rãĩmi vy'akue areko pyndyreheva, pirojahe Jesucristo Ñandejarã.

³² Aĩrãrõ hãndi kuimbai rãĩmi Éfesope mymba ñarõ vekua rãĩmiva, mbaivara ãmbijehupy hokava? Mano vekuare kuerajyvyarã, haikavive jajapo ã'ãmore heiva rãĩmi: Jakaru hareka ñaimby'u, paremapo opa ñamano.

³³ Avy piñymbytavyka: “Ñañimi'ĩrũheare heko porãmbare, opa myporãã ñandyhevi mbai haikaviva jajypykuava rãĩmi”.

³⁴ Pymaĩ kavipẽĩ hareka avy pijapo mbai porãmbava, shara ĩme'ẽ pymbytepe Tũpa kuaamba'eiteva, kyrã hai pee kova mbai apyrỹmymarãka verã.

Marãrapo kuerajykui mano vekuare

³⁵ Ĩmeñoĩ rãngapo'ẽ pyrãnduva: Marãrapo kuerajy mano vekuare? Marãva tyreterapo ĩmere retakui?

³⁶ Ñypyrãndu mbaimbava, nde rĩñotyva timity tynondepo mano hẽño verã.

³⁷ Rĩñotyva ha'ẽã yvyra hẽño verã, timityĩ rãnga, jaishu trigo maĩrã yngava hãỹ.

³⁸ Tẽvã Tũpa meẽshu hete hai potava rãĩmi. Hareka opaĩ marãrãngatuva timity hetei ĩmere.

³⁹ Ĩme'ẽ opaĩ marãrãngatuva tyro'o; penteva hai kuaretare ho'o, yngavare hai mymbare ho'o, ĩrũre hai vyrare hareka pirare.

⁴⁰ Kyrã jyve ĩme'ẽ tyrete vate arapeva hareka tyretere yvy'ĩãrẽ'õ; tẽvã tyrete vate arape'õva mashy'ãkue penteĩ'ẽ, hareka tyrete yvy'ĩãrẽ'õre yngaivejyshi hai reta.

⁴¹ Kuarasy hĩmbipekue rãnga jyvacheã hãndi jasy hĩmbipekue, hareka jasytata retaivi; hãrã jasytatare pepenteĩ ĩmere hendyva rãĩmi.

⁴² Kyrãpojy vekui mano vekuare opa kuerajyrã; ñotỹha pente tyrete opa ñymbai verãpe, tẽvã kuerajypokui tyrete manoveãma verã ryheve.

⁴³ Tyrete ñotyhã vekua ñanateỹ ñamaĩhe, tẽvã kuerajypo hĩmbipeva ryheve. Opa'ipy ryheve ñotyhã vekua, kuerajypo mbaikatu ryheve.

⁴⁴ Kuareta hete ñotyhãva rãnga hai yvy ryheva, tẽvã kuerajyvapo hai tyrete vate arapeva. Ĩme rãnga'ẽ tyrete yvy'iarẽ'õ hareka tyrete vate arapeva.

⁴⁵ Kyrã hei kuatia mbyparaha vekua: “Kuimbai tynondeva, Adán, japoha hete hykove ryheve”; hãma Adán mokueheva hai, espiritu meẽva tykove.

⁴⁶ Espiritu vate arapeva rãnga ha'ẽã tynonde ouva, yvy'ĩãrẽ'õva rãnga tynonde ou, haivi ou vate arapeva.

⁴⁷ Kuimbai tynondeva rãnga hai yvy ĩãrẽ'õ, yvyivi japoa vekua; kuimbai mokueheva, haiva Ñandeja, hoka hai ara vate'õ.

⁴⁸ Hãma yvy'ĩãrẽ'iare, ova kuimbai yvyivi japoha vekua, tẽvã ara vate'õ ova jyve ara vate'õ.

⁴⁹ Kyrã ñande ñandy'ova kuimbai yvyivi japoha vekua, kyrãpo ñandy'ova jyvekui hokava kuimbai vate arape'õ.

⁵⁰ Aipota hai pee, shyryvyre, kova tyro'o hareka turuvy ẽẽãposhukui iche verã Tũpa ẽvãpe; shara opareiiva katuãpo jihia opamba verã.

⁵¹ Tẽvã aipota pikuaa kova Tũpa ñemiãpereva: Opaitevããpo ñamano, tẽvã opaitevapo ñandyrete ñymy yngaikui.

⁵² Sapy'ãĩ, ñasapỹvyĩrã hareka jasarekojyva rãĩmipo, mimby koñemahea mbi'ipuamarã. Shara mbi'ipuhapo mimby, hãrã mano vekuare opapo kuerajy, manoveãma verãre. Hareka ñande ñandyrete opapo ñymy yngaikui.

⁵³ Shara kova ñandyrete ñymbaireiiva tekotẽvẽ ñymondepy pente tyrete ñymbaimba verã, hareka kova ñandyrete mano verã, tekotẽvẽ ñymondepy tyrete manoveãma verãpy.

⁵⁴ Hãma kova ñandyrete ñymbaireiiva ñymondemapy tyrete ñymbaimbarã, hareka ko ñandyrete mano verã ñymondemapy tyrete manoveãma verãrã, haipepo ikokui kuatia mbyparahava hei vekua: “Ñymanokue, opama mambaiha”.

⁵⁵ Nde ñymanokue, mapera'ẽ nupu'ũcha? Nde ñymanokue, mapera'ẽ nypyrãtãkue?

⁵⁶ Ñymano pu'ũchakue rãnga hai mbai porãmba vekua, hareka mbai porãmba pyrãtakue hai, ñee mbyparahava.

⁵⁷ Tẽvã ñamee ñandy'ajete Tũpape, meẽ ñande pyrãtakue jajepyhe verã ñymanokue, Ñandeja Jesucristo pyrãta rupii.

⁵⁸ Hãma shyryvy ahaihuvare, piñymypyrãta katu pemyimbape, hareka pyrẽĩ pymba'aposhu Ñandeja; shara pikuaa Ñandeja pẽĩ hãndiape pijapova, ha'ẽã pijaporeiiva.