1 Corintios 13 - NandevaBiblia

Jyhaihukue añeteva

¹ Ajemaĩpo opava kuaretare ĩñeepe aikatu aijeta hareka katupo Tũpa jokuevare ĩñeepe aikatu aijetajy, tẽvã ahaihuã yngava retaperã, shy'ova pente hiero mbi'ipuha'õ, maĩrã maĩnunga parãrãreiva.

² Me'ẽã she ambeu'ai iko verãrã, hareka opa aikuaa mbai ñemiãpe'õ Tũpa ryhevarã, hareka opa mba'e aikuaarã, katu ĩme'are jyrojakue my'õmyva yvyturusure, tẽvã apyryraihuãrã, mba'eã she.

³ Opa ãmemeẽshu ĩme'area paveteva retarã, hareka ameẽ shyrete hapyha verãrã, tẽvã apyryraihuãrã, mbaivapeã haikavi she.

⁴ Pyryhaihuva hasa'asyñoĩ, pyakavi, mbai potaraiã, jyrojaã ijehe hareka potãã ha'epaite.

⁵ Poryãã ñee porãmbava hareka hekãã hai pevarãĩ, poshyreiiã hareka natuãvaĩjy hai poshykue.

⁶ Mbyvy'ã hekopemba'õ, koñeĩ mbyvya mbai añeteva.

⁷ Japyryraihu he'ise opa mbaipe jahasa'asy, jairoja, ñahãrõ, hareka opa mba'e jepyhe.

⁸ Ãñete jyhaihukue opããpohai, tẽvã iko verã mbe'uava opapokui, ñee kuaahambava opapokui, hareka jyve ãrãndukue.

⁹ Shara a'ãmoĩ jaikuaa, hareka ñimiñe'ẽha Tũpa potava rãĩmi.

¹⁰ Tẽvã vãhẽma ou ara hekope kavi'õrã, ã'ãmo hekope kavimba'õ opapokui.

¹¹ Shyndeiteri'airã, sanjay rãĩmi aijeta, sanjay rãĩmi shypya ambijeta, sanjay rãĩmi ãmaĩ; tẽvã shupukumarã opa aheja sanjay hekokue.

¹² Ã'ẽ jaheshakaviãteri, sypeva jykua kavimbapya rãĩmi jykuaakaviã; katy pente arape jaheshakavipokui. Ã'ẽ aikuakaviãteri, tẽvã pente arape aikuaa kavipokui Tũpa, hai opakavi shykuava rãĩmi.

¹³ Mbahapy'ẽ opamba ryheva; jyrojakue, ñahãrõva hareka jyhaihukue, tẽvã kova mbahapy'ẽvã retaivi haikaviveva hai jyhaihukue.