1 Corintios 12 - NandevaBiblia

Mbaikatukue Espiritu Santo meẽvare

¹ Shyryvyre, aipota pikuaa mbaikatukue ryheva Espiritu Santo meẽvare.

² Pee rãnga pikuaa ndei pirojarã, pyma'ẽĩhe pyndyrahaha ta'ãnga ña'ẽnguvare jykoty.

³ Hãme rãnga aipota pikuaa, mbaveãpo hei: “Toho Jesús Ãña kyty”, ãñete Tũpa Espiritu ryhevape ijetarã. Hareka katuã mbava heijy: “Jesús hai Ñandeja”, ãñete hai ijeta'ẽ Espiritu Santo ñymbaikatukuepyrã.

⁴ Tũpa jyrojaheare mbytepe ĩme'ẽ opaĩ jyvavy Espiritu Santo meẽshuva mbaikatukuere. Tẽvã hokava meẽva penteĩ'ẽ, hokava hai Espiritu.

⁵ Heta ĩme'ẽ opaĩ jyvavy japoa verã, tẽvã opaiteva mba'aposhu penteva Ñandeja pevarã.

⁶ Hareka ĩme'ẽ opaishareiva japoa verã, tẽvã Tũpa hai opa mbai meẽva maĩnungare rikatu rijapo verã.

⁷ Espiritu Santo rãnga ijykuaaka pepenteĩ mbai kuaakue me'ẽãshua rupii, haikavi verã jyve yngava retape.

⁸ Penteva me'ẽãshu katu pyrymbarakuaa verã Espiritu rupii, yngava me'ẽãshu ñee heta mbai kuaava ryheve ijeta verã Espiritu Santo rupii.

⁹ Yngava me'ẽãshu jyrojakue Espiritu Santo rupii, hareka hai rupii ĩrũre me'ẽãshu mynguera verã ñymbairasyvare.

¹⁰ Ĩme'ẽ me'ẽãshuva mbaikatu japo verã mbaikavi heshaha verã, hareka ĩme'ẽjy me'ẽãshuva iko verã mbeu'i verã. Hareka yngavare, Tũpa meẽshu reta kuaa verã espiritu japuva hareka Espiritu añeteva, ĩrũre me'ẽãshu ijeta verã ñee kuaahambape ĩmeve'ẽjy me'ẽãshuva kuaa verã mbaivara he'iha hokava ñee kuaahambape.

¹¹ Opaite kova Espiritu Santo koñeĩ'õ japo, meẽshu pepenteĩ kuaretare hai potava rãĩmi.

¹² Shara Cristo jytũpao ova kuareta hete. Reko opaĩ marãrãngatuva hai ryhevare, tẽvã pente tyreteĩ.

¹³ Shara penteva Espiritu Santoivi pepenteĩ ñanymyngaraiha opaite iko ñandyhevi verã penteva tyreteĩ, jaishu Judio maĩrã griego, jokuehareireape maĩrã mbaimba ñandochavape; hareka opaĩ penteva Espirituivi ñonoã ñande ñaimbyu verã.

¹⁴ Ñandyrete rãnga hetare hai ryhevare, ha'ẽã penteĩ rekova.

¹⁵ Tepy hei: “She ha'ẽã pente tepo, ha'ẽã she tyrete ryheva”, hãmera ha'ẽãpohai tyrete ryheva?

¹⁶ Ñanynambi hei: “She ha'eã tyresa, she ha'ẽã tyrete ryheva”, hãmera ha'ẽãpo tyrete ryheva?

¹⁷ Ñandyrete tyresa jepeirã, maperambapo'ẽ ñandapysa? Opaiteva hai ñandapysarã, maperambapo'ẽ mbai ñahẽtupyva?

¹⁸ Tẽvã Tũpa ñonombahe ñandyrete ryhevare hai potava rãĩmi.

¹⁹ Shara haijepei hai ryheva retarã, mba'etymbapo tyrete.

²⁰ Tẽvã ã'ẽ heta'ẽ ñandyrete ryhevare, tẽvã tyrete penteĩ'ẽ.

²¹ Tyresa katuãpo heishu tepo: “Aikotẽveãny ndyrehe”, hãma kyrãĩjy ñanaka katuãpo heishu ñandepyre: “Aikotẽveãny pyndyrehe”.

²² Kyrãtẽ verã, ñandyrete ryheva pyrãtãmba'eiteva rãĩmivare, hai jaikotevẽvejyhe,

²³ hareka ñandyrete ryhevare mbaimbava rãĩmivaĩ ñaingareko kavivejyhe. Hareka porãmba vekua rãĩmi jarevare, ñaĩngareko kavivehe.

²⁴ Ñandyrete ryheva haikaviveva rãnga jarykyjeã jyve; tẽvã Tũpa opa ñono kavi ñandyrete, mbaimba'eiteve vekuamire ñambyveteve verã.

²⁵ Potãã ĩme'ẽ ñandyrete ryhevare ohomba ijehevarã, koñeĩ opaiteva ñymbory verãĩ.

²⁶ Pente hai ryheva hasa'asy'ẽrã, opaiteva yngavare hasa'asy jyve. Penteva ñandyrete ryheva ñyngarekoha kaviherã, opaite ĩrũre vya hãndi.

²⁷ Pee rãnga hai Cristo hete ryheva, hareka opaite pepenteĩ reko japo verã.

²⁸ Tũpateiva ñono jyrojavare ñymbatyva mbytepe, tynonde'ẽ apostolre. Mokuehea Tũpa ĩñee mbeu'iare, mbahapyheape ñono pyrỹmboi'ia. Haivi kuaretare japo'ia mbaikavi heshaha verã, hareka ñymbairasyva mynguera'iare, yngavare mbory'ia, maĩnungape miñaka'iare, maĩrã ijetava ñee kuaahambape.

²⁹ Opaitevara hai apostolre? Opaitevara hai Tũpa ĩñee mbeu'iare? Opaitevara hai pyrỹmboi'iare? Opaitevara japojyre mbaikavi heshaha verã?

³⁰ Opaitevara me'ẽãshu pyrỹmynguera verã? Opaitevara katu ijetapy ñee kuahambavare? Opaitevara kuaa mbeu kavi verã ñee kuahambava?

³¹ Pipotarai pipityve mbaikuaakue haikaviveva me'ẽãva. Tẽvã aheshakape tape haikaviveva.