1 Corintios 11 - NandevaBiblia

¹ She aikova rãĩmi piko, aikova Cristo rãĩmi.

Marãrapo'i taupere tũpaope

² Shyryvyre shymbyvy'a shara pee pynymandua shyrehe hareka pijapo ñee apyrỹmboiheva.

³ Tẽvã aipota pikuaa Cristo hai opaite kuimbaire ñaka, hareka kuimbai hai taupere ñakarã'õ hareka Tũpa hai Cristo ñakarã'õva.

⁴ Pente kuimbai ñaka jasoi ryheve ñymboi'ẽrã maĩrã Tũpa pory'ẽrã, mymarãka ñakarã'õ.

⁵ Tẽvã opaite taupere ñymboirã maĩrã Tũpa pory'ẽrã, jaso'ĩã ñakarã, mymarãka ñakarã'õ; shara ñaka mysãkava rãĩmi.

⁶ Shara pente taupe ñaka mbasoimbaa, haikaviveposhu mysakarã. Tẽvã taupe hesha noti ñakahaa jasyjarã, maĩrã mysakarã, jasoiñoĩpo.

⁷ Kuimbai ñaka jaso'iãpo, shara hai Tũpa hã'ãnga hareka ẽẽhe Tũpa hĩmbipekue, tẽvã taupe ẽẽhe kuimbai hĩmbipekue.

⁸ Shara kuimbai ouãã taupeivi, taupe rãngamba nohẽã kuimbaivi.

⁹ Kuimbai japohããmba arykai taupe rehe, taupe rãngamba japoha kuimbai rehe.

¹⁰ Hokava rehe rãnga, taupe katu raha jyve ñakare'õ heshaka verã hai huvisharã, Tũpa jokuevare rehe.

¹¹ Tẽvã Ñandeja rehe, kuimbai ikoã taupembape, kyrãĩjy taupe ikoã kuimbaimbape.

¹² Ãñeteara taupe japohamba kuimbaivi, ãñeteĩjy kuimbai oa jyve taupeivi; tẽvã opa mbai ou Tũpaivi.

¹³ Peiipo pimbivache: Haikavira taupe ñymboishu Tũpa ñaka mbasoimbape?

¹⁴ Ñande rãnga ñandijuhuvii jaikuaa, ñanotipo jyve pente kuimbai ma'ẽĩhe ñakahaa pupukurã.

¹⁵ Tẽvã taupe pevarã haikavive hejaĩ ñakahaa pupukushurã, shara hova mbikasoipya hendakuepe me'ẽãshu ñakahaa.

¹⁶ Hãma ĩme'ẽ kova mbai pya'ohombahearã, pikuaapo jyve ore Tũpa jyrojahevare mba'ety rekoha ynga ñymbatysea retaipi jypykuaahava rãĩmi.

¹⁷ Kova mbai ã'ẽ ambyparape verã, avy'ãã penendie, shara pimbatyva veruãpe haikaviva, koñeĩ porãmbaveĩ verupe.

¹⁸ Tynonde mbe'uashe jyrojavare pimbatyrã opanda porããpyhevi, hãrã aroja kyrã jehuva.

¹⁹ Ikoñoĩ rãngapo kyrãvã pynymbytepe, kuaaha verã mbara ãñete haikavi'ẽ Tũpa hỹnonde.

²⁰ Kova opa porãmbapeĩva veruva hai, pimbatyrã haiveama Ñandeja jykaru ryheva.

²¹ Shara pykaruma peĩrã ĩme'ẽ ñymytynondeva karu verã, hareka ĩme'ẽ ñymbahyva hareka ĩme'ẽ yngavare kauva.

²² Mba'etyrapyre pero pykaru hareka pimbyu verãpe? Marã'ĩrãra pimbijiche Tũpa hoope ñymbaty'õre? Mbaivarapo hai pee? Shymbyhoryrapo hokava? Mba'etyiti rãnga!

²³ Shara kova meẽshe Ñandeja, hai rãnga hokava apyrỹmboijyvehe: Ñandeja Jesús akua pyhare kyrypoti me'ẽãmahea heky pãhã,

²⁴ jy'ajetekue meẽrã, pyseã hareka hei: “Ko'ẽ, pe'u; kova hai shyrete pyndyrehe pyse'ãva; pijapo kova pymandua shyreherã”.

²⁵ Kyrãĩjy opama karu retarã heky koparã hei: “Kova kopa hai ñee me'ẽãva py'ahuva ryheva shuruvype, peumarã, pijapo pynymandua shyreherã”.

²⁶ Shara peumapẽĩ kova pãhãrã, hareka pimbyumapẽĩpy kova koparã, Ñandeja ñymano pymbeu hai oujypeve.

²⁷ Hãma ĩme'ẽ houva pãhã hareka ñymbyuva kopa Ñandeja ryheva hekopemba'ẽ vekuarã, japo mbai porãmba Ñandeja hetere hareka huvyre.

²⁸ Hãme rãnga pepenteĩpo maĩhe marãra'ẽ pyape, haivipo hou pãhã hareka tumbusururu vino kopapy'õ.

²⁹ Shara pãhã houva hareka ñymbyuva hekope kavimba ryheverã, ha'ii pevarãĩ japo kuaa kavimba'ẽvã Tũpa ña'ãpoteva hoka tyrete.

³⁰ Hokava ñimbivache rehe heta'ẽ pynymbytepe ñymbairasyva hareka pyrãtaveamava, hareka a'ãmore mano.

³¹ Hãma ñande ñamaĩkavi ñandijeherã, Tũpa jahembatẽ ñandyrehe verã.

³² Tẽvã Ñandeja ñanunuparã, hai ñanymboikavive verã hareka potãã kuareta jyrojambare jahea ñandyrehe hãndirã.

³³ Hãrã shyryvyre, pimbaty peu verã Ñandeja ryhevarã, piñyhãrõpo.

³⁴ Ĩme'ẽ ñymbahy'iarã, tykaru hentape, mahẽ Tũpa nupakui kyrãva ñymbatyva rehe. Yngava maĩnungare opapo ãñono kavikui aha pẽĩvaperã.