1 Corintios 10 - NandevaBiblia

¹ Shyryvyre aipotãã pyndysarehe opaite ñanytynondevare opamba ẽẽ reta ãvãpỹtu'ipe, hareka opaitevamba hasa reta yyvasu pyntava.

² Opaite haire ñymyngarai ãvapyntupy hareka yyvasupy ñimi'ĩrũhe verãre Moisés.

³ Opaiteva haire hou pentevãĩ ho'uava vate arape'õ, espiritu ryheva.

⁴ Hareka opaite ñymbyupy reta yy espiritu ryheva. Shara haire opaiteva hou reta yy itaivi õhẽva espiritu ryheva mi'ĩrũrevare, hokava hai Cristo.

⁵ Tẽvã, hetamba'ẽjy Tũpa mbyposhykavare; hãme rãnga hetekuere opamba jypysovasĩĩ oho yvy ikoambaipi.

⁶ Opaite kova mbai pyta ñande jahesha verã, potãã jaipota mbai porãmbarã, haire potava rãĩmi.

⁷ Hãrã avy pemombai ta'ãngape, haire japova rãĩmi, kuatiape mbyparahava heiva rãĩmi: “Hãrã tenta ijare vapy karu hareka mby'arete, haivi opa puã jyroky reta ñutũpa retape”.

⁸ Taupe, maĩrã kuimbai avypo haimba ĩme hareka hyreko iko'ijy hãndi, ã'ãmo haire japova rãĩmi, hãrã 23.000 pente arapeĩ opa mano reta.

⁹ Avy ñambyposhyka Ñandeja, heta haire mbyposhykava rãĩmi hareka opa mano mboi shuu retarã.

¹⁰ Avy pijeta porããpi, ã'ãmo haire japova rãĩmi, hãrã heta opa juka reta Tũpa jokueva, veruva ñymano.

¹¹ Hãma kova mbai jehushuare ñanytynondevare pyta ñande jahesha verã, hareka mbyparaha ñanymboi verã jaikova ko ara opaserimavape.

¹² Hãma rojava hai pyrãta kavima'õva, tirykyje katu mahẽ oajykui.

¹³ Pyarãã ou peãrẽva rãnga ou jyve opava kuaretare ĩãrẽ. Tẽvã Tũpa hai jyrojahahea, hai hejããpo iko pyndyrehe mbai pijepymbahe verã. Tẽvã pyndypya hã'ãmarã Tũpa pynymborypo marãrapo pẽhẽshi hareka pijepyhe.

¹⁴ Hãme rãnga shyryvyre ahaihuva, pysyryshi ta'ãnga õmombai'iare.

¹⁵ Aijetape heta mbai kuaavare rãĩmi, hãrã peiipo pypya pimbijetahe ko hai peeva haikavira, maĩrã, porããra.

¹⁶ Ñaimbyupy kopa ohovasahavarã, hai rupii jahovasapy Ñandeja, ñañymypenteãra hãndi Cristo huvy rupii? Pãhã jaurã, ñañymypenteãra hãndi Cristo hetepe?

¹⁷ Ñandyretatẽvã, opaiteva pentevaĩ jau pãhã, hãme rãnga ñande hai penteva tyreteĩ.

¹⁸ Pymaĩhe Israelvare; houva mymba jukahavare hoo me'ẽãva Tũpa pevarã, ñymypenteĩ reta mbai me'ẽãva altar rupii.

¹⁹ Ha'ẽã rãnga mbai vasuva ta'ãnga, maĩrã soo ta'ãngape me'ẽãva haikaviveva ynga soo retaivi.

²⁰ Haiva rãnga hai, Tũpa rojambavare mymba jukahava meẽ ñynoĩrã, meẽshu reta ãñare, ha'ẽã Tũpape, hãrã she aipotãã pente ñeepe pẽĩ hãndi ãñare.

²¹ Katuã rãnga peu Jesucristo jykopaivi hareka mbaiposhyre jykopaivi hãndi; katuã rãnga pykaru Ñandeja ñymesape hareka jyve ãñare ñymesape.

²² Maĩrã potara ñambyposhyka Ñandeja? Ñanypyrãtaverashivi?

Opa mba'e pijapova, pijapo Tũpa pemombairã

²³ Opa mba'eara katu jajapo, tẽvã opa mba'ẽã haikavi. Opa mba'e katu jajapo, tẽvã opa mba'ẽã haikavi japo ñandyrehe.

²⁴ Avy jaheka ñandepeĩ haikavi verã, jahekapo jyve ñandapisha haikavishu verã.

²⁵ Opaite soo ovendeha'õpe ẽvãre, pe'u, mbaimba pypyrãnduheape pyndypyape mbaikuaakue.

²⁶ Shara Ñandeja ña'ãpova hai ko yvy hareka opa mbai ẽẽpyare.

²⁷ Jesús jyrojambaterihea mbeupe pykaru hãndi verãrã, hareka pota pehorã, pekua, hareka opava mba'e ñonohandeare he'u, mbaimba perevape, ẽẽva pyndypyape.

²⁸ Tẽvã ĩme'ẽ hei pevarã: “Kova soo rãnga hai me'ẽãva ta'ãngape”, avy pe'u, mbeupeva rehe hareka pypya pimbijetava rehe.

²⁹ Yngavare pya mbijetaheva rãnga haishu, ha'ẽã pee hai peva. Marãrapo hekyshyhevi ẽẽsheva yngavare pya mbijetaheva rehe?

³⁰ She ameẽ ajetekue Tũpape hauva reherãra, marã'ĩrãra mbava ijeta porããpo shyrehe hauva rehe?

³¹ Pykarurã, maĩrã pimbyurã, maĩrã mbai pijapovare, pijapo pemombaivasu verã Tũpa.

³² Avy porãmba pyheshakashu Judio retape, Israelitamba retape, maĩrã Tũpa jytũpao ryheva.

³³ She jyve opa mbaipe ãñehãã opava retape ambyvya verã, hareka ahekãã she pevarãĩ haikavi verã, hetava retape haikavi verã rãnga jyve, ohojepe verã reta jyve.