1 Corintios 1 - NandevaBiblia

Ñymarãndu

¹ She Pablo shyrenohãva arykai Jesucristo jy'apostolrã Tũpa kyrã potarã, pente tyryvy Cristo ryheva Sóstenes hãndi apyrỹmarãndu;

² opaite Tũpa ryhevare Corintope'õre, pee Tũpa pyhyrõ vekuare henta'ĩrũrã kyamba, hareka opa rupi'õre Ñandeja Jesucristo hee hẽno'iare, haire Ija hareka ñande jyve.

³ Tũpa hareka Ñandeja Jesucristo tiñohẽ pyndyrehe mbai kavikue hareka pyavapy.

⁴ Shyrorykue ameẽñoĩ pyndyrehe Tũpape, shara Jesucristo rupii maĩkavi pyndyrehe.

⁵ Hai rupii rãnga Tũpa meẽpe pikatu pijeta verã hareka pikuaa verã heta mbai.

⁶ Jesucristo ryheva ñee rãnga ñymypyrãtama'ẽ pyndyrykovepe.

⁷ Hãme rãnga, pyhãrõteripẽĩ Ñandeja Jesucristo oujy verãrã, mba'etyãpope mbai kavikue Tũpa meẽpeva.

⁸ Kyrãpo hai pynymypyrãta ara opapeve, potãã Ñandeja Jesucristo oujymarã hesha pyndyrehe hekopemba'õrã.

⁹ Tũpa rãnga sareãhe hai ĩñee meẽva, hai pynyrẽno peii piko hãndi verã pente ñeepe Tay Jesucristo, Ñandeja.

Ñimbijao tũpao retaipi

¹⁰ Shyryvyre airurepe, Ñandeja Jesucristo heepe piko verã pente ñeepe hareka avy pijeshatãpi. Kyrãtẽverã, piko pente ñeepe hareka pente pyape.

¹¹ Kyrã hai pee shyryvyre, shara Cloe henta'ĩrũre mbe'uashe, ĩme'ẽ pymbytepe ijakañoĩ'iare.

¹² Kova rãnga hai, aipota hai peeva: Ĩme'ẽ heiva pymbytepe “She hai Pablo ryheva”; ĩrũre hei: “She hai Apolo ryheva”; ynga hei: “She hai Pedro ryheva”; yngare heijy: “She hai Cristo ryheva”.

¹³ Jesucristora opa ñimbija'o? Pablora kurusure mbysavavaha arykai pyndyraihuiterã? Maĩrã, Pablo heepera piñymyngarai? Mba'ety!

¹⁴ She avy'a hãndi Tũpa mbavẽã pynymbytepe amyngarairã, koñeĩ Crispo hareka Gayo amyngarai.

¹⁵ Hãrã mbavããpo hei, shyreepe ñymyngaraiva.

¹⁶ Ãñete amyngarai jyve Estefanas hareka henta ĩrũre, tẽvã shymandu'ãjyhe ĩmera'ẽjy ĩrũre amyngaraiva.

¹⁷ Shara Cristo shymondoã apyrỹmyngarai verã, koñeĩ Ñee kaviva ambeu verãĩ, ha'ẽã ñy'ãranduvare rãĩmi aikatu aijetarã, potãã Cristo kurusure manorã vekua pytareii mbaimbava rãĩmirã rãnga.

¹⁸ Shara ñee Cristo jukurusu ryheva mba'ẽãshu hai, õñehundi verã kyty oho'iare; tẽvã ohojepevare pevarã hokava ñee hai Tũpa ñymbaikatukue.

¹⁹ Kuatia mbyparahava heiva rãĩmi: “Mbaimba kuaava rãĩmipo aheja, opaite hei ijeheva ĩñaranduvare; aheshaka kaviposhu ãrãndukue opaite hei ijeheva mbai kuaavare”.

²⁰ Mapera'ẽ heta mbai kuaava? Mapera'ẽ ñee mbypara'ia? Mapera'ẽ katu ijetava? Tũpa rãnga mbaimbava rãĩmi japo ãrãndu ko yvy'ĩãrẽ'õre.

²¹ Shara Tũpa ñonoãshu kuaretare yvy'ĩãrẽ'õ ñy'ãrãndukue rupii kuaashu verã, hai ñy'ãrãndukue heshakavape. Tũpa pyryparekorã mondojepe ĩñee mbe'uava rupii opaite jyrojaheare, ajemaĩ ko ñee hãĩtẽ mbaimbava.

²² Judio reta rãnga pota hesha mbaikavi heshaha verã, tẽvã griegore heka mbaikuaakue;

²³ tẽvã ore mbe'uha Cristo ryheva mbysavavaha vekua kurusure. Kova ñee rehe heta Judiore poshyjyre, hãrã haimba Judiovare pevarã mbaimba vekua rãĩmishu kova ñee.

²⁴ Tẽvã Tũpa hẽnovare pevarã Judiore, maĩrã, Griegore, Cristo hai Tũpa ñymbaikatukue hareka ñymbaikuaakue.

²⁵ Tũpa ryheva hãĩtẽ mbaimba vekuava, haikaviteveshi kuaretare ñymbaikuaakue. Tũpa ryheva pyrãtambava rãĩmitẽvã, pyrãtãĩteveshi kuaretare.

²⁶ Shyryvyre pynymanduahe marãrape arykai Tũpa pynyrẽnorã, kuaretare heiva rãĩmi, hetamba'ẽ pymbytepe mbaimba'eite kuaava, hetamba'ẽjy peeva haimba huvishava, maĩrã, karai vasure ryhevare.

²⁷ Tẽvã Tũpa pyhỹrõ kuaretare heishua rãĩmi mbaimba kuaa vekuamire, mymarãka verã heta mbai kuaavare, hareka pyhỹrõ pyrãtamba vekuamire, mymarãka verã pyrãtavare.

²⁸ Tũpa pyhỹrõ kuareta heshahatamba vekua hareka mbaimba kuaavekuamire ẽvã ko yvy'ĩãrẽ, he'ise mba'ẽrãmba'i vekuamire, kyrãvape mbijiche verã jyroja'ijehevare.

²⁹ Hãme mbaveãpo Tũpa hỹnonde, ĩmere ñymbyvatehe verã.

³⁰ Tũpa rãnga pynymypente hãndi Cristo Jesús, hãrã hai rupii heta mbai pikuaa, ñimbivache, ñandyrykove ky'ã, hareka mbyhepya ñandyrehe ñanynohẽajy verã.

³¹ Kyrã, heiva rãĩmi Mbyparahavape: Ĩme'ẽ pota jyroja ijehevarã, koñeĩ tiroja ijehe Ñandeja hãndi.