Buk Song 98 - Buk Baibel long Tok Pisin

God i king bilong olgeta manmeri

Dispela em i song.

¹ Yumi singim nupela song long Bikpela. Em i bin mekim ol kain kain gutpela samting. Long bikpela strong na pasin holi bilong em tasol, em i bin winim pait.

² Bikpela i tokaut pinis long em i bin winim pait, na taim em i kisim bek ol Israel em i soim strong bilong en long ol lain manmeri.

³ Em i tingting yet long promis bilong en na em i sori long ol Israel na i no lusim ol. Olgeta manmeri bilong olgeta ples i lukim pinis God bilong yumi i winim pait na i kisim bek yumi.

⁴ Yupela ol manmeri bilong graun, singsing na amamas long Bikpela. Kirapim ol song bilong belgut na litimapim nem bilong en.

⁵ Paitim gita na singim ol song bilong litimapim nem bilong Bikpela. Mekim gutpela musik tru long gita.

⁶ Winim biugel na mambu na singaut na amamas long Bikpela, em i king.

⁷ Na solwara, yu wantaim olgeta pis samting i stap long yu, yupela singaut strong. Na graun, yu wantaim olgeta manmeri samting, yupela i mas singim song.

⁸ Yupela ol bikpela solwara, yupela i mas paitim han. Yupela ol maunten, yupela i mas singim song bilong amamas long ai bilong Bikpela.

⁹ Long wanem, em i kam bilong bosim olgeta hap graun. Na em bai i stap king na bosim olgeta manmeri long stretpela pasin oltaim.