Buk Song 85 - Buk Baibel long Tok Pisin

Man i prea bai God i lukautim ol lain bilong en

Dispela song em song bilong ol lain Kora. Em i song bilong man i bosim musik.

¹ Bikpela, yu bin mekim gut long graun bilong yu. Yu helpim mipela Israel gen na mipela i stap gut tru.

² Yu bin rausim sin bilong mipela ol manmeri bilong yu na yu lusim ol rong mipela i bin mekim.

³ Bipo yu kros long mipela, tasol nau yu no kros moa. Tru, yu bin belhat long mipela, tasol nau nogat.

⁴ God, yu God bilong kisim bek mipela. Nau yu ken bringim mipela i kam bek long yu. Plis, yu no ken kros moa long mipela.

⁵ Olsem wanem, bai yu kros oltaim long mipela? Bai kros bilong yu i no inap pinis, a?

⁶ Strongim laip bilong mipela gen, bai mipela ol manmeri bilong yu i ken amamas na litimapim nem bilong yu.

⁷ Bikpela, soim mipela olsem yu laikim mipela oltaim, na kisim bek mipela bai mipela i stap gut.

⁸ Mi putim yau long tok God, Bikpela i autim. Em i tok long givim bel isi na gutpela sindaun long mipela, sapos mipela i no i go bek long pasin nogut bipo mipela i mekim.

⁹ Tru tumas, em i redi pinis long kisim bek ol manmeri i save lotu long em na i bihainim laik bilong en. Na em bai i kisim bek mipela na bai em yet i stap wantaim mipela long graun bilong mipela.

¹⁰ Long dispela taim bai ol manmeri i laikim tru ol arapela na mekim gutpela pasin long ol. Na bai ol i stap stret na bel isi na sindaun gut wantaim.

¹¹ Long graun bai ol manmeri i bihainim tru Bikpela, na God long heven bai i mekim ol i kamap stretpela.

¹² Bikpela bai i helpim mipela long sindaun gut na ol samting mipela i mekim bai i kamap gutpela. Na graun bilong mipela bai i karim planti kaikai.

¹³ Bikpela bai i mekim ol manmeri i bihainim stretpela pasin na dispela bai i redim rot bilong em i kam.