Buk Song 82 - Buk Baibel long Tok Pisin

God em i nambawan king

Asap i raitim dispela song.

¹ God i stap namba wan long bikpela miting long heven. Ol hetman i bung na God i tokaut long tingting bilong en.

² Em i tok olsem, “Yupela i save kot giaman na i no stretim tok. Na yupela i save grisim ol man nogut.

³ Yupela i mas helpim ol rabisman na ol pikinini, papa bilong ol i dai pinis. Na ol man i karim hevi na i no i stap gut, yupela i mas mekim gut long ol.

⁴ Ol manmeri i stap nogut na i sot long ol samting, yupela i mas kisim bek ol long han bilong ol man nogut.

⁵ “Yupela i no gat save, na yupela i longlong tru. Yupela i save wokabaut long tudak, olsem na ol manmeri i no save bihainim stretpela pasin.

⁶ Mi tok olsem, ‘Yupela i god. Yupela i pikinini bilong God Antap Tru.

⁷ Tasol bai yupela i dai wankain olsem ol man i save dai. Bai laip bilong yupela i pinis, olsem laip bilong ol pikinini bilong king i save pinis.’”

⁸ God, yu mas kam na bosim olgeta manmeri bilong graun. Olgeta lain manmeri i bilong yu tasol.