Buk Song 70 - Buk Baibel long Tok Pisin

Man i beten long God i helpim em

Devit i raitim dispela song, bilong mekim God i tingim ol hevi bilong en. Em i song bilong man i bosim musik.

¹ God, plis yu ken kisim bek mi. Bikpela, yu kam hariap na helpim mi.

² Sampela man i laik kilim mi i dai. Yu mas daunim ol na paulim ol, bai ol i sem. Na sampela man i amamas long ol hevi bilong mi. Yu mas rausim ol i go bek na daunim nem bilong ol.

³ Ol dispela man i tok bilas long mi, yu mas semim ol moa yet, bai ol i kirap nogut tru long pasin bilong ol.

⁴ Tasol ol manmeri i save go long yu, ol i ken belgut na amamas long yu. Dispela olgeta manmeri yu bin kisim bek ol, na ol i laikim tumas dispela wok yu bin mekim long ol, oltaim ol i ken tok olsem, “God em i nambawan tru.”

⁵ God, mi no gat strong, na mi no inap helpim mi yet. Olsem na yu mas i kam long mi kwiktaim. Bikpela, yu yet yu man bilong helpim mi na kisim bek mi. Yu no ken wet, yu mas helpim mi kwik.