Buk Song 57 - Buk Baibel long Tok Pisin

Man i prea long God i helpim em

Devit i raitim dispela song, em kain song ol i kolim Miktam. Devit i raitim dispela song long taim em i ranawe long King Sol na i go hait i stap long hul bilong ston. Man i bosim musik i mas tokim ol man long singim song long nek ol i kolim, “No ken bagarapim.”

¹ God, yu mas marimari long mi. Mi go long yu na mi laik bai yu lukautim mi. Mi stap wantaim yu na mi stap gut, olsem ol pikinini kakaruk i save hait na stap gut aninit long wing bilong mama kakaruk. Mi laik i stap olsem tasol inap olgeta samting bilong bagarapim mi i pinis.

² Mi save singaut long God Antap Tru bilong em i helpim mi. Na em i save givim mi olgeta samting mi sot long en.

³ Em i stap long heven na bai em i harim prea bilong mi na kisim bek mi. Em bai i winim ol man i laik bagarapim mi. God i save laikim mi tru oltaim, na em i no save lusim mi. Nogat tru.

⁴ Mi save slip namel long ol man ol i olsem ol laion, na ol i redi long kaikai ol manmeri. Tit bilong ol i sap tumas olsem spia na supsup. Tang bilong ol i olsem bainat i sap tru.

⁵ God, mekim wanpela samting i kamap long skai bilong soim olgeta manmeri olsem, yu yet yu nambawan tru na yu stap antap long ol. Mekim strong bilong yu i kamap long ples klia long olgeta hap bilong graun.

⁶ Ol birua i putim umben bilong holimpas mi. Olsem na bikpela hevi i daunim mi tru. Ol i wokim hul long rot bilong mi, bilong mi pundaun long en. Tasol mi no pundaun. Ol yet i pundaun long dispela hul.

⁷ God, long bel bilong mi, mi bilip strong long yu. Yes, mi bilip olgeta long yu. Na bai mi singim song bilong litimapim nem bilong yu.

⁸ Mi mas kirap lusim slip. Mi mas paitim gita na kulele samting. Tulait i bruk, orait bai mi mekim dispela musik.

⁹ Bikpela, bai mi tenkyu long yu namel long ol arapela lain. Bai mi go long olgeta manmeri na litimapim nem bilong yu.

¹⁰ Yu save laikim mipela moa yet. Sapos mipela i laik makim dispela, bai mak i go inap long skai. Oltaim yu save bihainim gutpela tok bilong yu. Sapos mipela inap kaunim olgeta taim yu bin mekim gut long mipela, bai mak i go antap inap long ol klaut.

¹¹ God, mi laik bai ol manmeri i litimapim nem bilong yu antap tru. Mekim strong bilong yu i kamap ples klia long olgeta hap bilong graun, bai olgeta manmeri i ken save long biknem bilong yu.