Buk Song 54 - Buk Baibel long Tok Pisin

Man i beten long God bai i helpim em

Devit i raitim dispela song, em kain song ol i kolim Maskil. Devit i raitim dispela song long taim ol man bilong Sif i go tokim Sol long Devit i hait i stap namel long ol. Man i bosim musik i mas tokim ol man long paitim ol gita samting.

¹ God, long strong bilong yu, yu mas kisim bek mi long han bilong ol man nogut. Long bikpela strong bilong yu, yu mekim mi i kamap fri.

² God, mi laik yu harim prea bilong mi. Mi laik yu putim yau long tok bilong mi.

³ Ol bikhetman i kam pinis na ol i laik pait long mi. Ol dispela man i save bagarapim ol arapela man, ol i laik kilim mi i dai. Ol dispela man i save ting God em i samting nating.

⁴ Tasol God yet i save helpim mi. Tru tumas, Bikpela i save lukautim mi na mi stap gut.

⁵ God i ken mekim save long ol birua bilong mi. Pasin nogut ol i bin mekim long mi, em i ken mekim dispela kain pasin i kamap long ol yet. God, yu no save lusim mi, na yu ken pinisim tru ol dispela birua.

⁶ Bikpela, mi save laikim tumas long givim ofa long yu. Yu gutpela tumas, olsem na mi tenkyu tru long yu.

⁷ Yu bin helpim mi, na olgeta hevi i kamap long mi i no daunim mi. Na mi lukim yu i bagarapim ol birua bilong mi.