Buk Song 53 - Buk Baibel long Tok Pisin

Pasin kranki na pasin nogut bilong ol man

Devit i raitim dispela song, em kain song ol i kolim Maskil. Man i bosim musik i mas tokim ol man long singim song long nek ol i kolim Mahalat.

¹ Ol longlong man i save tok long ol yet olsem, “I no gat God i stap.” Ol dispela man ol i man nogut tasol. Ol i save mekim pasin i nogut tru. I no gat wanpela i save mekim gutpela pasin.

² God i stap long heven na i lukluk i go daun long ol manmeri. Em i laik painim sampela man i gat gutpela save na i wok long kisim save long God.

³ Tasol nogat. Olgeta wantaim i lusim rot pinis. Olgeta i wankain tasol, ol i man nogut tru. I no gat wanpela bilong ol i save mekim gutpela pasin. Nogat tru.

⁴ God i tok olsem, “Ol dispela man i mekim pasin nogut, ating ol i no gat save, a? Ol i save pinisim ol manmeri bilong mi olsem ol i kaikai bret. Na ol i no save beten long mi.”

⁵ Tasol bai ol i pret moa yet. Bipo ol i no pret olsem. Nogat tru. Long wanem, bai God i pinisim tru olgeta birua bilong yupela. Em i sakim ol pinis na bai em i bagarapim ol tru.

⁶ Mi laikim tumas bai God i salim wanpela man bilong Saion i kam bilong kisim bek ol Israel. Taim God i helpim ol manmeri bilong en na ol i stap gut gen, orait ol Israel bai i amamas. Yes, bai ol i belgut tru.