Buk Song 47 - Buk Baibel long Tok Pisin

God i stap king bilong olgeta manmeri bilong graun

Dispela song em i bilong ol lain Kora. Em i song bilong man i bosim musik.

¹ Yupela olgeta manmeri, amamas na paitim han. Yupela singaut bilong amamas na kirapim song bilong litimapim nem bilong God.

² Yumi mas pret long Bikpela, em i God Antap Tru. Em i nambawan king na em i bosim olgeta manmeri bilong graun.

³ Em i daunim olgeta lain manmeri na yumi stap antap long ol. Em i mekim ol arapela lain i stap aninit long yumi.

⁴ God yet i makim wanpela graun na i givim pinis long yumi. Yumi lain bilong Jekop, God i givim bel bilong en long yumi, na yumi save amamas long dispela graun bilong yumi.

⁵ God i go long heven. Taim Bikpela i go antap ol manmeri i amamas na ol i singaut strong na winim biugel wantaim.

⁶ Goan, yumi kirapim ol song bilong litimapim nem bilong God. Yumi kirapim ol song na amamas long em, em i king bilong yumi.

⁷ God i stap king na i bosim olgeta hap graun. Yumi mas singim song bilong litimapim nem bilong en.

⁸ God i stap king na i bosim olgeta lain manmeri. God i sindaun long sia king bilong em, na pasin bilong en i gutpela na stretpela olgeta.

⁹ Ol hetman bilong ol lain manmeri ol i bung wantaim ol manmeri i save bihainim God bilong Abraham. Ol plang bilong pait bilong olgeta ami, em olgeta i bilong God. Em i nambawan king.