Buk Song 15 - Buk Baibel long Tok Pisin

Pasin God i laik yumi mekim

Devit i raitim dispela song.

¹ Bikpela, husat inap i stap long haus bilong yu? Husat inap sindaun long Saion, dispela maunten bilong yu yet?

² Man i bihainim laik bilong God long olgeta samting, na i mekim stretpela pasin oltaim, na i save tok tru oltaim, em bai i stap long haus bilong yu.

³ Em i no save krungutim gutpela nem bilong narapela man. Em i no save mekim nogut long ol pren, na em i no save mekim ol kain kain tok win long ol arapela man.

⁴ Em i no laikim ol man God i givim baksait pinis long ol. Tasol em i givim biknem long ol man i bihainim tok bilong God. Em i save inapim ol promis em i bin mekim, maski dispela pasin i givim bikpela hevi long em.

⁵ Em i save larim ol arapela man i kisim dinau long em, na taim ol i bekim, em i no save pulim winmani long ol. Ol man i no inap grisim em long mani bilong mekim em i kotim ol man i no gat rong. Man i bihainim ol dispela pasin, em i no inap pundaun.