Buk Song 142 - Buk Baibel long Tok Pisin

Wanpela man i prea long God i helpim em

Devit i raitim dispela song, em kain song ol i kolim Maskil. Devit i stap long hul bilong ston na em i raitim dispela beten.

¹ Mi singaut strong long Bikpela bilong em i helpim mi. Mi wok strong long askim em long helpim mi.

² Mi save tokim em long olgeta wari na olgeta hevi i kamap long mi.

³ Taim bel bilong mi i hevi moa, na mi ting bai mi bagarap, Bikpela, yu save wanem samting mi mas mekim. Long rot bilong mi ol man i haitim pinis wanpela umben bilong holimpas mi.

⁴ Mi lukluk klostu long mi, tasol mi no lukim wanpela man i ken helpim mi. I no gat wanpela man i stap bilong was long mi. Na i no gat wanpela man i sori long mi na i laik helpim mi.

⁵ Olsem na Bikpela, mi singaut long yu bilong yu ken helpim mi. Yu tasol yu wasman bilong mi. Taim mi stap laip yet mi laikim yu wanpela tasol i mas i stap wantaim mi.

⁶ Yu harim mi i singaut long yu long helpim mi. Long wanem, bel bilong mi i hevi tru. Ol man i mekim nogut long mi ol i strong tumas, na mi no inap winim ol. Olsem na yu mas kisim bek mi long han bilong ol.

⁷ Kisim bek mi long dispela hevi na mi ken i stap gut. Olsem na long taim ol manmeri bilong yu i bung bai mi litimapim nem bilong yu. Long wanem, yu bin mekim gutpela pasin long mi.