Buk Song 114 - Buk Baibel Long Tok Pisin 2008 + DC

Song bilong tingim God i bin kisim bek ol manmeri bilong en long solwara Retsi

¹ Bipo ol Israel i lusim Isip na i go. Dispela ol lain bilong Jekop i lusim ples bilong ol arapela lain.

² Taim ol i mekim olsem, ol Juda i kamap manmeri bilong Bikpela, na ol Israel tu.

³ Solwara Retsi em i lukluk na i ranawe, na wara Jordan i sanap i stap na wara i no ran moa.

⁴ Ol bikpela maunten i kalap kalap olsem ol meme na ol liklik maunten i kalap nabaut olsem ol sipsip.

⁵ Solwara, wanem samting i kamap na yu ranawe? Wara Jordan, olsem wanem na yu no ran moa?

⁶ Ol maunten, bilong wanem yupela i kalap kalap olsem ol meme? Yupela ol liklik maunten, olsem wanem na yupela i kalap nabaut olsem ol sipsip?

⁷ Graun, nau Bikpela i kam na yu mas guria. God bilong Jekop i kam pinis na yu mas guria.

⁸ Em i save mekim ston i kamap hul wara, na maunten ston i kamap bikpela wara.