Zekariya 9 - Tonga Bible 1986

Kulangika kwa ŵamitundu yinyake

¹ Mazu gha Ambuya ghakumikana ndi charu cha Hadrake ndipo ghakajanga ndi Damasko, chifukwa ku Ambuya kwe misumba yaku Aramu, nge ndi mitundu yose yaku Yisraele;

² ndi Hamati nayo, yo wapakana nayo mphaka; Turo ndi Sidoni, chingana mbavinjeru ukongwa.

³ Turo wajizenge linga, ndi kuwunjika siliva nge ndi fuvu, ndi golide nge ndi dongo mu miseu.

⁴ Kweni Ambuya amurondenge vyake vyose, ndi kutaya usambasi wake mu nyanja ndipo wakapirizgikanga ndi moto.

⁵ Ashikeloni wakauwonanga ndipo wopenge; Gaza nayo so wambwambwanthenge ukongwa; ndi Ekroni viyo chifukwa chigomekezgu chake chatondeka. Karonga wamarenge mu Gaza; Ashikeloni wajenge wambura ŵakujamo;

⁶ ŵana ŵamdondo ŵajenge mu Ashadodi; ndipo ndimarenge kujikuzga kwa ŵaFilisti.

⁷ Ndituzgenge ndopa zake mu mlomo wake, ndi ukazuzi wake pakati pa minyu ghake; ndipo nayo waŵenge wakujako waku Chiuta widu; ndipo waŵenge nge ndi fuku mwaku Yuda; ndi Ekroni waŵenge nge ndi ŵaYebusi.

⁸ Viyo ndizengenge msasa ndi kuja pa nyumba yangu nge ndi mlonda, kuti munthu wareke kwenda uku ndi uku; ndipo kuwulevi wakuŵasuzga, kuŵapofya, chifukwa sono ndiwona ndi maso ghangu.

Karonga wa chimangu

⁹ Sekereni ukongwa, mwa ŵanthu ŵaku Zioni! Kamburani ukongwa, mwa ŵanthu ŵaku Yerusalemu! Wonani, karonga wino watuza kwinu, ndi murunji wendi utaski, ngwakuzika, wakwera pa mbunda, pa mwana wa mbunda yinthukazi.

¹⁰ Ndidumuwenge gareta lakutuwa kwaku Efraimu ndi kavalo wankhondo wakutuwa ku Yerusalemu; uta wankhondo nawo udumulikenge; ndipo wakambenge chimangu ku ŵa mitundu. Ukaronga wake wambenge kutuwa ku nyanja kwachifika ku nyanja, kutuwa ku Msinji kwachifika ku vigoti vya charu.

Wakataskanga ŵanthu ŵake

¹¹ Kweni iwe nawe, chifukwa cha ndopa za phanganu langu ndi iwe, ndituzgenge wamagoŵa wako mu mbuna yambura maji.

¹² Wereni ku linga linu, imwe ŵamagoŵa ŵachigomekezgu, msana wale ndinena kuti ndimuwezgiyeninge kaŵi.

¹³ Chifukwa ndamupinda Yuda, nge ndi uta wangu, Efraimu ndamuchita muvwi wake. Ndiyuskenge ŵana ŵako, Zioni, kukulimbana ndi ŵana ŵako, iwe Girisi, ndikukuchita iwe nge ndi lipanga la ngwazi.

¹⁴ Viyo Ambuya awonekenge pachanya pawo, ndipo muvwi wawo utewenge nge ndi limphezi; ndipo Ambuya Chiuta wambenge mbata ndi kwenda mu ŵakavuruvuru ŵaku mwera.

¹⁵ Ambuya ŵa maŵanja aŵavikiriyenge; ndipo amarenge ndi kukandirizgiya pasi wo ŵapong'a mya; ndipo ŵamwenge ndopa zawo nge ndi vinyo, ndipo ŵazazikenge nge ndi mbali fwa, ŵangotenge nge ndi ngodya za jochero la sembe.

¹⁶ Ndipo mu zuŵa lo, Ambuya Chiuta wawo waŵataskenge chifukwa ndi mskambu wa ŵanthu ŵake; nge ndi mya yakuzirwa ya mphumphu wakang'animanga mu charu chake.

¹⁷ Ehe, ngukuru umampha wake, ndi kutowa kwake nkhwakuruska limu! Vyakurgha vikondweskenge ŵanyamata ndi vinyo mufya ŵamwali.