Zekariya 7 - Tonga Bible 1986

Kuja kwambura kulamulika ndi Ambuya

¹ Mu chirimika cha chinayi cha karonga Dariusi, mazu gha Ambuya ghanguza kwaku Zekariya, mu zuŵa la chinayi la mwezi wa chinkhonde ndi chinayi, wo ndi Kislevi.

² Sono ŵanthu ŵaku Betele ŵangutuma a Serezera, ndi Regemeleke ndi ŵanthu ŵawo, kwachiŵeyere wezi wa Ambuya,

³ ndi kufumba ŵazukuru ŵa nyumba ya Ambuya ŵa maŵanja ndi ŵamchimi, kuti, “Kumbi ndikwenere kutenje ndi kufunga kurgha mu mwezi wa chinkhonde, nge ndimo ndachitiyanga virimika vinandi?”

⁴ Ndipo mazu gha Ambuya ŵa maŵanja ghanguza, ghakuti,

⁵ “Kamba ku ŵanthu wose ŵamu charu ndi ku ŵazukuru, kuti, muchifunga ndi kutenje mu mwezi wa chinkhonde, ndi wa chinkhonde ndi chiŵi kwa virimika ivi machumi ghankhonde ndi ghaŵi (70) kumbi mungufungiya ine?

⁶ Mu chirgha ndi kumwa, kumbi kuti mujirghiya ndi kujimwiya mwaŵeni cha?

⁷ Pa Yerusalemu wenga ndi ŵakujamo ndi usambasi, ndi mizi yake yakumuzungurizga, ndipo ŵanthu ŵajanga kuchiri kumwera ndi mu chidika, kumbi asi ndi yagha mazu gho Ambuya anguwandiska ndi ŵamchimi wawo ŵakale?”

⁸ Ndipo mazu gha Ambuya ghanguza kwaku Zekariya, ghakuti,

⁹ “Viyo atiti Ambuya ŵa maŵanja, yeruzgani cheruzgu chakuneneska, rongoni ulemu ndi chisungusungu munthu yose ku munyake,

¹⁰ mungasuzganga choko, chingana ngwambura wiske, mlendo pamwenga mukavu; kuwulevi yumoza waku imwe waghanaghaniye uheni munyake mu mtima winu.”

¹¹ Kweni wangukana kuvwiya, ŵangusukung'a maphewa, ndi kujara makutu mwakuti ŵareke kuvwa.

¹² Wangunonopeska mitima yawo gwa nge ndi mwa, kuti ŵangavwa dangu ndi mazu gho Ambuya ŵa maŵanja angutuma mu Mzimu wawo mu ŵamchimi cha. Chifukwa ichi kunguza ukari kutuwa kwa Ambuya ŵa maŵanja.

¹³ “Nge ndimo ine ndingukambiya ndipo kuti ŵanguvwa cha, viyo ŵangudanirizga kweni kuti ndinguvwa cha,” atiti Ambuya ŵa maŵanja.

¹⁴ “Ndipo ndinguŵambininiska ndi kanthenga mukati mu mitundu yose yo iwo kuti ŵangiyiziŵa cha. Viyo charu cho ŵangutuwamo chinguja mahame, kwengavi munthu wakwendamo, ndipo charu chakutowa chenga bozwa.”