Zekariya 14 - Tonga Bible 1986

Ambuya azamukovya ŵaku Yerusalemu pakurimbana ndi ŵamitundu

¹ Nadi, zuŵa la Ambuya lituza, penipo miskowo yako yigaŵikenge mukati mwako.

² Chifukwa ndiwunjikenge mitundu yose ya ŵanthu kurwana ndi Yerusalemu, ndipo msumba urondekenge ndi nyumba ziskoŵekenge, ndi ŵanthukazi ŵachichizgikenge; chigaŵa charwande cha msumba chiyorekenge kuruta ku uŵanda, kweni ŵanthu ŵakujako kuti ŵabayikenge cha mu msumba.

³ Ndipo Ambuya atuwenge kurwana ndi mitundu yo nge ndi pa ŵaturwa mu zuŵa la nkhondo.

⁴ Mu zuŵa lo marundi ghake ghamenge pa Phiri la Maolivi, lo le panthazi pa Yerusalemu ku atuli gha dazi, ndipo Phiri la Maolivi ligaŵikenge paŵi, kutuwa ku vuma mpaka ku zambwe ndi dambo lisani ukongwa; viyo chigaŵa cha phiri chinderenge ku nkhonde, ndi chinyake ku mwera.

⁵ Ndipo dambo la mapiri ghangu liundikenge, chifukwa dambo la mapiri lifikenge kurwande kwake; ndipo muthaŵenge nge ndimo munguthaŵiya chiyewu-yewu mu mazuŵa ghaku Uziya karonga waku Yuda. Ndipo Ambuya Chiuta wino wazenge, ndi ŵatuŵawose pamoza nayo.

⁶ Mu zuŵa lo mphepo ndi kuzizira viŵengeko cha.

⁷ Ndipo kuŵenge zuŵa lambura kumara (kuziŵika ndi Ambuya), msana cha pamwenga usiku, chifukwa ndi mazulo so kuŵenge kungweruka.

⁸ Mu zuŵa lo maji gha umoyo ghendenge kutuwa ku Yerusalemu, chigaŵa chimoza kulazga ku nyanja yaku vuma; ndi chigaŵa chinyake kulazga ku nyanja yaku zambwe; ghendenge nyengo ya chihanya ndi chifuku.

Ambuya ŵaku wose

⁹ Ndipo Ambuya aŵenge karonga wa charu chose chapasi; mu zuŵa lo kuŵenge Ambuya amoza ndi zina lawo limoza.

¹⁰ Charu chose chiŵenge chidika kutuwa ku Geba kwachifika ku Rimoni ku mwera kwa Yerusalemu. Kweni Yerusalemu wajenge wakutumphuka pa malo ghake, kutuwa ku Likomo laku Benjamini kwachifika ku malo gha likomo la kale, ku Likomo laku chi Ngodya ndi kutuwa ku Msumba waku Hamanele kwachifika ku vyakupondiyamo mphereska vya karonga.

¹¹ Ndipo ŵanthu ŵajenge mwenimo, chifukwa kuti kuŵenge so thembo cha; kweni Yerusalemu wajenge kwakufwasa.

¹² Iyi yiŵenge nthenda ya chigodora yeniyo Ambuya akosonge nayo mitundu yose yo yikarwanga ndi Yerusalemu; nyama yawo yivundiyenge pawima ŵeche kuma, maso ghawo ghavundenge mu vikorongo vyawo, ndi malilimi ghawo ghavundenge mu milomo yawo.

¹³ Ndipo mu zuŵa lo chopu chikuru chakuturiya ku Ambuya chiŵaŵiyenge, viyo we yose wakakonga janja la munyake, ndipo janja la yumoza litumphukenge kulimbana ndi janja la munyake,

¹⁴ chingana ndi Yuda nayo warwanenge ndi Yerusalemu. Ndipo usambasi wa mitundu yose uwunjikikenge, golide, siliva, ndi vivwalo, vinandi.

¹⁵ Ndipo chigodora ichi chiŵiyenge ŵakavalo, ndi myulu, ndi ŵagamila, ndi mbunda, ndi vyakuŵeta vyose vyamu misasa iyi.

¹⁶ Ndipo yose yo wasiyika, mu mitundu yose yo yinguza kulimbana ndi Yerusalemu, wakwerenge chirimika ndi chirimika kusopa karonga, Ambuya ŵa maŵanja, ndikusunga dghera la misasa.

¹⁷ Ndipo asani ŵakaŵangapo ŵamu zimbumba zose zamu charu chapasi, wo ŵarekenge kukwere ku Yerusalemu kwachisopa karonga, Ambuya ŵa maŵanja: vuwa kuti ying'engepo cha paku wo.

¹⁸ Ndipo asani mbumba yaku Egipiti yireka kukwera ndi kujirongo yeneko, kuzenge chigodora paku iwo cho Ambuya akosonge nacho mitundu yo yireka kukwera kusunga dghera la misasa.

¹⁹ Ichi chiŵenge chilango ku Egipiti ndi chilango ku mitundu yose yo yirekenge kukwera kusunga dghera la misasa.

²⁰ Mu zuŵa lo kulembekenge pa miliwo ya ŵakavalo, “Utuŵa ku Ambuya.” Ndipo viŵiya mu nyumba ya Ambuya viŵenge nge ndi mbali panthazi pa jochero;

²¹ ndipo chiŵiya chose mu Yerusalemu ndi Yuda chiŵenge chakupaturika ku Ambuya ŵa maŵanja, ndi viyo kuti wose akupereka sembe ŵangaza ndi kuvito ndi kubikamo nyama ya sembe. Ndipo kuti kuŵenge so ŵakugulana maronda cha, mu nyumba ya Ambuya ŵa maŵanja mu zuŵa lo.