Zekariya 13 - Tonga Bible 1986

Kutozgeka kwa Yerusalemu

¹ “Mu zuŵa lo chisima chijurikiyenge nyumba yaku Davidi ndi ŵakuja mu Yerusalemu, kuŵatoweska ku ulakwi ndi utimbanizi.

² “Ndipo kukaŵanga pa zuŵa lo, atiti Ambuya ŵa maŵanja, ndituzgengeko mazina gha ŵangoza ku charu; mwakuti ŵakakumbukikanga so cha; ndipo so ndituzgengemo mu charu ŵamchimi, ndi mzimu uheni.

³ Ndipo asani munthu yumoza wawonekenge so nge ndi mchimi awiske ndi anyina wo ŵakumupapa ŵatenere kumenene kuti, ‘Uŵenge wa moyo cha, chifukwa ukamba utesi pa zina la Ambuya,’ ndipo awiske ndi anyina wo ŵakumupapa ŵamugwazi asani wachima.

⁴ Mu zuŵa lo mchimi yose walengenge soni ndi chiwona chake wachichima; kuti wavwarenge munjilira waweya cha kujipusika nawo.

⁵ Kweni watinge, ‘Ine kuti nde mchimi cha, nde mlimi wa munda; chifukwa wenga chuma changu kutuwa pa uhurwa wangu.’

⁶ Ndipo asani yumoza watumfumba kuti, ‘Kumbi mabala yagha mu msana wako ngachine?’ wamukenge, ‘Mabala yagha ndingugwazika mu nyumba ya ŵanase ŵangu.’ ”

⁷ “Yuka, lipanga, pa mliska wangu, pa munthu yo watuma pafupi ndi ine,” atiti Ambuya ŵa maŵanja. “Koso mliska, kuti mberere zimbininike; ndiwezgiyenge janja langu pa zimana-zimana.

⁸ Ndipo kuŵenge kuti, mu charu chose, atiti Ambuya, vigaŵa viŵi vidumukeko vifwi; kweni chigaŵa chachitatu chijenge mwenimo.

⁹ Ndipo ndiŵikenge chigaŵa chachitatu ichi mu moto, ndi kuchisongono mo munthu wasongonore siliva, ndi kuchesa mo golide liteseke. Ŵadanange zina langu, ndipo ndiŵamukenge. Ndinenenge kuti, ‘Mbanthu ŵangu’; ndipo ŵanenenge kuti, ‘Ambuya ndi Chiuta widu.’ ”