Zekariya 11 - Tonga Bible 1986

Kulangika kwa ambura kurapa

¹ Jura makhomo ghako iwe Lebanoni, kuti moto woche milanji yako!

² Bongo, iwe mkankhazga chifukwa milanji yawa pasi, chifukwa miti yakutowa yanangika! Bongoni matundu ghaku Bashani, chifukwa lisuwa ladumuka pasi.

³ Ivwa, kuliya kwa ŵaliska, chifukwa unkhankhu wawo wapasuka! Ivwa kubangula kwa nkharamu, chifukwa matundu gha pa Yordane ghaŵa chiparamba.

⁴ Viyo atiti Ambuya Chiuta wangu: “Uŵi mliska wa mskambu wo wamubayika.

⁵ Wo ŵazigula ŵazibaya kwambura kulangika; wo ŵaguliska ŵatiti, ‘Atumbikike Ambuya, chifukwa ndasambazgika!’

⁶ Ndipo ŵaliska ŵawo kuti ŵe nazo ndi chitima cha. Ndipo nane ndirekenge kuŵa ndi chitima ndiwo ŵaja mu charu ichi, atiti Ambuya. Nadi ndiperekenge munthu yose mu janja la mliska wake, ndipo yose mu janja la karonga wake; ndipo ŵaphwanyenge charu, ndipo kuti nditaskenge nanga njumoza cha mu janja lawo.”

⁷ Viyo ndinguŵa mliska wa mskambu wo wamubayikiya wo ŵagulananga mberere. Ndipo ndingujitore ndodo ziŵi; yimoza ndinguyidana Wezi, yinyake Kurungana. Ndipo ndaliskanga mberere.

⁸ Mu mwezi umoza ndingutuzgako ŵaliska ŵatatu. Kweni ndingukaripa nawo, iwo nawo ŵangunditinkha.

⁹ Viyo ndinguti, kuti, “Ndiŵenge mliska winu cha. Yo yitufwa, yifwenge; yo yibayika, yibayike; zo zajako zirghe nyama za zinyawo.”

¹⁰ Ndipo ndinguto ndodo yangu Wezi, ndingufyo, (cho ching'anamuwa) kuswa phanganu lo ndingupangana ndi ŵanthu wose.

¹¹ Viyo lingusweka mu zuŵa leniliya ndipo ŵakugula mberere, wo ŵalereskanga ine ŵanguziŵa kuti ghenga mazu gha Ambuya.

¹² Ndipo ndinguti kwaku iwo, “Asani nchamampha mu maso ghinu ndipaskeni mphoto yangu; kweni asani cha rekani.” Viyo ŵangupima uzitu wa mphoto yangu; ndrama za siliva machumi ghatatu (30).

¹³ Viyo Ambuya anguti kwaku ine, “Kazipong'e mu chakusungiyamo ndrama” mtengo ukuru wo ŵangundiripa. Viyo ndinguto ndrama za siliva machumi ghatatu (30) ndi kuzipong'a mu chakusungiyamo ndrama mu nyumba ya Ambuya.

¹⁴ Viyo ndingufyo ndodo yangu ya chiŵi Kurungana, (uku ndiku kuti ndinguswa) weni-ndiweni pakati paku Yuda ndi Yisraele.

¹⁵ Ndipo Ambuya anguti kwaku ine, “Jitore so vyakuteŵete vya mliska wambura kwenere.

¹⁶ Chifukwa, wonani ndiyuska mliska mu charu mweniyo kuti waphwere cha zo zikhumba kufwa, pamwenga kupenja zo zasoŵa, pamwenga kupozga zakupunduka, pamwenga kulela zo zamampha, kweni ŵarghenge nyama ya zakututuŵa, ndikufyo marundi ghawo.

¹⁷ Owe, mliska wangu wambura kwenere, yo wajowo mskambu wake! Lipanga liteme pa janja lake ndi pa jiso lake la marghe! Janja lake limire gwangwata ndi jiso lake la marghe litoroke limu!”