Zekariya 1 - Tonga Bible 1986

Ambuya adana ŵanthu ŵawo kuwere kwaku iwo

¹ Mu mwezi wa chinkhonde ndi chitatu, mu chirimika cha chiŵi chaku Dariusi, mazu gha Ambuya ghanguza kwaku Zekariya, mwana waku Berekiya, mwana waku Ido, mchimi, kuti,

² “Ambuya? Angutundiya ukongwa ndi auskemwe.

³ Chifukwa ichi uŵanene, viyo atiti Ambuya ŵa maŵanja, wereni kunu kwangu, atiti Ambuya ŵa maŵanja: ine nane ndiweliyenge kwinu, viyo atiti Ambuya ŵa maŵanja.

⁴ Mungaŵa nge mba uskemwe cha, kwaku ŵeniwo ŵamchimi ŵakale ŵadanirizganga kuti, ‘Viyo atiti Ambuya ŵa maŵanja, weniko ku nthowa zinu ziheni, ndi ku nchitu zinu ziheni, ndi ku nchitu zinu ziheni.’ Kweni kuti wanguvwa cha, pamwenga kundivwiya, atiti Ambuya.

⁵ Kumbi sono auskemwe ŵepani? Ndipo kumbi ŵamchimi, mbamoyo muyaya?

⁶ Kweni mazu ghangu ndi marangu ghangu gho ndingulanguliya ŵateŵeti ŵangu ŵamchimi, kuti ghanguŵasaniya cha auskemwe? Viyo ŵanguwe ŵanguti, Nge ndimo Ambuya ŵa maŵanja angughanaghaniya kuchitiya ifwe chifukwa cha nthowa zidu ndi nchitu zidu, viyo ndimo achitiya nafwe.”

Chiwona cha mchimi ndi za kavalo

⁷ Pa zuŵa la machumi ghaŵi ndi ghanayi (24) la mwezi wa chumi ndi umoza, wo ndi mwezi wa Sebata mu chirimika cha chiŵi chaku Dariusi, mazu gha Ambuya ghanguza kwaku Zekariya mwana waku Berekiya, mwana waku Ido, mchimi; ndipo Zekariya wanguti,

⁸ “Ndinguwona ndi usiku, munthu wakwera pa kavalo muyera! Wanguma mukati mu miti yakubiliŵira mu mphata; ndipo kuvuli kwake kwenga ŵakavalo ŵayera, ŵamaŵanga, ndi ŵatuŵa.

⁹ Viyo ndinguti, ‘Ivi ndi vine mbuyangu?’ Ndipo mungelo wa Ambuya yo wakambanga nane wanguti. ‘Ndikurongo yaŵa kuti mbayani.’

¹⁰ Ndipo munthu yo wanguma mukati mu miti yakubiliŵira wangwamuka, wanguti ‘Yaŵa ndi ŵeniwo Ambuya aŵatuma kwendayenda mu charu chapasi.’

¹¹ Ndipo iwo ŵangumwamuka mungelo wa Ambuya yo wanguma mukati mu miti yakubiliŵira kuti, ‘Tenda uku ndi uku mu charu chapasi, nadi charu chose nchakufwasa.’

¹² Penipo mungelo wa Ambuya wanguti, ‘Ambuya ŵa maŵanja, kumbi mpaka zuŵanji murekenge kuŵa ndi lisungu pa Yerusalemu ndi pa misumba yaku Yuda, yo mungutundiya nayo virimika ivi machumi ghankhonde ndi viŵi (70)?’

¹³ Ndipo Ambuya angumwamuka mungelo yo wakambanga nane mazu gha ulemu ndi ghakusangaruska.

¹⁴ Mungelo wa Ambuya yo wakambanga nane wanguti kwangu, ‘Danirizga uti, Viyo atiti Ambuya ŵa maŵanja: Nde ndi sanje yikuru ndi Yerusalemu ndiso ndi Zioni.

¹⁵ Ndipo nditundiya ukongwa ndi mitundu yakufwasa; chifukwa penipo ndingukaripa kamanavi, iwo ŵangurutizga suzgu.

¹⁶ Chifukwa ichi, atiti Ambuya, Ndawere ku Yerusalemu ndi lisungu; nyumba yangu yizengekenge mwenimo, atiti Ambuya ŵa maŵanja; ndipo chingwe chakupimiya chikatambarukiyanga pachanya pa Yerusalemu.

¹⁷ Danirizga so, uti, Viyo atiti Ambuya ŵa maŵanja, Mizi yangu yiŵenge ndi usakati, ndipo Ambuya asangaruskenge so Zioni ndi kutondo so Yerusalemu.’ ”

Chiwona cha masengwe

¹⁸ Ndipo ndinguyunuska maso ghangu ndipo ndinguwona masengwe ghanayi!

¹⁹ Ndipo ndinguti ku mungelo wa Ambuya yo wangukamba nane. “Ivi ndi vine?” Wangundamuka, “Yagha ndi masengwe gho ghaparghang'a Yuda. Yisraele, ndi Yerusalemu.”

²⁰ Sono Ambuya angundirongo ŵakusula ŵanayi.

²¹ Ndipo ndinguti, “Kumbi yaŵa ŵaza kuzachichitanji?” Wangwamuka, wanguti, “Yagha ndi masengwi gho ghaparghang'a Yuda, viyo kuti kwengavi munthu wakuyinuska mutu wake; ndipo yaŵa ŵaziya kuzachiwawofya; kutaya pasi masengwi gha mitundu yo yingusoska masengwi ghawo pa charu chaku Yuda kuchiparghang'a.”