Zefaniya 3 - Tonga Bible 1986

Ulakwi wa Yerusalemu ndi kutaskika kwake

¹ Soka ku mugaruki, wakukazuzgika, muzi wakusuzga!

² Kuti uvwiya mazu cha, ukana kususkika. Ugomezga mwa Ambuya cha, kuti undere kwaku Chiuta wake cha.

³ Nduna zake mukati mwake ze nge ndi nkharamu yakukoroma; ŵeruzgi ŵake ndi mphumphi za mazulo zo kuti zisiya kanthu cha mpaka ndi mlenji.

⁴ Ŵamchimi ŵake mbanthu ŵakupusika; ŵambura magomekezgeka; ŵazukuru ŵake ŵafipiska malo ghatuŵa, ŵabendezga dangu.

⁵ Ambuya mukati mwawo mbarunji, kuti achita kaheni cha; mlenji wose arongo cheruzgu chawo, pa matandakucha ghe ghose kuti atondeka cha. Kweni ŵambura urunji ŵalivi soni.

⁶ “Ndananga mitundu ya ŵanthu; malinga ghawo ghapasuka. Ndaparghang'a miseu yawo, viyo palivi yumoza watendamo; misumba yawo yapasuka, mulivi munthu, mulivi wakujamo.

⁷ Ndinguti nadi, ‘Wakandiwopanga, wakalondiyanga visambizgu, kuti wakaruwanga cha vyose vyo ndamulanguliya. Kweni kwakuruska ukhumbiska kuvundiska milimu yawo.’

⁸ “Viyo ndilindizgeni,” atiti Ambuya, “mpaka zuŵa lo nkhaŵiyanga nge ndi kaboni. Chifukwa ndaŵika mtima wangu pakuwungang'a mitundu ya ŵanthu, kuwunjika ŵakaronga, kuti ndipunguliye pawo kundundu kangu, chifundizi chose cha ukari wangu; chifukwa mu moto wa kandundu kangu ka sanji charu chose chazamukufya.

⁹ “Pa nyengo yo nding'anamuwenge karongororedu ka ŵanthu kuŵa kamampha, mwakuti wose ŵadanenge pa zina la Ambuya ndi kumuteŵete iyo ndi mtima umoza.

¹⁰ Kutuwa ku sirgha kwa misinji yaku Etiopia ŵasopi ŵangu, ŵakundipenja ŵangu ŵa ŵakuparghanika ŵangu ŵazenge ndi mpasku kwangu.

¹¹ “Mu zuŵa lo kuti ulengeskekenge cha, chifukwa cha nchitu zako zakundigarukiya, chifukwa penipo ndituzgengeko mukati mwako, ŵeniwo ŵakondwa ndi kujikuzga kwako, kuti ŵajithamiyenge so cha mu phiri langu lakupaturika.

¹² Chifukwa ndisiyenge mukati mwako ŵanthu ŵakuzika ndi ŵakujiyuyuwa. Ŵakapenjanga chiphokwelu mu Ambuya.

¹³ Ŵakujako mu Yisraele; kuti ŵachitenge kanthu kaheni cha, pamwenga kukamba utesi, chingana ndi mu mlomo mwawo kuti lisanirikengemo lilime la utesi cha. Chifukwa ŵarghenge ndi kugona pasi, ndipo pakaŵangavi wakuŵawofya.”

¹⁴ Mbani ukongwa imwe, mwa ŵanthu ŵaku Zioni; kamburani mwa ŵaYisraele! Kondwani ndi sekereni ndi mtima wose, imwe mwa ŵanthu ŵaku Yerusalemu!

¹⁵ Ambuya atuzgako vyeruzgu vyakumikana nawe; apong'a kubwalo ŵarwani wako. Karonga waku Yisraele, Ambuya, ŵe mukati mwako; kuti, uwopenge kaheni so cha.

¹⁶ Mu zuŵa lo kukambikenge ku Yerusalemu kuti, “Ungopanga, iwe Zioni; manja ghako ghareke kulopwa.

¹⁷ Ambuya Chiuta wako, we mukati mwako, wanthazi yo wapaska upundi. Wakondwenge paku iwo ndi chimwemwe, wakusanduskenge mufya mu chanju chake.

¹⁸ Wakondwenge ndi iwe ndi kumba, nge mpha zuŵa la dghera.” “Ndituzgengeko phasulu kwako, mwakuti ureke kupinga lilengu chifukwa chake.

¹⁹ Pa nyengo yo ndimarizgenge wose wo ŵatikusuzga. Nditaskenge ŵakuganthiya, ndi kuwunjika ŵakudikiskika, ndipo nding'anamuwenge soni zawo kuŵa marumbu ndi mbiri mu charu chose chapasi.

²⁰ Pa nyengo yo ndikuwezgiyenge kwako, mu nyengo yo ndikuwunjikenge pamoza. Inya ndikuchitenge kuŵa wambiri, ndi wamarumbika mukati mu ŵanthu wose ŵa panu pasi, po ndiwezgiyenge umampha wako paurongo pako,” atiti Ambuya.