Zefaniya 2 - Tonga Bible 1986

¹ Zaninga pamoza, ndi unganani, imwe mtundu wambura soni,

² mwenga mundadikiskike nge ndi mwere wakuputa, wenga undamuziyeni ukari wa Ambuya, lenga lindakuziyeni zuŵa la ukari wa Ambuya.

³ Penjani Ambuya, mose mwa ŵakuzika ŵamu charu, imwe mwachita malangulu ghake; penjani urunji, penjani kuzika; pamwenga mungabisika mu zuŵa la ukari wa Ambuya.

Kuparghanika kwa mitundu yakuzunguriya Yisraele

⁴ Chifukwa Gaza wasandukenge mahame, ndi Ashikeloni wakapasukanga. Ŵanthu ŵaku Ashidodi ŵakatuzgikanga ndi msana, ndi Ekroni wasapulikenge.

⁵ Soka kwaku imwe mwakuja mumphepete mu nyanja, imwe mtundu wa Kerete! Mazu gha Ambuya ghamikana nawe, iwe Kanani, charu cha ŵaFilisti, ndikuparghang'enge mpaka penipo mulive nanga njumoza wakujamo.

⁶ Ndipo imwe vyaru vya mumphepete mu nyanja, muŵenge mauliska; madambo gha ŵaliska ndi makhola gha mberere.

⁷ ŴaYuda ŵakujako ŵaŵenge ndi charu cha mumphepete mu nyanja, kweniko ŵaliskenge vyakuŵeta vyawo, ndipo mu nyumba za Ashikeloni ŵagonenge ndi mazulo. Chifukwa Ambuya Chiuta wawo waŵakumbukenge, ndi kuwezga umampha wawo.

⁸ “Ndavwa kulenga kwaku Moabu ndi kutuka kwa Amoni, mo walenge ŵanthu ŵangu, ndi kujikuzga ku mphaka zawo.

⁹ Chifukwa ichi mo ndilili wamoyo,” atiti Ambuya ŵa maŵanja, Chiuta waku Yisraele, “Moabu waŵenge nge ndi Sodomo, ndi ŵana ŵaku Amoni nge ndi Gomora, charu cha ukasi ndi mazenje gha mche ndi chipululu cha muyaya. Ŵakujako ŵa ŵanthu ŵangu ŵaŵaskoŵenge, ndi ŵakujako ŵa mtundu wangu ŵaŵaŵetenge.”

¹⁰ Ichi ŵaŵenge nacho mu malo ghakujikuzga kwawo, chifukwa ŵadumbizganga ndi kujitumbwiya pa ŵanthu ŵa Ambuya ŵa maŵanja.

¹¹ Ambuya aŵenge akofya kwaku iwo; awondeskenge ŵachiuta wose panu pasi, ndipo kwaku iyo ŵangwadiyenge ŵanthu ŵa mitundu yose mu charu chawo ndi chawo.

¹² Imwe namwe ŵaEtiopia, mubayikenge ndi lipanga langu.

¹³ Wanyoroskiyenge janja lake ku nkhonde, ndi kuparghang'a Asiriya; ndipo wachitsenge Nineve kuŵa chipululu ndi chiparantha nge ndi bozwa.

¹⁴ Ndipo vyakuŵeta vigonenge pasi mukati mwake, vinyama vyose vyamu dondo, nthipita, ndi kataŵa vijenge pachanya pa nchindamila zawo; phururu wambenge pa dangazi, chahole pakuserere; chifukwa milanji yake yakusema yiwiskikenge kubwalo.

¹⁵ Uwu ndi msumba wakujikuzga wo wafwasanga, wo unguti mu mtima wake, “Ine ndiliko, ndipo kulivi munyake pade paku ine.” Nako nkhupasuka uku wapasuka, mphanji ya vikoko! Yose yo wadumuwapo wajuma ndi kupukung'a mutu wake.