Zefaniya 1 - Tonga Bible 1986

¹ Mazu gha Ambuya gho ghanguza kwaku Zefaniya mwana waku Kushi, mwana waku Gedaliya, mwana waku Amariya, mwana waku Hezekiya, mu mazuŵa ghaku Josiya mwana waku Amoni, karonga waku Yuda.

Zuŵa la cheruzgu cha Ambuya

² “Ndimarenge teteti vyose mu charu chapasi,” atiti Ambuya.

³ “Ndimarenge munthu ndi chinyama; ndimarenge viyuni vya mude ndi somba zamu Nyanja. Ndiparghang'enge ŵaheni; nkhatuzgangamo ŵanthu wose mu charu,” atiti Ambuya.

⁴ “Ndinyoroskenge janja langu paku Yuda, ndi paku wose ŵakuja mu Yerusalemu, ndituzgengemo wo ŵeche kusopa Bala mu malo yagha, ndi zina la ŵazukuru ŵakusopa ŵangoza;

⁵ ndi wo ŵasopa pachanya pa nyumba, maŵanja gha kuchanya; ndi wo ŵasopa ndi kurapa ku Ambuya, ndipuuli ŵarapa Milikomu;

⁶ ndi wo ŵawere vuli kutuwako kwa Ambuya, kuti ŵatuŵapenja Ambuya cha chingana nkhuŵafumba iwo.”

⁷ Uje chete paurongo pa Ambuya Chiuta! Chifukwa zuŵa la Ambuya laŵandika; Ambuya arongoso kubaya sembe ndi apatuwa ŵakudanika ŵawo.

⁸ Ndipo kuŵenge kuti, mu zuŵa lakubayiya sembe ya Ambuya, atinge, “Ndirangenge zinduna ndi wana ŵakaronga, ndi wose wo ŵavwara chivwalo chilendo.

⁹ Mu zuŵa lo ndirangenge yose yo wajumpha pa khomo, ndi wo ŵazaza nyumba ya mbuyawo ndi nkhaza ndi utesi.”

¹⁰ “Mu zuŵa lo,” atiti Ambuya, “kukambura kuvwikenge kutuliya ku Likomo la Somba, kutenje kutuliya ku chigaŵa cha chiŵi ndi muswayo kutuliya ku mapiri.

¹¹ Tenjeni, mwakuja mu misika! Chifukwa ŵamaronda wose ŵakumara; wose wo ŵapima siliva ŵakumara.

¹² Pa nyengo yo ndipenjenge mu Yerusalemu ndi nyali; ndi ndirangenge ŵanthu wose wo ŵafwasa pa visika vyawo, wo mu mitima yawo ŵakamba kuti, ‘Ambuya achitenge chamampha cha, pamwenga kuchita chiheni!’

¹³ Vyuma vyawo vikaskowekanga, ndipo nyumba zawo zikapanyukanga. Chingana ŵazenga nyumba kuti ŵajengemo cha, chingana ŵapanda minda ya mphereska kuti ŵamwenge vinyo wawo cha.”

¹⁴ Zuŵa la Ambuya likuru le pafupi, laŵandika, lituza ruŵi; chiwawa cha zuŵa la Ambuya nchakuŵaŵa. Chinkhara chiliyenge ukongwa kwenikuwa.

¹⁵ Zuŵa lo ndi zuŵa la ukari, zuŵa la suzgu, ndi kukweŵeka mtima, zuŵa la phasulu ndi pharghaniko, zuŵa la mdima ndi la munkhorwe, zuŵa la mitambo ndi la mdima bi;

¹⁶ zuŵa la chiwawa cha mbata ndi nkhondo yakulimbana ndi misumba ya malinga, ndi vigongwe vitali.

¹⁷ Ndiŵaziyenge ŵanthu ndi suzgu, mwakuti ŵendenge nge mbachiburumutiya, chifukwa ŵanangiya Ambuya; ndopa zawo zipungulikenge nge ndi fuvu, ndi munofu wawo nge ndi mtawi.

¹⁸ Chingana ndi siliva pamwenga golide wawo kuti viŵenge ndi nthazi cha kuŵataska mu zuŵa la ukari wa Ambuya. Mu moto wa ukari wa sanji yawo, charu chose chifyenge; ndipo amarizgenge ruŵiruŵi wose wo ŵaja mu charu.