Yoswa 5 - Tonga Bible 1986

Ŵanthu ŵachinjika ndi ŵachita phaska

¹ Ŵanguti ŵavwa ŵakaronga ŵa Amori wo ŵenga kusirgha la Yordane ku zambwe, ndi ŵakaronga wose ŵaKanani wo ŵenga kufupi ndi nyanja, kuti Ambuya angukamuska maji ghamu Yordane chifukwa cha ŵaYisraele mpaka po ŵanthu ŵangwambuka, mitima yawo yingusongonoka, ndipo kuti mwawo mwenga umoyo so cha, chifukwa cha ŵaYisraele.

² Pa nyengo yiya Ambuya angunena ndi Yoswa. “Uchite vimayi vya mya ndipo uŵachinje so ŵaYisraele kachiŵi.”

³ Yoswa wanguchita vimayi vya mya wanguchinja ŵaYisraele pa Gibeyate-haraloti.

⁴ Chifukwa chakuti Yoswa waŵachinjiye chenga ichi: ŵanthurumi wose wo ŵangutuwa mu Egipiti, wose ŵakurwa nkhondo, ŵangufwiya mu nthowa mu bozwa ŵanguti ŵatuwa mu Egipiti.

⁵ Nanga wose wo ŵangutuwa ŵanguchinjika, kweni ŵanthu wose wo ŵangupapikiya mu nthowa mu bozwa ŵati ŵatuwa mu Egipiti ŵengavi kuchinjika.

⁶ Pakuti ŵangwenda virimika machumi ghanayi (40) mu bozwa, mpaka penipo mtundu wose, ŵanthurumi ŵankhondo wo ŵangutuwa mu Egipiti, ŵangumara chifukwa ŵengavi kuvwiya mazu gha Ambuya; Ambuya angurapa kwaku wo kuti akaŵazomerezganga cha kuwona charu cho Ambuya angurapiya ku auskeu kutipaska, charu chakutaŵara mukaka ndi uchi.

⁷ Viyo ŵenga ŵana ŵawo, wo ŵanguyuskiya mu malo ghawo, ndiwo Yoswa wanguŵachinja; pakuti ŵengavi kuchinjika pa ulendo wawo.

⁸ Khamu lose linguti lachinjika, ŵangutandara mu malo ghawo mu ugoŵi mpaka penipo ŵanguchila.

⁹ Ndipo Ambuya angunena ndi Yoswa, “Msana wale ndatuzgapo kuwere kwa ŵaEgipiti paku imwe.” Viyo malo ghadanika Gilgala mpaka zuŵa lino.

¹⁰ Po ŵaYisraele ŵenga ŵeche mu ugoŵi ku Gilgala ŵangusunga phaska pa zuŵa la chumi ndi chinayi la mwezi, ndi mazulo mu madambo gha Yeriko.

¹¹ Ndipo ndi mlenji pavuli pa phaska, pa zuŵa leniliya ipo, ŵangurgha vipasi vya charu chiya, makeki ghambura mtupu ndi trigu wakukazinga.

¹² Mana ghangureka ndi mlenji, penipo ŵangurgha vipasi vya charu cho; ndipo ŵaYisraele kuti ŵanguŵa so ndi mana cha, kweni mu chirimika chiya ŵangurgha vipasi vya charu cha Kanani.

¹³ Penipo Yoswa wenga pafupi pa Yeriko, wangusoska maso ghake wangulereska, wanguwona, munthu wanguma paurongo pake, ndi lipanga lakuwewepuwa mu janja lake; ndipo Yoswa wanguruta kwaku iyo wangunena nayo, “Kumbi iwe wendi ifwe, pamwenga weku ŵakupindikana ŵidu?”

¹⁴ Iyo wanguti, “Awa, kweni nde wakulamula wankhondo wa Ambuya ndimu ndaziya.” Ndipo Yoswa wanguwa pasi kavunama, wangusopa, ndipo wangunena nayo, “Nchine cho mbuya walanguliya mteŵeti wake?”

¹⁵ Ŵakulamula wa ŵankhondo wa Ambuya wanguti kwaku Yoswe, “Tuzgako viyato vyako ku marundi ghako; pakuti malo gho wamapo ngakupaturika.” Ndipo Yoswa wanguchita viyo.