Yona 3 - Tonga Bible 1986

Yona wavwiya Ambuya

¹ Ndipo mazu gha Ambuya ghanguza kwaku Yona nyengu yachiŵi ghakuti,

² “Soka, ruta ku Nineve, msumba ukuru uwa, ndipo uwutauliye uthenga wo ine ndikupangizgenge.”

³ Viyo Yona wangusoka, ndi wanguruta ku Nineve, kwakulingana ndi mazu gha Ambuya. Sono Nineve wenga msumba ukuru wakufikapo wa lwendo la mazuŵa ghatatu mu usani.

⁴ Yona wangwamba kusere mu msumba wangwenda lwendo la zuŵa limoza ndipo wangubongo, ndi wanguti, “Kwaja mazuŵa machumi ghanayi (40) pe Nineve wakabwangandulikanga!”

⁵ Viyo ŵanthu ŵaku Nineve ŵangugomezga Chiuta; ndi ŵanguwandiska kufunga kurgha, ndi kuvwala vigudulu, kwamba ku ŵakuzirwa wose mpaka ku ŵambura kuzirwa.

⁶ Mbiri ya mazu yagha yingumufika karonga waku Nineve, ndipo wangusokapo pa chitengo chake ndi wanguzuwa munjilira wake, ndi wangudika chigudulu, ndipo wanguja mu vyoto.

⁷ Ndipo wangulangula kuti kuwandiskike ndi kumemezeke mu Nineve, “Pa langulu la karonga ndi nduna zake kuti: Paulevi chingana ndi munthu chingana ndi nyama, ng'ombe chingana ndi mberere zingalaŵa kanthu cha, zingarghanga cha, chingana nkhumwa maji,

⁸ kweni munthu yose ndi nyama ŵavwale chigudulu, ndipo ŵabongo kwa nthazi kwaku Chiuta; inya, waweko yose ku nthowa yake yiheni, ndi ku nkhaza zo zemu manja ghake.

⁹ Ndiyani waziŵa, pamwenga Chiuta wangagowoka, ndi wangareka, ndi kuweko ku ukari wake wakofya, mwakuti tireke kuyowa?”

¹⁰ Penipo Chiuta wanguwona cho wanguchita, mo ŵangunyongoke ku nthowa yawo yiheni, Chiuta wangugowoka kureka kuchita uheni wo wangunena kuti wachitenge kwaku iwo; ndipo kuti wanguchita cha.