Yohane 8 - Tonga Bible 1986

¹ Kweni Yesu wanguya mu phiri la Olivete.

² Ndi mlenjilenji wanguza so mu kasopi, ndipo khamu lose linguwungana kwaku iyo; ndipo wati waja pasi, waŵasambizganga.

³ Ndipo ŵalembi ndi ŵaFarisi ŵanguza nayo munthukazi wakusanirika pa ureŵi;

⁴ ndipo ŵati ŵamjarika mukati, ŵatiti kwaku Yesu, “Msambizgi, uyu munthukazi wangusanirika pa ureŵi mu kachitidu imu.

⁵ Ndipo mu langulu lidu Mosese wangutilanguliya kumupong'a mya waviyo kuti wafwe. Kweni imwe, na, mutitinji ndi iyo?”

⁶ Kweni ichi ŵakambiyanga kumwesa, alinga ŵaŵe nako kakumsumuwa. Kweni Yesu wangukotama pasi, wangulemba ndi munwi wake pa dongu.

⁷ Kweni ŵachirutiriya kumfumba, wanguyinuka, ndiwangunena nawo, “Mzira-ulakwi mukati mwinu wadange kumpong'a mya.”

⁸ Ndipo wangukotama so pasi, ndi wangulemba pa dongu.

⁹ Kweni iwo, ŵati ŵavwa yagha, wasotopokangamu yumoza-yumoza, kwanda ku ŵara mpaka ku ŵakumariya: Yesu wangusiyika yija, ndi munthukazi yo wakuma mukati.

¹⁰ Ndipo Yesu wanguyunuka ndi wangumfumba, “Wamunthukazi, ŵe pani? Kumbi pengavi yumoza wakukususka?”

¹¹ Iyo wanguti, “Kwengavi, Ambuya,” ndipo Yesu wanguti, “Chingana ndine kuti ndikususka cha. Rutanga, kweni ungalakwa so cha.”]

Yesu ukweru wa charu

¹² Viyo Yesu wangurongoro so nawo, wakuti, “Ine ndine Kungweruka kwa charu: wakurondo ine kuti wakendanga mu mdima cha, kweni waŵenge ndi kungweruka kwa umoyo.”

¹³ Viyo ŵangumnene ŵaFarisi, “Ujisimikizgiya wamweni; iku chisimisimi chako kuti nchakuneneska cha.”

¹⁴ Yesu wangwamuka, wangŵanene, “Chingana ndijisimikizgiya, ndamweni, chisimisimi changu nchakuneneska; pakuti ndiziŵa ko ndikutuwa, ndi ko nditiya; imwe kuti muziŵa ko ndikutuwa, pamwenga ko nditiya cha.

¹⁵ Imwe muteruzga kwakuyana ndi zeru za unthu kuti nditeruzga yumoza cha.

¹⁶ Ndikweni asani ndingeruzga ine, cheruzgu changu nchakuneneska; pakuti kuti nde ndija cha, kweni ine ndi Dada wakundituma.

¹⁷ Inya mu langulu linu kwalembeka, kuti ukaboni waŵanthu ŵaŵi ngwakuneneska.

¹⁸ Ine nditijiŵiya kaboni wa paku Ndamweni, ndipo Dada wakundituma wasimikizga vyapaku ine.”

¹⁹ Viyo ŵamuneniyanga, “Ŵe pani Ausu?” Yesu wangwamuka, “Kuti muziŵa cha chingana ndi ine, chingana mba Ada: asani munguziŵa ine, mphanyi mutiŵaziŵa Ada nawo.”

²⁰ Mazu yagha wangurongoro nawo muchipinda chakusungiya mu ndrama, wachisambizga mu kasopi; ndipo kuti yumoza wangumko cha; pakuti ora lake lengalindaze.

²¹ Wanguŵanene so, “Ine ndiruta, ndipo mundilembenge, mufwenge mu ulakwi winu: kweniko ndita, kuti muziŵa kuzako imwe cha.”

²² Viyo ŵaYuda ŵakambanga, “Kumbi wajibayenge? Pakuti watiti, ‘Ko ine nditiya, imwe kuti muziŵa kuzako cha’?”

²³ Yesu wanguŵanene, “Imwe mwe ŵakutuwa pasi, ine ndi wakutuwa kuchanya; imwe mwe ŵa charu chino; ine kuti nde wa charu chino cha.

²⁴ Ndingukuneniyani kuti mufwenge mu vilakwa vinu: chifukwa asani mureka kuvwana kuti ine ndine iyo, mufwenge mu vilakwa vino.”

²⁵ Iwo ŵamneniyanga, “Iwe ndiwe yani?” Yesu wanguŵanene, “Uli ndimo ndarongorole namwe kutuwa ku chiyambo.

²⁶ Nde navyo vinandi kurongoro ndi kweruzga paku imwe; kweni Wakundituma yo ngwakuneneska; ndipo ine ndirongoro ku charu vyo ndavwa kwaku iyo.”

²⁷ Kuti ŵanguwamo cha kuti waŵaneniyanga ndi Dada.

²⁸ Yesu wanguŵanene, “Penipo mukasoskanga, Mwana wa munthu, ndipo muziŵenge kuti ine ndine iyo ndi kuti kutuwa kwaku Ndamweni kuti ndichita kanthu cha, kweni nge ndimo wandisambizgiya Dada, ndirongoro vyenivi.

²⁹ Ndipo Wakundituma yo we nane pamoza; kuti wandijowo Ndija cha; pakuti nyengo zose ndichita cho chitumkondweska.”

³⁰ Wachirongoro vyenivi, ŵanandi wanguvwana mwaku iyo.

Kuŵa ŵanangwa

³¹ Viyo Yesu wangunena ndi ŵaYuda wo wanguvwana mwaku iyo, “Asani mujaririyenge imwe mu mazu ghagu, nadidi mwe ŵasambizi ŵangu;

³² ndipo muziŵenge uneneska, ndipo uneneska wo usanduskenge imwe ŵanangwa.”

³³ Wangumwamuka, “Te mbeu yaku Abrahamu, ndipo kali kose kuti taŵa ŵaŵanda ku yumoza cha: ukamba uli iwe, ‘Muŵenge ŵanangwa?’ ”

³⁴ Yesu wanguŵamuka, “Nadidi ndikuneneskiyani, yose wakuchita chilakwa, ndi muŵanda wachilakwa cho.

³⁵ Ndipo muŵanda kuti wajaririya mu nyumba muyaya cha: mwana ndiyo wajaririya muyaya.

³⁶ Viyo asani Mwana watimsanduskani ŵanangwa mbwenu muŵengedi ŵanangwa.

³⁷ Ndiziŵa kuti mwe mbeu yaku Abrahamu; kweni mulembe kundibaya, pakuti mazu ghangu ghalive kusaniya malo mwaku imwe.

³⁸ Vyo ndawona ine ku Ada ndi vyo ndirongoro; namwe so muchita vyenivyo mwawona ku auskemwe.”

³⁹ Wangwamuka, wangumnene, “Auskefwe mba Abrahamu.” Yesu waŵanene, “Ne mwenga ŵana ŵaku Abrahamu, mphanyi mwachitanga nchitu zaku Abrahamu.

⁴⁰ Kweni sono mulembe kundibaya, ndamunthu ndamwenini ndarongoro namwe uneneska, wo ndinguvwa kwaku Chiuta: ndipo Abrahamu wengavi kuchichita ichi.

⁴¹ Imwe muchita nchitu za auskemwe.” Wangumwamuka, “Ifwe kuti tapapika mu ureŵi cha, te nayo uskefwe yumoza, ndiyo Chiuta.”

⁴² Yesu wanguŵanene, “Asani Chiuta wenga uskemwe, mphanyi mwandanja ine: chifukwa ine ndaza kutuwa kwaku Chiuta; chifukwa kuti ndikuza mukhumbo laku ine ndija cha, wakundituma ndiyo.

⁴³ Chifukwa chine mureka kuwamu mu kakambidu kangu? Nchifukwa chakuti mulive kuziŵa kughavwa mazu ghangu.

⁴⁴ Imwe mwe ŵa uskemwe diabolo yo, ndipo maulakalaka gha uskemwe ndigho mukhumba kuchita. Iyo wenga mubayaŵanthu kutuwa ku mtendeku, ndipo kuti wendi kanthu ndi uneneska cha, pakuti mulive uneneska mwaku iyo. Po warongoro utesi, warongoro vya umoyo wake: pakuti ndi mtesi ndipo ndi uskeu wa ŵatesi.

⁴⁵ Kweni chifukwa ine ndikamba uneneska, kuti muvwana nane cha.

⁴⁶ Njani wamwaku imwe yo watindipacha ndi ulakwi? Asani ndirongoro uneneska, chifukwa chine mureka kuvwana mwangu?

⁴⁷ Wakwaku Chiuta watuvwa makambidu ghaku Chiuta: chifukwa chenichi imwe kuti mutughavwa cha, chifukwa kuti mwe ŵakwaku Chiuta cha.”

Yesu ndi Abrahamu

⁴⁸ ŴaYuda ŵangwamuka ndi ŵangumnene, “Asi tikamba kwakurunjika kuti we muSamaria iwe, ndipo we ndi demone?”

⁴⁹ Yesu wangwamuka, “Kuti nde ndi demone cha, nditumbika Ada, imwe ndimwe muyuyuwa ine.

⁵⁰ Ine kuti ndipenja unkhankhu wangu cha: walipo wakuwupenja ndi wakweruzga.

⁵¹ Nadidi ndikuneneskiyani, asani yumoza wangasunga mazu ghangu, kuti wamuwona nyifwa cha.”

⁵² Ŵangumnene ŵaYuda, “Sono tiziŵiska kuti we ndi demone. Abrahamu wakufwa ŵamchimi ŵakufwa, kweni iwe utiti, ‘Asani yumoza wangasunga mazu ghangu, kuti wamkwesa nyifwa cha muyaya!’

⁵³ Kumbi iwe we mraku ku Auskefwe Abrahamu, mweniyo wakufwa? Ndi ŵamchimi wo ŵakufwa utijisanduska kuŵa yani?”

⁵⁴ Wangwamuka Yesu, “Asani ine nditijikankhuska unkhankhu wangu kuti nkhanthu cha; Ada mbakundikankhuska; wo imwe munena, kuti ndi Chiuta winu;

⁵⁵ ndipo kuti mwaŵaziŵa cha; kweni ine ndituŵaziŵa, asani ndinganena kuti ndirive kuŵaziŵa ndiŵenge wakukozgana ndi imwe, mutesi, kweni ndituŵaziŵa, ndipo ndisunga mazu ghawo.

⁵⁶ Abrahamu, auskwemwe, wangukondwere kuliwona zuŵa langu; wanguliwona, ndipo wangusekere.”

⁵⁷ ŴaYuda ŵangumnene, “Ndasono undaŵe ndi virimika machumi ghakhonde ndipo kumbi ukumuwona Abrahamu?”

⁵⁸ Wanguŵanene Yesu, “Nadidi ndikuneneskiyani, wenga wandawe Abrahamu, ine ndiriko.”

⁵⁹ Viyo ŵangusoska mya kuti ŵampong'e: kweni Yesu wangubisama, ndipo wangutuwako ku kasopi.