Yohane 20 - Tonga Bible 1986

Chiyuka chaku Yesu ku nyifwa

¹ Kweni pa zuŵa lachimoza la Sabata Mariya waku Magdala watuŵa ku kuunda ndi mlenjulenji, po kwenga kweche mdima, ndipo wanguwona mwa watuzgikako ku muunda wo.

² Wanguchimbiya kuza kwaku Simoni Petro ndi ku msambizi munyake, mweniyo Yesu wamwanjanga, “Watuzgamo Ambuya mumuunda wo, wanena nawo, ndipo kuti tiziŵa cha po ŵaŵaŵika.”

³ Viyo wangutuwa Petro, ndi msambizi munyake yo, ŵanguna ku muunda.

⁴ Wo ŵaŵi ŵachimbiriyanga pamoza: kweni msambizi munyake yo wanguchimbiya kwakurutiriya Petro, ndipo wangudanjiriya ku muunda wo;

⁵ pakulingirizgamo ŵawona saru za bafuta zakurarikikapo: ndikweni kuti wanguseremo cha.

⁶ Watuza Simoni Petro, wakumrondo, wangusere mu muunda, wanguwona zabafuta zakurarikika,

⁷ ndichakuleske, cho chenga pa mutu pake, charkurarikika pamoza ndi zabafuta cha, kweni chakupeteka pade pakuchija.

⁸ Viyo so wanguseremo msambizi munyake nayo, yo wangudanga kufika ku muunda, ndipo wanguwona, ndi wanguvwana.

⁹ Chifukwa ndipo wenga ŵandaziŵe lembo lo lakuti kungumwenere kuyuka ku ŵakufwa.

¹⁰ Viyo ŵasambizi ŵanguwere so kwako.

Yesu wawoneka kwaku Mariya Magdala

¹¹ Kweni Mariya wamanga ku muunda kubwaro, wakuliya: ndipo wachitenje wanguŵerama kulingirizgamo mu muunda wo;

¹² ndipo wanguwona ŵangelo ŵaŵi ŵakuvwara vituŵa wakujapo, yumoza kuchiri ku marundi, po lingura thupi laku Yesu.

¹³ Ndipo yaŵa wangunena nayo, “Wamunthukazi, uliyanji?” Waŵanene, “Pakuti ŵamtuzgamo Mbuyangu, ndipo kuti ndiziŵa cha ko ŵamuŵika.”

¹⁴ Wanguti wakamba viyo, wangung'anamukiya kuvuli, ndipo wangumuwona Yesu wakumapo, kweni wengavi kuziŵa kuti ndi Yesu.

¹⁵ Yesu wanena nayo, “Munthukazi we, uliyanji? Upenja yani?” Iyo, pakupima kuti ndiyo mweni-munda, wanena nayo, “Bwana, asani ndiwe wamunyamuwamo, ndinene po wamuŵika, nkhamtuzgepo.”

¹⁶ Yesu wanena nayo, “Mariya!” Pakung'anamuka iyo wanena nayo mu chiHebere, “Raboni!” Ko nkhuti, Msambizgi.

¹⁷ Yesu wanena nayo, “Reka kundiko, chifukwa ndindakwere ku Ada; kweni kanga ku ŵabali ŵangu, kaŵanene, ndikwere ku Ada Auskemwe, kwaku Chiuta wangu ndi Chiuta winu.”

¹⁸ Mariya Magdala wanguza kuŵanene ŵasambizi, “Ndaŵawona Ambuya”; ndipo wanguŵanene vyo Ambuya angumunene.

Yesu wawoneka ku ŵasambizi ŵake

¹⁹ Viyo kwati kwaŵa mazuru, pa zuŵa liya lachimoza la sabata, penipo visasa vingujarika mo mwenga ŵasambizi, chifukwa cha kopa ŵaYuda wanguza Yesu, wanguma mukati mwawo wangunena nawo, “Chimangu chikuŵiyeni!”

²⁰ Ndipo wachikamba chenichi, wanguŵarongo manja ghake ndi liŵaghara lake. Viyo ŵangukondwere ŵasambizi wo, ŵachiŵawona Ambuya.

²¹ Yesu wanguŵanene so, “Chimangu chikuŵiyeni! Mo Dada wanditumiya ine, nane so ndikutumani.”

²² Ndipo wati wakamba ichi, wanguŵauziriya wanguti kwaku wo, “Rondeni Mzimu Wakupaturika.

²³ Asani mungaŵareke vilakwa vya ŵanyake, viŵarekekiyenge; ne mukhozga vya ŵanyake, vikakhozgekanga.”

Yesu ndi Tomase

²⁴ Kweni Tomase, yumoza wa chumi ndi ŵaŵi wo, wakuzumbulika Didumo, pengavi pamoza nawo penipo wanguza Yesu.

²⁵ Viyo ŵasambizi ŵanyake wangumnene, “Taŵawona Ambuya!” Kweni iyo wanguŵanene, “Kwambura kuti ndawona mu manja ghake mabamba gha mizumali yo, ndi kuweskamo munwi wangu mo mizumali yingukhomeka, ndi kuŵika janja langu mu liŵaghara lake, kuti nkhavwananga cha.”

²⁶ Ndipo pavuli pa mazuŵa ghankhonde ndi ghatatu ŵasambizi ŵake ŵenga mwenimo so, ndi Tomase pamoza nawo. Wanguza Yesu vyati vyajarika visasa vyo, ndipo wanguma mukati mwawo, wanguti, “Chimangu chikuŵiyani.”

²⁷ Sono wanena ndi Tomase, “Hanawo kuno munwi wako, ndi lereska manja ghangu; hanalo janja lako, ŵika mu liŵaghara langu: ndipo ungaŵangu wambura kuvwana cha, kweni wakuvwana.”

²⁸ Wangwamuka Tomase, wangunena nayo, “Ambuyangu ndi Chiuta wangu!”

²⁹ Yesu wanena nayo, “Kumbi wavwana, chifukwa wandiwona? Mbamwaŵi wo ŵavwana wenga wandandiwone.”

³⁰ Viyo visimikizgu vinyake vinandi wanguchita Yesu pa maso pa ŵasambizi ŵake, vyenivyo virive kulembeka mu buku lenili.

³¹ Kweni vyenivi vyalembeka, alinga kuti muvwane kuti Yesu ndiyo Kristu, Mwana waku Chiuta: ndikuti mwaŵakuvwana muŵendi umoyo mu zina lake.