Yohane 2 - Tonga Bible 1986

Nthengwa yaku Kana waku Galile

¹ Pa zuŵa lachitatu kunguŵa nthengwa ku Kana wa Galile, ndipo anyina ŵaku Yesu ŵenga kweniko;

² ndipo Yesu wangudanika nayo, pamoza ndi ŵasambizi ŵake, ku nthengwa yo.

³ Ndipo wachipereŵe vinyo, anyina ŵaku Yesu ŵangumnene, “Walive vinyo.”

⁴ Wamnene Yesu, “Ungandineniyanga cha cho nditenere kuchita, munthukazi we? Ora langu lindaze.”

⁵ Anyina ŵangunene ŵateŵete, “Chenicho chose wangamneniyani imwe, chitani.”

⁶ ŴaYuda ŵendi dangu la kusamba kwakulingana ndi chisopa chawo, chifukwa ichi kungujarikika kuwa misuku ya mya yinkhonde ndi umoza, yikuru yakuzaza maji ankhumba myesu yinayi umoza ndi umoza.

⁷ Yesu waŵanene, “Zazani misuku yo ndi maji.” Ndipo wanguyizaza fwa.

⁸ Ndipo waŵanene, “Pumphani sono, ndipo mtoleni mkombo-dghera.” Ndipo ŵangumtole.

⁹ Ndipo wachilaŵa mkombo-dghera maji gho ghangusanduka vinyo, ndi wengavi kuziŵa ko wangutuwa (kweni ŵateŵeti pe ŵeniwo ŵangupumpha maji ndiwo ŵaziŵanga), mkombo-dghera wangudana mweninthengwa,

¹⁰ ndipo wamnene, “Munthu yose wajarikapo danga vinyo wamampha; ndipo penipo ŵamwapo, sono watuŵa wakusukuruka; kweni iwe wasunga vinyo wamampha mpaka sono.”

¹¹ Ichi nchiyambo cha visimikizgu vyo wanguchita Yesu mu Kana wa Galile, wangurongo unkhankhu wake; ndipo ŵasambizi ŵake ŵanguvwana mwaku iyo.

¹² Pavuli paku ichi wangusikiya ku Kapernaumu, iyo ndi anyina, ndi ŵahurwa ŵake, ndi ŵasambizi ŵake; ndipo ŵangutandara kweniko mazuŵa ghamanavi.

Yesu wata ku kasopi

¹³ Ndipo laŵandikanga dghera la phaska la ŵaYuda, Yesu wangukwere ku Yerusalemu.

¹⁴ Ndipo wangusaniya mu kasopi ŵakusaska ng'ombe, mberere, ndi nkhunda, ndi ŵakusintha ndrama ŵakutekapo.

¹⁵ Ndipo wati waposa likwechu la vikondu, wanguŵadika wose mu kasopi yo, ndi mberere nazo ndi ng'ombe; ndipo wanguda ndrama zaŵakusintha ndrama, ndi magome ghawo wangugadabuwa;

¹⁶ ndipo ku ŵakusaska nkhunda wanguti, “Tuzganimo muno ivi? Mungayisanduska nyumba ya Ada nyumba ya maronda cha.”

¹⁷ Ndipo ŵasambizi ŵake ŵangukumbuka kuti kungulembeka, “Rwana la nyumba yinu lindirghenge.”

¹⁸ Viyo ŵaYuda ŵangumwamuka ŵangumunene, “Utirongo chisimikizgu nichi, po uchita vyenivi?”

¹⁹ Wangwamuka Yesu wanguŵanene, “Bwanganduwani kasopi uyu, ndipo mu mazuŵa ghatatu ndimuyuskenge.”

²⁰ ŴaYuda viyo ŵanguti, “Virimika machumi ghanayi pachanya vinkhonde ndi chimoza (46) kasopi uyu wenga weche kuzengeka, ndipo kumbi umuyuskenge iwe mu mazuŵa ghatatu?”

²¹ Kweni iyo wakambanga vya kasopi wa liŵavu lake.

²² Viyo penipo wanguyuskika ku ŵakufwa ŵasambizi ŵake ŵangukumbuka kuti wangukamba chenichi; ndipo ŵanguvwana mu lembo lo, ndi mu mazu gho Yesu wangukamba.

²³ Ndipo penipo wenga mu Yerusalemu pa phaska, ŵanandi ŵanguvwana mu zina lake, ŵachithoŵa visimikizgu vyo wachitanga.

²⁴ Kweni Yesu mwenecho wengavi kujigomekezge kwaku wo,

²⁵ chifukwa iyo wanguziŵa wose, ndipo kuti wangukavuka cha kuti yumoza wasimikizge pa munthu; chifukwa mwenecho waziŵanga cho chenga mu munthu.