Yohane 11 - Tonga Bible 1986

Nyifwa yaku Lazaro waku Betaniya

¹ Kwenga murwali yumoza, Lazaro waku Betaniya, ku muzi waku Mariya ndi Marta, mkuwake.

² (Mariya uyu ndiyo wangupunguliya mafuta ghachema pa marundi gha Ambuya ndi kughareska ndi sisi lake; mwenuyu ndiyu mzichi waku Lazaro watamanga.)

³ Viyo ŵazichi wo ŵangutuma kwaku iyo, ŵakuti, “Ambuya bwezi linu lapa mtima watama.”

⁴ Wanguti wavwa Yesu, wanguti, “Urwali uwu kuti ngwa ku nyifwa cha, kweni ngwa pa chifwa cha unkhankhu waku Chiuta, alinga kuti Mwana waku Chiuta wakankhuskike chifukwa chaku wo.”

⁵ Yesu wanguŵanja Marta, ndi mhurwa wake, ndi Lazaro.

⁶ Viyo po wanguvwa kuti watama, wanguja so mazuŵa ghaŵi ku malo kwenikuwa wenga.

⁷ Ndipo pavuli wanguti ku ŵasambizi, “Tiyeni tiwerenge so ku Yuda.”

⁸ Ŵamnene ŵasambizi, “Msambizi, sono yapa ŵaYuda ŵalembenga kukubayani, ndipo mutiyako so?”

⁹ Yesu wangwamuka, “Asi kwe maora chumi ndi ghaŵi mu msana? Asani munthu watendandi msana, kuti wanguŵa cha, pakuti walereska kungweruka kwa charu chinu.

¹⁰ Kweni asani munthu watenda ndi usiku, waguŵa, pakuti mulive mwake ukweru.”

¹¹ Vyenivi wangukamba: ndipo pavuli watiti kwaku wo, “Lazaro, bwezi lidu, wara tulo; sono ndiruta alinga kuti ndikamuyuske ku tulo.”

¹² Viyo ŵangumnene ŵasambizi, “Ambuya, asani wara tulo, wayukenge.”

¹³ Kweni Yesu wangukamba ndi nyifwa yake: po iwo ŵangupima kuti wakamba ndi chipumulo cha tulo.

¹⁴ Viyo Yesu wanguŵanene pakweru, “Lazaro wakufwa.

¹⁵ Ndipo ndikondwere chifukwa chinu pakuti ine ku Betaniya kuti ndaŵako cha, alinga kuti muvwane; kweni tiyeni tikenge.”

¹⁶ Viyo Tomase, wakuzumbulika Didumo, wanguŵanene ŵasambizi ŵanyake, “Tikenge nafwe so, kuti tikafwiye pamoza nawo Ambuya.”

¹⁷ Viyo wati waza Yesu, wangusaniya kuti Lazaro we mu muunda mazuŵa ghanayi.

¹⁸ Betaniya wenga kufupi ndi Yerusalemu, akhumba mitunda yiŵi,

¹⁹ ndipo ŵanandi ŵa ŵaYuda ŵanguza kwaku Marta ndi Mariya, kuti ŵaŵasanguruske pa nyifwa ya mzichi wawo.

²⁰ Viyo Marta, po wanguvwa kuti Yesu watuza, wangutuwa kwachikumana nayo; kweni Mariya wangujavi mu nyumba.

²¹ Marta wanguti kwaku Yesu, “Asani mwenga panu Ambuya, mphanyi mzichi wangu kuti wakufwa cha.

²² Ndipo chingana ndi sono ndiziŵa kuti, vyo vyose mungampempha Chiuta, Chiuta wakupaskeninge.”

²³ Wamnene Yesu, “Wayukenge so mzichi wako.”

²⁴ Wamnene Marta, “Ndiziŵa kuti wayukenge so mu chiyuka cho cha mu zuŵa lakumariya.”

²⁵ Wangumnene Yesu, “Ine ndine Chiyuka ndi Umoyo; wakuvwana mwaku ine, chingana wangafwa, waŵenge wamoyo,

²⁶ ndipo yose wamoyo ndi wakuvwana mwaku ine kuti wakafwanga cha muyaya. Kumbi uvwana mwaku ichi?”

²⁷ Wamnene, “Inya, Ambuya, ine ndavwana kuti imwe mwe Kristu, Mwana waku Chiuta, yo watuza mu charu.”

Yesu waliya

²⁸ Wati wakamba ichi Marta wanguruta ndi wangudana Mariya, mhurwa wake, ku udeke, wakuti, “Msambizgi we panu, watukudana.”

²⁹ Mariya wati wavwa, wangusoka ruŵi, wanguza kwaku iyo.

³⁰ (Ndipo Yesu wengawandasere mu muzi, kweni wenga weche ku malo ko Marta wangukumana nayo.)

³¹ Viyo ŵaYuda wo ŵenga pamoza nayo mu nyumba, kumsanguruska, ŵachiwona kuti Mariya wasoka ruŵi ndi kutuliya kubwaro, wangumrondo pakughanaghana kuti wayanga ku muunda kwachitenje kweniko.

³² Viyo Mariya, po wanguza kwaku Yesu, wachimuwona, wanguwa pasi pa marundi ghake, wakumnene, “Ambuya, asani mwenga panu, mphanyi wengavi kufwa mzichi wangu.”

³³ Penipo Yesu wangumuwona wakutenje, ndi ŵaYuda ŵakurongozgana nayo wakutenje, wangukoreka chitima mu mzimu, wangudagha,

³⁴ ndipo wanguti, “Mwamuŵika pani?” Wangumnene, “Ambuya, zani muwone.”

³⁵ Yesu wanguliya.

³⁶ Viyo ŵanenanga ŵa Yuda wo, “Awonani mo wamwanjiyanga!”

³⁷ Kweni ŵanyake ŵaku wo ŵatinge, “Kumbi munthu uyu, yo wangubanuwa maso gha wachiburumutiya yuwa, kuti watinge wachichitenge cha kuti Lazaro wareke kufwa?”

Yesu wamuyuska Lazaro ku nyifwa

³⁸ Viyo Yesu wangusuzgika so ndi chitima mu mtima, wanguza ku muunda; wenga wamphanji, ndipo mwa ungujarikako ku khomo.

³⁹ Watiti Yesu, “Tuzganiko mwa.” Marta, mzichi wa chipondi, waŵanene, “Ambuya, sono wanunkha: chifukwa ngwakufwa mazuŵa ghanayi.”

⁴⁰ Wamnene Yesu, “Asi ndingukunene kuti, asani ungavwana, ukawonanga unkhankhu waku Chiuta?”

⁴¹ Viyo wangutuzgako mwa. Ndipo Yesu wangwinuskiya kuchanya maso ghake, wanguti, “Ada, ndikuwongani kuti mwandivwa.

⁴² Ine ndaziŵanga kuti nyengo zose mutindivwa: kweni pa chifwa cha mzinda wo wama pano ndikamba, alinga kuti ŵavwane kuti imwe mukundituma.”

⁴³ Ndipo wachikamba yagha wangukambura ndi liu likuru, “Lazaro, tuliya kuno kubwaro!”

⁴⁴ Ndipo wakufwa yo wangutuwa, wakufukika zisanda ku marundi ndi manja; ndi chisku chake chingufukika ndi chakuleske. Yesu wanguŵanene, “Mufwatuweni, mrekeni warutenge.”

Ŵazukuru ndi ŵaFarisi ŵapangana kumuko Yesu

⁴⁵ Viyo ŵanandi ŵa ŵaYuda wo ŵanguza kwaku Mariya, wo ŵanguwona cho Yesu wanguchita, wanguvwana mwake.

⁴⁶ Wanyake ŵamwaku wo ŵanguruta ku ŵaFarisi, kuŵanene vyo Yesu wanguchita.

⁴⁷ Viyo ŵazukuru ŵara ndi ŵaFarisi ŵanguungana upu, ndipo ŵafumbananga ŵakuti, “Tichitenji? Uyu munthu wachita visimikizgu vinandi.

⁴⁸ Asani timreka waka viyo wose ŵavwanenge mwaku iyo ndipo ŵakazanga ŵaRoma, ŵazamubwanganduwa malo ghidu ghakupaturika pamoza ndi mtundu widu nawo.”

⁴⁹ Kweni yumoza wamwaku wo, Kayafa, pakuŵa mzukuru mura chirimika chiya, wanguŵanene, “Imwe kuti muziŵa kanthu cha,

⁵⁰ chingana nkhuti muteska cha kuti nkhwamandulika kwaku imwe kuti munthu yumoza walifwiye khamu, mwakuti ureke kuyowa mtundu wose.”

⁵¹ Chenichi kuti wangujikambiya pa mtima waku yija cha, kweni pakuŵa mzukuru mura chirimika chiya, wanguloska kuti Yesu wangwenere kufwiya ŵaYuda?

⁵² Inya pa chifwa cha mtundu wo pe cha, kweni alinga kuti ŵana ŵaku Chiuta ŵakumwaranika waŵaungang'e mu liŵavu limoza.

⁵³ Viyo kwanda ku zuŵa leniliya ŵangupangirana kumubaya.

⁵⁴ Viyo Yesu kuti wendanga so pakweru mu ŵaYuda cha, wangutuwako kuya ku charu chakufupi ku bozwa, ku muzi wakuzumbulika Efraimu; ndipo wanguja kweniko pamoza ndi ŵasambizi.

⁵⁵ Phaska la ŵaYuda lenga pafupi: ndipo ŵanandi ŵaku charu cho Wangukwere ku Yerusalemu, lenga lindafike Phaska alinga kuti ŵajitoweske.

⁵⁶ Viyo ŵamlembenge Yesu, ndipo ŵanenerananga, ŵachima mu kasopi, “Murunguruka uli? Kumbi warekenge kuza ku dghera?”

⁵⁷ Kweni ŵazukuru ŵara ndi ŵaFarisi ŵangulanguliya ŵanthu, kuti, asani yumoza wangaziŵa po wangaŵa ŵatenere kukamba alinga kuti ŵamko.