Yohane 10 - Tonga Bible 1986

Ntharika ya mliska wa mberere

¹ “Nadi, nadi ndikuneneskiyani, yo wareka kuserere pa khomo mu likutu la mberere, kweni wakwere kunyake, mweniyo ndi munkhungu ndi wakuphananga.

² Kweni wakuserere pa khomo ndi mliska wa mberere.

³ Wakusunga pa khomo watimujuriyako iyo; ndipo mberere zo zituvwa liu lake wachizidana mazina mberere zapa mtima wake; ndipo watizirongozge kubwaro.

⁴ Penipo watuzga zose, waruta paurongo paku zo, ndipo mberere zimrondo; pakuti ziziŵa liu lake.

⁵ Kweni mlendo kuti zimrondonge cha, zimthaŵenge: pakuti liu la ŵalendo kuti ziziŵa cha.”

⁶ Ntharika iyi wanguŵakambiya Yesu; kweni iwo kuti ŵanguwamu cha gho warongoronga nawo.

Yesu mliska wamampha

⁷ Viyo Yesu wanguŵanene so, “Nadidi ndikuneniyani, ine ndine khomo la mberere.

⁸ Wose wo ŵanguza paurongo pangu mbankhungu ndi ŵakuphanga; ndipo mberere kuti zinguŵavwa cha.

⁹ Ine ndine khomo lo: asani yumoza waserere mwaku ine, wataskikenge, ndipo waserengemu ndi watuwengemu, ndipo wasaniyenge chipozwa.

¹⁰ Munkhungu yo waziyamo kuti, wabe, wabaye, ndi wanange: ine ndinguza kuti ŵaŵe ndi umoyo, ndikuti ŵaŵe nawo kwakuzungura.

¹¹ Ine ndine nliska mweneko; mliska mweneko waŵikiya pasi umoyo wake chifukwa cha mberere.

¹² Yo ngwamphotu, pakuŵa mliska cha, ndi pakuŵavi zapa mtima wake mberere zo, wawona mphumphi yichiza, ndipo watuzijowo mberere, wathaŵa, ndipo mphumphi yo yituzukwamphuwa, ndi kuziparang'a.

¹³ Wathaŵa chifukwa ngwamphotu, ndipo kuti watiziphwere mberere zo cha.

¹⁴ Ine ndine mliska mweneko.

¹⁵ Nge ndimo ŵatindiziŵiya Ada, ine nane ndituŵaziŵa iwo; viyo so ndimu ndiziŵiya mberere zangu, ndipo sangu ziziŵa ine; chifukwa ichi ndiŵika pasi umoyo wangu pa chifwa cha mberere zo.

¹⁶ Ndipo nde nazo mberere zinyake, zo kuti ze za likutu lenili cha; zenizo nazo ine ndizitonge ndipo zivwenge liu langu. Viyo ziŵenge mskambu umoza, mliska yumoza.

¹⁷ Chifukwa chenichi Dada watindanja, pakuti ndiŵika pasi umoyo wangu, alinga kuti ndiwutonge so.

¹⁸ Palive yumoza wati wukwamphuwa kwaku ine, kweni ndiwuŵika pasi ine ndameni. Mtufu nde nawo kwachiwuŵika pasi, ndipo nde ndimtufu kwachiwuto so. Langulu lenili ndinguronde ku Ada.”

¹⁹ Chifukwa cha mazu yagha kunguŵapo so gaukanu mu ŵaYuda.

²⁰ Wanandi mwaku wo ŵanenanga, “We ndi demone, wakufuntha; chifukwa chine mutumuvwa?”

²¹ Wamwenga ŵanguti, “Makambidu yagha kuti nga wakuŵa ndi demone cha. Kumbi demone ngwathazi kujura maso gha wachiburumutiya?”

²² Ndipo yingufika nyengo ya dghera la chiphoto mu Yerusalemu: kwenga chipwepwe;

²³ ndipo Yesu wendanga mu kasopi, mu khondi laku Solomone.

²⁴ Viyo ŵaYuda ŵangumzingiriya, ndipo ŵangumfumba, “Mpaka zuŵanji utisoronge mtima? Asani ndiwe Kristu, utinene pakweru.”

²⁵ Yesu wanguŵamuka, “Ndakuneniyani, ndipo kuti muvwana cha; nchitu zo ndichita ine mu zina la Ada, zenizo zitindisimikizgiya;

²⁶ kweni kuti muvwana cha imwe, chifukwa kuti mwe ŵamu mberere zangu cha.

²⁷ Mberere zangu zituvwa liu langu, ine nditiziziŵa, ndipo zitindirondo;

²⁸ Ine nditizipaska umoyo wamuyaya; kuti zikafwanga cha, ndipo kuti yumoza wazikwamphuwenge mu janja langu cha.

²⁹ Ada wo ŵakuzipaska kwaku ine mbara ndi wose; ndipo kuti yumoza ngwanthazi cha kuzikwamphuwa mu janja la Ada.

³⁰ Ine ndi Ada te ŵamoza.”

³¹ ŴaYuda ŵangusoska so mya, kuti ŵampong'e.

³² Yesu wanguŵamuka, “Nchitu zinandi zeneko ndakurongoni zakutuwa ku Ada; chifukwa cha nchitu yakutinji yaku zo mutindipong'e mya?”

³³ Ŵangumwamuka ŵaYuda, “Kuti tikupong'a mya chifukwa cha nchitu yamampha cha, kweni pa chifwa cha utusi, ndi so pakuti iwe, pakuŵa munthu, uzisanduska Chiuta.”

³⁴ Yesu wangwamuka, “Asi kwalembeka mu langulu linu, ‘Ndinguti, mwe ŵaChiuta’?

³⁵ Tiziŵa kuti cho malemba nchakuneneska muyaya; ŵanguŵazumbuwa iwo ŵachiuta. Ŵanthu, kwaku ŵeniwo ghanguziya mazu ghaku Chiuta.

³⁶ Nge mkhwaku ine, Ada akundisankha ndi kundituma mu charu. Na mukamba uli imwe kuti, ‘Ndituka Chiuta’ pakuti ndinguti, ‘Ndine Mwana waku Chiuta’?

³⁷ Asani nadi ndireka kuchita nchitu za Ada, mungavwananga mwangu cha.

³⁸ Kweni asani ndizu ndichita, chingana mureke kuvwaniya mwangu, vwaniyani mu nchitu so; alinga kuti muziŵe ndi kufikapo mtima kuti Dada we mwaku ine, ndi ine mu Dada.”

³⁹ Wangulembe so kumko; ndipo wangufwanthamuka mu manja gha wo.

⁴⁰ Ndipo wanguya so kusirgha la Yordane, ku malo ko Yohane wabatizanga, ndipo wanguja kweniko.

⁴¹ Ndipo ŵangumziya ŵanandi; ndipo ŵakambanga, “Yohane wengavi kuchita chisimikizgu: kweni vyose vyo Yohane wangukambiya paku uyu munthu, vyenga vyakuneneska.”

⁴² Ndipo ŵanandi kwenikuwa ŵanguvwana mwaku iyo.