Yohane 1 - Tonga Bible 1986

Mazu gha umoyo

¹ Mu mtendeku mwenga Mazu, ndipo Mazu yo wenga kwaku Chiuta, ndi Mazu yo wenga Chiuta.

² Mweniyo wenga mu mtendeku kwaku Chiuta.

³ Vyose vingulengeke mwaku iyo; ndipo kwambura iyo kuti kangulengeka cha chingana nkhanthu kamoza ko kaŵapo.

⁴ Mwaku iyo mwenga umoyo, ndipo umoyo wo wenga kungweruka kwa ŵanthu.

⁵ Kungweruka ko kuŵala mu mdima; ndipo mdima wo wengavi nthazi kujara kungweruka ko.

⁶ Kunguŵa munthu, wakutumika ndi Chiuta, zina lake Yohane.

⁷ Iyo wanguziya ku simikizga, alinga wasimikizge Kungweruka ko, kuti wose ŵavwaniyenge mwaku iyo.

⁸ Kuti iyo wenga kungweruka ko cha, kweni wanguzachisimikizga Kungweruka ko.

⁹ Kungweruka kwenecho, kwakungweruska munthu yose kwazanga mu charu.

¹⁰ Wenga mu charu, charu chingwatika ndi iyo, kweni charu chengavi kumziŵa.

¹¹ Wanguza ku ŵake, ndipo wo ŵake kuti ŵangumronde cha.

¹² Kweni wose wo ŵangumronde ŵakuvwaniya mu zina lake wanguŵapaska mtufu wakwachiŵiya ŵana ŵaku Chiuta;

¹³ wo ŵangupapika, ku kaŵiro ka kunthu cha pamwenga ko khumbo la munthu, kweni kwaku Chiuta.

¹⁴ Ndipo Mazu yo wanguŵa munthu, ndipo wajanga mwaku ifwe wakuzala wezi ndi uneneska; ndipo tinguthoŵa unkhankhu wake, unkhankhu nge ngwa wakuwayija ku Dada.

¹⁵ (Yohane wasimikizga vya paku iyo, ndipo wabongo, kuti, “Ndiyo ndingukamba, ‘Mweniyo watuza kulivi kwangu waŵa paurongo pangu: pakuti wenga wakudanga ndi ine.’ ”)

¹⁶ Pakuti wapaska wezi kwaku ifwe tose rutaruta kutuwa ku uzari wake.

¹⁷ Pakuti langulu lo lingupaskikiya mwaku Mosese, wezi ndi uneneska vinguziya mwaku Yesu Kristu.

¹⁸ Palive yumoza yo kali kose wamuwona Chiuta, Mwana yo wakuwayija, yo ngwamu chipakatu cha Dada, ndiyo wamvumbuwa.

Uthenga waku Yohane Mbatizi

¹⁹ Ndipo chenichi nchisimisimi chaku Yohane, penipo ŵaYuda ku Yerusalemu ŵangutuma ŵazukuru ndi ŵaLevi kuti ŵakamfumbe, “Iwe ndiwe yani?”

²⁰ Wanguzomera, kuti wangukana cha; wanguzomera, kuti, “Ine kuti ndine Kristu cha.”

²¹ Ŵangumfumba, “Na uli? Kumbi ndiwe Eliya?” Ndipo wali, “Kuti ndine iyo cha.” “Kumbi ndiwe mchimi?” Ndipo wangwamuka, “Awa!”

²² Viyo wangumfumba, “Ndiwe yani? Alinga tipaske kwamuka ku ŵakutituma. Utitinji ndi wamweni?”

²³ Wanguti, “Ndine mazu gha wakukambura mu bozwa, ‘Nyoroskani nthowa ya Ambuya, uli ndimo wangunene Yeseya mchimi yo.’ ”

²⁴ Ndipo ŵakutumika wo ŵenga ŵamu ŵaFarisi.

²⁵ Ndipo wangumfumba, “Na ubatiziyanji asani iwe kuti ndiwe Kristu cha, chingana ndi Eliya chingana ndi mchimi yo?”

²⁶ Yohane wanguŵamuka, wakuti, “Ine ndibatiza ndi maji: kweni mukati mwinu watuma yo mulive imwe kumziŵa,

²⁷ yo ngwakuza pavuli pangu, nthambo za chiyatu chaku mweniyo nde wambura kwene ine kufwatuwa.”

²⁸ Ivi vinguŵapo mu Betaniya kusirgha ku Yordane, kweniko Yohane wabatizanga.

Mwana-mberere waku Chiuta

²⁹ Ndi mlenji wawona Yesu wachiza kwaku iyo, ndipo watiti, “Awonani, Mwana-mbere waku Chiuta, yo watuzgapo ulakwi wa charu!

³⁰ Mweniyo ndi yo ine ndakambanga kuti, ‘Kuvuli kwangu watuza munthu, mweniyo waŵa paurongo pangu, pakuti wenga wakudanga ndi ine.’

³¹ Ine kuti ndingumziŵa cha; kweni alinga kuti warongoleke kwaku Yisraele, chifukwa chenichi ndikuziya ine wakubatiza ndi maji.”

³² Ndipo wangusimikizga Yohane, wakuti, “Ndinguwona Mzimu wakusoromoka kuchanya nge ndi nkhunda, unguja paku iyo.

³³ Ine nane kuti ndingumziŵa cha: kweni yo wangudituma kwachibatiza ndi maji, ndiyo wangundinene, ‘Paku mweniyo ungawona Mzimu kusoromoka ndi kuja pake, mweniyo ndiyo wabatiza ndi Mzimu Wakupaturika.’

³⁴ Ndawona ine, ndipo ndasimikizga kuti Mwenuyu ndi Mwana waku Chiuta.”

Ŵasambizi ŵakudanga ŵaku Yesu

³⁵ Ndi mlenji wapavuli wanguma so Yohane, ndi ŵaŵi ŵa ŵasambizi ŵake,

³⁶ ndipo wachilereska dodoli paku Yesu wachenda, watiti, “Awonani, MwanaMberere waku Chiuta!”

³⁷ Ndipo wasambizi wo ŵaŵi ŵanguti ŵamuvwa wachirongoro, ŵangumrondo Yesu.

³⁸ Ndipo Yesu, wati wang'anamuka, ndi kuŵawona ŵakumrondo, watiti kwaku wo, “Mulembenji?” Iwo ŵangumnene, “Rabi” (cho chititi pakung'anamuka, Msambizgi), “muja pani?”

³⁹ Watiti kwaku wo, “Zani muwone.” Viyo ŵanguza, ndipo ŵanguwona po wajanga, ndipo ŵanguja pamoza nayo zuŵa lenilo; kwenga nge mpha ora lachichumi.

⁴⁰ Yumoza waku wo ŵaŵi wakuvwa kwaku Yohane ndi wakumrondo Yesu, wenga Andreya, mhurwa waku Simoni Petro.

⁴¹ Mweniyo po wanguti wasaniya danga mkuwake Simoni, wangumnene, “Tamsaniya Mesiya” (cho cing'anamuwa Kristu).

⁴² Wangumtole kwaku Yesu, wati wamthoŵa Yesu wanguti, “Ndiwe Simoni, mwana waku Yohane: iwe udanikenge Kefa” (cho ching'anamuwa Petro).

Yesu wadana Filipu ndi Natanaele

⁴³ Ndi mlenji wangukhumba Yesu kuruta ku Galile, ndipo wangusaniya Filipu: wangumnene, “Rondo ine!”

⁴⁴ Kweni Filipu yo wenga waku Betesaida, ku muzi waku Andreya ndi Petro.

⁴⁵ Filipu wangusaniya Natanaele, wangumnene, “Tamsaniya yo Mosese wangulemba pake mu langulu ndi so ŵamchimi, Yesu waku Nazarete, mwana waku Yosefe.”

⁴⁶ Natanaele wangumnene, “Ku Nazarete kungatuwa kanthu kamampha nthu?” Filipu wamunene, “Zanga uziwone.”

⁴⁷ Yesu wangumuwona Natanele wachiza kwake, wanguti kwaku iyo, “Awonani, muYisraele nadi, mwaku mweniyo mulive urghargha!”

⁴⁸ Natanaele watiti kwaku iyo, “Mundiziŵiya pani?” Wangwamuka Yesu, ndi wangumnene, “Wenga wandakudane Filipu, weche msina mu mkuyu, ndingukuwona.”

⁴⁹ Natanaele wangumwamuka, “Rabi imwe ndimwe Mwana waku Chiuta; imwe ndimwe Karonga waku Yisraele!”

⁵⁰ Yesu wangwamuka, “Kumbi uvwana chifukwa ndakunene, ‘Kuti ndingukuwona msina mu mkuyu?’ Ukawonanga vikuruku kwaku vyenivi.”

⁵¹ Ndipo wangumnene, “Nadidi, ndikuneneskiyani, muwonenge kuchanyakujurika, ndi ŵangelo ŵaku Chiuta ŵakwera ndi kusikiya pa Mwana wa munthu.”