Yoele 3 - Tonga Bible 1986

Chiuta wakayeruzganga mitundu

¹ “Chifukwa wonani, mu mazuŵa gho, ndi nyengo yiya, penipo ndiwezgenge ŵaku Yuda ndi Yerusalemu,

² ndiunjikenge mitundu yose, ndisikiyenge nayo ku dambo laku Yehoshafati, ndilimbana nayo chifukwa cha, ŵakusankhika ŵangu ŵaYisraele, wo ŵambininiskika mukati mu mitundu, ndi kugaŵana charu changu,

³ ndipo ŵanguchitiya ŵanthu ŵangu mphenduzga, ŵangupereka mwana mhurwa kugulizgana ndi munthukazi mureŵi, ndi kuguliska mwana musungwana ndi vinyo kuti wamwe.

⁴ “Mwe ayani imwe kwaku ine, imwe Turo ndi Sidoni, ndi mphaka zose za ŵaFilisti? Kumbi mutindiwezge thayu? Asani mutindiwezge thayu ruŵi ndiwezgenge thayu linu, pa mutu winu.

⁵ Chifukwa mwato siliva ndi golide langu, mwapinga usambasi wangu wakuzirwa ndi kuserezga mu nyumba zinu zakupempheriyamo.

⁶ Mwaguliska ŵana ŵaku Yuda ndi ŵana ŵaku Yerusalemu ku ŵa Giriki, kuŵatuzgiya kutali ndi mphaka yawo.

⁷ Kweni sono ndiŵaunjiskenge ku malo ghenigho mwaŵaguliskako, ndipo ndiwezgiyenge thayu pa mitu yinu chifukwa chaku vyo mwachita.

⁸ Ndiguliskenge ŵana ŵinu, ŵanthurumi ndi ŵana ŵinu ŵanthukazi mu janja la ŵana ŵaku Yuda, ndipo iwo aŵaguliskenge ku ŵaku Sabea mtundu wakutali; chifukwa Ambuya akamba.”

⁹ Wandiskani ichi mu mitundu: nozgani nkhondo; yuskani vinkhara. Ŵarekeni ŵankhondo wose ŵandere pafupi; ŵarekeni ŵakwere.

¹⁰ Sulani mayembe ghinu ghaŵe malipanga, ndi vipopo vinu viŵe mikondo. Warekeni ŵakulombotoka ŵanene, “Nde chinkhara.”

¹¹ Endeskani ndi zani, mose imwe mwa mitundu kwakuzunguriya; muungane kweniko. Siskani ŵankhondo ŵinu Ambuya.

¹² Yirekani mitundu yijiyuske, ndi yizi ku dambo laku Yehoshafati chifukwa ndiku ndamkuŵa kweruzga mitundu yose kwa kuzunguriya.

¹³ Serezgani chisenga, chifukwa vuna yafya. Sereni, ndi pondani, chifukwa chakupondiyamo mphereska chazaza. Vyakuŵikamo vifwapuka chifukwa uheni wawo ngukuru.

¹⁴ Mizinda, mizinda, mu dambo lakweruzgiya! Chifukwa zuŵa la Ambuya le pafupi mu dambo lakweruzgiya.

¹⁵ Dazi ndi mwezi vifipenge, nyenyezi nazo zifuŵiyenge.

¹⁶ Ambuya abongo mu Zioni, ndi atuzga mazu ghawo kutuliya mu Yerusalemu, machanya ndi charu chapasi visukunikenge; kweni Ambuya nchakutaskikiyamo cha ŵanthu ŵawo linga lakukho ku ŵana ŵaku Yisraele.

¹⁷ “Viyo mukaziŵanga kuti ine ndine Ambuya Chiuta winu, yo waja mu Zioni, phiri langu lakupaturika. Ndipo Yerusalemu waŵenge wakupaturika ndipo ŵalendo ŵaporotengemo so cha.

Chiuta wakatumbikanga ŵanthu ŵake

¹⁸ “Ndipo mu zuŵa lo mapiri ghanthonenge vinyo mufya, ndi tumapiri tutaŵarenge mkaka, ndi tumisinji tose twaku Yuda twendenge maji; ndipo chisimi chibwibwitukenge kutuliya ku nyumba ya Ambuya chamdiriya dambo la Shitimu.

¹⁹ “Egipiti waŵenge phasulu ndi Edomu mahame ghakupasuka, chifukwa cha nkhaza zakuchitika ku ŵanthu ŵaku Yuda, chifukwa ŵadiska ndopa zambura kafukwa mu charu chawo.

²⁰ Kweni Yuda waŵenge ndi ŵanthu ŵakujamo muyaya, ndi Yerusalemu ku migonezi yose.

²¹ Nditayiyenge thayu pa ndopa zawo, ndipo kuti ndiphotonge ŵalakwi cha, chifukwa Ambuya ŵaja mu Zioni.”