Yoele 2 - Tonga Bible 1986

Wazombe nge ndi chenjezgu la zuŵa la Ambuya

¹ Mbani mbata mu Zioni; wawatani mu phiri langu lakupaturika! Wakuja mu charu chose watentheme, chifukwa zuŵa la Ambuya liŵandika, zuŵa lituza.

² Zuŵa la mdima la munkhorwi, zuŵa la mitambo ndi mdima wakoyoyu; nge mbufipa wakutandikika pa mapiri pachanya, ŵanthu ŵakuru ndi ŵanthazi, kuti ŵakuŵako kale ŵakukozgana nawo cha, pamwenga kuti ŵakaŵangako sopavuli pawo cha, chingana nkhu virimika vya migonezi yose.

³ Moto ukole paurongo pawo, ndi kuvuli kwawo mlipu utocha. Charu chenge ndi munda wa Edene paurongo pawo, kweni kuvuli kwawo mabozwa ghasokwa, kulivi kanthu kakupozomoka kwaku iwo.

⁴ Mawonekedu ghawo ghenge ndi mawonekedu gha ŵakavalo, nge mbakavalo ŵankhondo ŵachimbiya.

⁵ Nge nchiwawa cha magareta, ghachiripuka pachanya pa mapiri, nge nchiwawa cha mlipu wa moto, wo utocha viputu, nge mbanthu ŵanthazi ŵaŵikika umampha mukurwa nkhondo.

⁶ Paurongo pawo ŵanthu wose ŵemu suzgu, visku vyawo vyose vyawonda.

⁷ Nge mba nkhondo ŵarotoka; nge ndi ngwazi ŵakwera malinga. Ŵatenda we yose pa nthowa yake ndi yake, kuti ŵapatuka mu nthowa zawo cha.

⁸ Kuti ŵasazganikana cha, kweni yose watenda mu nthowa yake; ŵaporota mu mahomwa, ndipo kuti ŵakanizgika cha.

⁹ Wayingayingenge mu msumba, ŵaulukiya pa malinga; ndi ŵakwera pa zinyumba, ŵasere mu madangazi nge ndi munkhungu.

¹⁰ Charu chiyaghayikenge paurongo pawo, machanya ghatenthemenge. Dazi ndi mwezi vifipenge, nyenyezi zifuŵiyenge.

¹¹ Ambuya atuzga mazu ghawo paurongo pa nkhondo yawo, chifukwa mupingu wawo ngukuru ukongwa; ngwanthazi yo wachita mazu ghawo. Chifukwa zuŵa la Ambuya ndikuru ndi lakofya. Ndiyani waziŵa kulimiya?

¹² Ambuya atiti, “Chingana ndi sono, ng'anamukiyani kwangu ndi mtima winu wose, ndi kunguzga kurgha, ndi kuliya masozi, ndi kutenje;

¹³ muparuwe mitima yinu, vyakuvwala vinu cha.” Ng'anamukiyani ku Ambuya Chiuta winu, chifukwa ngwamampha ndi walisungu, wambura kukalipa ruŵi, ndi wakuzara chanju chikuru, ndi wakugowoke uheni.

¹⁴ Njani waziŵa kuti wakawengako cha ndi kung'anamuka, ndikusiya thumbiko kuvuli kwake, mpasku wa vyakurgha ndi mpasku wa vyakumwa kupereka kwa Ambuya Chiuta winu?

¹⁵ Mbani mbata mu Zioni; patuwani zuŵa la kufunga kurgha; danani unganu wakupaturika;

¹⁶ unjikani ŵanthu. Patuwani umba, unjikani ŵaraŵara; unjikani ŵana, chingana mba mjedu. Mweni nthengwa watuwe mu chipinda chake, ndi mwali nayo muchipinda chake.

¹⁷ Pakati pakuserere ndi jochero ŵazukuru, ŵateŵeti ŵa Ambuya ŵaliye, ndi ŵanene kuti, “Ambuya, mungachitanga ŵanthu ŵinu kuŵa ŵakulengeskeka mukati mu mitundu. Chifukwa nchine cho ŵakaneniyanga mukati mu ŵanthu kuti, ‘Chiuta wawo wepani?’ ”

Yisraele wagowokereka ndi wawezgeka

¹⁸ Viyo Ambuya anguŵa ndi sanje chifukwa cha charu chawo, ndi anguchitiya lisungu ŵanthu ŵawo.

¹⁹ Ambuya angwamuka, ku ŵanthu ŵawo, kuti, “Wonani ndimtumiyeninge trigu, ndi vinyo, ndi mafuta, ndipo mugutenge; ndipo kuti nkhamulengeskaninga so cha mukati mu mitundu.

²⁰ “Ndinderezgenge kutali ŵanthu ŵaku nkhonde kuŵadikiskiya ku charu cha chiparamba ndi chakupasuka; ŵakudanga ŵake ku nyanja yaku vuma, ŵakuvuli ku nyanja yaku zambwe; kununkha kwake ndi sungu lake vikwerenge; chifukwa wachita vinthu vikuru.

²¹ “Ungopanga wa charu, kondwa ndikusekere, chifukwa Ambuya achita vinthu vikuru!

²² Mungopanga mwa nyama za mu dondo, chifukwa chipozwa cha mu lisuwa chime; muti upasa vipasi vyake, mkuyu ndi mphereska vipasa ukongwa.

²³ “Kondwani mwa ŵana ŵaku Zioni, sekeriyani mwa Ambuya Chiuta winu, chifukwa wampaskani vuwa yakwamba, ndi yaumari nge ndi kali.

²⁴ “Mibuli yizazenge trugu, viyaŵi vifwapukenge ndi vinyo, ndi mafuta.

²⁵ Ndimuwezgiyeninge virimika vyo zombe wangurgha, ŵaphanana, matondo, ndi viwungu, nkhondo yangu yikuru yo ndingutuma mukati mwinu.

²⁶ “Murghenge vinandi ndi kuguta, ndi kurumba zina la Ambuya Chiuta winu, yo wamuchitiyani kwakuziziswa. Ndipo ŵanthu ŵangu kuti ŵalengeskekenge so cha muyaya.

²⁷ Ndipo muziŵenge kuti nde mukati mwaku Yisraele, ndi kuti ine Ambuya nde Chiuta winu, ndi kulivi munyake so. Ndipo ŵanthu ŵangu kuti ŵalengeskekenge so cha muyaya.

Zuŵa la Ambuya

²⁸ “Ndipo kuŵenge kuti pavuli, ndipunguliyenge mzimu wangu pa ŵanthu wose; ndipo ŵana ŵinu ŵanthurumi ndi ŵana ŵinu ŵanthukazi ŵachimenge, ndipo ŵaraŵara ŵalotenge maloto, ŵanyamata ŵawonenge chiwona.

²⁹ Ndipo so chingana mpha ŵateŵeti ŵinu ŵanthurumi ndi ŵateŵeti ŵanthukazi mu mazuŵa gho ndipunguliyenge mzimu wangu.

³⁰ “Ndipo ndirongonge vyakuziziswa kuchanya ndi panu pasi, ndopa ndi moto, ndi mizati ya usi.

³¹ Dazi lisandukenge mdima ndi mwezi usandukenge ndopa, lenga lindaze zuŵa likuru ndi lakofya la Ambuya.

³² Ndipo kuŵenge kuti, yose yo wadanenge pa zina laku Chiuta wataskikenge; chifukwa mu phiri Zioni ndi mu Yerusalemu ŵakaŵangamo wo ŵapozomokenge, nge ndimo Ambuya anene; ndipo mwaku wo ŵajako ndi umoyo, muŵenge wo Ambuya atuŵandana.