Yesaya 9 - Tonga Bible 1986

Karonga wa chimangu

¹ Kweni kuti kukaŵanga mdima cha kwaku yo wenga mu suzgu. Mu nyengo ya kale wangunyoza charu cha Zubuluni ndi charu cha Naftali, kweni mu nyengo ya pavuli wakakankhuskanga nthowa yakuya ku nyanja, charu cha kusirgha ku Yordane, Galile wa ŵamitundu.

² Ŵanthu wo ŵangwenda mu mdima ŵawona kungweruka kukuru; wo ŵanguja mu charu cha mdima wakofya, ukweru waŵaŵaliya.

³ Imwe mwandaniska mtundu, mwandaniska likondwa lake, ŵakondwa paurongo pinu, uli ndi likondwa la pakuvuna, uli ndi po ŵakondwe ŵanthu ŵachigaŵana vyakuskoŵa.

⁴ Pakuti gori la mphingu yake, ndi katundu wapa pheŵa lake, ndodo ya wakumusuzga iyo, imwe mwafyo ulaka mpha zuŵa liya laku Midiani.

⁵ Pakuti chiyato chose cha wankhondo wakuphwataphwata chifukwa chakuruska kwa nkhondo, ndi chivwalo chose chakubizgika mu ndopa vikawochekanga nge ndi nkhuni za moto.

⁶ Pakuti kwaku ifwe mwana wapapika kwaku ifwe kwapaskika mwana munthurumi, ndipo weruzgi ukaŵanga pa pheŵa lake, zina lake likadanikanga “Wakupaska fundo Wakuziziswa, Chiuta wanthazi, Dada wa Muyaya, Karonga wa Chimangu.”

⁷ Kukuwa kwa ufumu wake ndi chimangu kuti kukaŵanga ndi umari cha, pa chitengo chaku Davidi, ndi pa ufumu wake, kuujarika ndi kuukhozga ndi cheruzgu chirunji ndi ukongorekwa, kwamba pa nyengo iyi kurutiriya ndi ku muyaya. Phamphu la Ambuya ŵa maŵanja likachitanga ichi.

Ambuya akalanganga ŵaYisraele

⁸ Ambuya atuma mazu ghaususka Yakobe, ndipo ghakazanga paku Yisraele;

⁹ ndipo ŵanthu wose ŵakaziŵanga, Efraimu ndi ŵakuja mu Samaria wo ŵakamba mu kujikuzga ndi kujitukumuwa kwa mtima:

¹⁰ “Ncherwa zagumulikiya pasi, kweni ifwe tikazenganga ndi mya yakusema; mikuyu yatemeke pasi, kweni ifwe tikaŵikangamo milanji mu malo ghake.”

¹¹ Viyo Ambuya ŵayuskiya ŵakupindikana ŵawo, asonkhezga ŵarwani ŵawo.

¹² ŴaSiriya kuchiri ku vuma ndi ŵaFilisti kuchiri ku zambwe, kumeza Yisraele ndi mlomo wakuyasama. Mu chifukwa ichi kukara kwake kulivi kuwezgeka janja lake leche kutambaruka.

¹³ Ŵanthu kuti ŵangung'anamukiya kwake cha kwaku yo wanguŵakoso, chingana nkhupenja Ambuya nako cha.

¹⁴ Viyo Ambuya angudumuwako kwaku Yisraele mutu ndi mchiya, mphanda ya kanchindu ndi dete mu zuŵa limoza pe.

¹⁵ Mura ndi munthu wa ulemu ndiyo mutu, ndipo mchimi yo wasambizga utesi ndiyo mchiya;

¹⁶ pakuti wo ŵarongozga yaŵa ŵanthu ŵati ŵapuruska, ndipo wo ŵarongozgeka ndi iwo ŵamezeka.

¹⁷ Chifukwa cho Ambuya kuti akondwere cha pa ŵampupuka ŵawo, ndipo walivi chitima pa ŵana ŵaranda ndi vyoko; pakuti we yose yo walivi Chiuta ndipo ndimchita uheni, mlomo wose ukamba ubereŵeza. Mu chifukwa ichi chose kukara kwawo kulive kuwezgeka, ndi janja lawo leche kutambaruka.

¹⁸ Pakuti utimbanizi ukole uli ndi moto, utocha kankhande ndi minga; ukozga matundu ndi lisuwa, ndipo viputiya kuchanya mu ukhomi wa usi.

¹⁹ Kutuliya mu ukari wa Ambuya wa maŵanja charu chitufya, ndipo ŵanthu ŵe uli ndi nkhuni za moto; palivi munthu yo wachitiya lisungu mwana munyake.

²⁰ Ŵakwamphuwa ku marghe, kweni ŵeche ndi nja mbwenu, ndipo ŵaturgha ku maze, kweni kuti ŵaguta cha, we yose waturgha nyama ya munyake,

²¹ Manase waturgha Efraimu, Efraimu waturgha Manase, ndipo wose pamoza ŵatinkha Yuda. Mu chifukwa ichi chose, kukara kwake kuti kwarata kunyake cha ndipo janja lake leche kutambaruka.