Yesaya 7 - Tonga Bible 1986

Uthenga waku Yesaya kwaku Ahazi

¹ Mu mazuŵa ghaku Ahazi mwana waku Yotamu, mwana waku Uziya, karonga wa ŵaYuda, Rezini, karonga wa Siriya ndi Peka mwana waku Remaliya karonga waku Yisraele ŵangukwere ku Yerusalemu kwachipong'a nkhondo paku wo, kweni kuti ŵanguwupunda cha.

² Penipo ŵanguyinene nyumba yaku Davidi kuti, “Siriya wazomerezgana ndi Efraimu,” mtima wake ndi mtima wa ŵanthu ŵake ungusukunika uli ndimo miti yamu lisuwa yisukunikiya paurongo pa mphepo.

³ Ndipo Ambuya anguti kwaku Yesaya, “Tuwa, kanga kakumane ndi Ahazi, iwe ndi Sheara-yashubu mwana wako, pa umari wa msisi wamaji wa thaŵali la panena pa gurwi wakuya ku munda wa wakuchapa saru,

⁴ ndipo ukati kwaku iyo, ‘Chenje, utaka cheti, ungopanga cha, ndipo mtima wako ungalakatuka cha chifukwa cha vipandu ivi viŵi vya moto, pa kukara kwakofya kwaku Rezini ndi Siriya, pamoza ndi mwana waku Remaliya.

⁵ Chifukwa Siriya, pamoza ndi Efraimu ndi mwana waku Remaliya, ŵapanga fuzi yiheni paku imwe, kuti,

⁶ “Tiyeni tikwere kwachirwa ndi Yuda ndi kuwutenthemeska, tiwuthereske pakusakata kwidu, ndipo tiŵikepo mwana waku Tebele kuŵa karonga mukati mwake,”

⁷ Ambuya Chiuta atiti: Kuti yikamanga cha, ndipo kuti yikachitikanga cha.

⁸ Pakuti mutu waku Siriya ndi Damasko, ndipo mutu waku Damasko ndi Rezini. “ ‘Mukati mu virimika machumi ghankhonde ndi limoza pachanya vinkhonde (65) Efraimu wakaswekanga tumanatumana viyo kuti wakaŵanga khamu la ŵanthu so cha.

⁹ Ndipo mutu waku Efraimu ndi Samaria, ndipo mutu wa Samaria ndi mwana waku Remaliya. Asani kuti mukavwananga cha, kwakunenenska kuti mukajarikikanga cha.’ ”

Chisimikizgu chaku Immanuele

¹⁰ Ambuya angukamba sono ndi Ahazi,

¹¹ “Pempha chisimikizgu cha Ambuya Chiuta wako; chiŵe cha ndimba nge ndi muunda pamwenga chitali nge nkhuchanya.”

¹² Kweni Ahazi wanguti, “Kuti ndikapemphanga cha nanga nkhuti ndesenge Ambuya cha.”

¹³ Ndipo wanguti, “Avwani iku, mwa nyumba yaku Davidi! Kumbi nkhanthu kamanavi kwaku imwe kuvuska ŵanthu, ndi kuti muvuska so Chiuta wangu?

¹⁴ Chifukwa ichi Ambuya ŵeneko ŵakakupaskaninga chisimikizgu. Ehe, munthukazi mwali wakazuukanga wapapenge mwana munthurumi, ndi wadanenge zina lake Immanuele.

¹⁵ Iyo wakarghanga mafuta ndi uchi penipo wakaziŵanga kukana uheni ndi kusankha umampha.

¹⁶ Pakuti mwana yo wenga wandiziŵe kukana uheni ndi kusankha umampha, charu cho cha ŵakaronga ŵaŵi wo utopa chikajoworekanga.

¹⁷ Ambuya akatolenga paku iwe ndi pa ŵanthu ŵako ndi pa nyumba ya ausu mazuŵa ghakuti ghalivi kuzapo kale kwamba penipo Efraimu wangutuliyako kwaku Yuda pa kuza ndi karonga wa Asiriya.”

¹⁸ Mu zuŵa liya Ambuya akambiyanga kayuzi nyeze yo ye pa funda la tumisinji twa mu Egipiti, ndi akambiyanga njuchi yo yemu charu cha Asiriya.

¹⁹ Ndipo zose zikazanga ndi kuja mu malijengwajengwa ghakuti nyo, ndi mazenje gha mu majarawe, vivwati vyose vya minga, ndi mu vipozwa vya uliska.

²⁰ Mu zuŵa lo Ambuya akametanga ndi lwembe lo labwerekeka pa sirgha la msinji wo pamoza ndi karonga wa Asiriya mutu ndi cheya cha mu marundi, ndipo likametanga ndi mwembe viyo.

²¹ Mu zuŵa liya munthu wakasunganga ng'ombe yamoyo yinthukazi yampupuka ndi mberere ziŵi,

²² ndipo pa chifukwa cha unandi wa mukaka wo zikapaskanga, wakarghanga mafuta, pakuti we yose yo wakasiyikanga mu charu wakarghanga mafuta ndi uchi.

²³ Mu zuŵa lo malo ghose mwenimo kale mwenga miti ya mphereska chikwi chimoza, yapa mtengo wa mashekelo gha siliva chikwi chimoza, yikasandukanga kankhande ndi minga.

²⁴ Ŵanthu wakazanga kwenikuwa ndi mauta ndi mivwi, pakuti charu chose chikaŵanga kankhande ndi minga,

²⁵ ndipo pa mitunthu yose yo yalimikanga ndi jembe, kuti mukazangako kuwa cha chifukwa cha kopa kankhande ndi minga, kweni yikasandukanga malo penipo zikangaranga ng'ombe pakukanda mberere.