Yesaya 66 - Tonga Bible 1986

Vyeruzgu vya Ambuya ndi chigomezgu chaku Zioni mukucha

¹ Viyo atiti Ambuya: “Kuchanya nchitengo changu charu chapasi ndi mpando wa marwayo ghangu; ndi nyumba uli yo mungandizenge ine, ndipo ndi malo uli gha chipumulu changu?

² Ivi vinthu vyose janja langu lavichita, viyo vinthu ivi vyose vyangu, atiti Ambuya. Kweni uyu ndiyo munthu kwaku yo ndikalereskanga, mweniyo ngwakujiyuyuwa ndi wakujisuska mu mzimu, yo watenthema pa mazu ghangu.

³ “Yo wabaya ng'ombe walingana ndi wakubaya munthu; yo wapereka chisopo cha mwana wamberere, walingana ndi yo wafyo khosi la garu; yo wapereka mpasku wa ufwa walingana ndi yo wasaska ndopa za nkhumba; yo wachita mpasku wa chikumbusku wa vyachema walingana ndi yo watumbika ngoza. Yaŵa ŵasankha nthowa yo ŵeneko, ndipo mtima wawo ukondwere mu maukazuzi ghawo;

⁴ nani mbwenu ndikaŵasankhiyanga yuzgu, ndi kutole mantha ghawo paku iwo ŵeneko; chifukwa, penipo ndingudana, pengavi yumoza wangwamuka, po ndakambanga kuti ŵangutegherezga cha; kweni ŵanguchita cho chenga uheni mu maso ghangu, ŵangusamkha cho ine ndengavi kukondwa nacho.”

⁵ Vwani mazu gha Ambuya, imwe mutenthema pa mazu ghawo: “Ŵabali ŵinu wo ŵatikutinkhani ndipo ŵatikudikiskani chifukwa cha zina langu ŵakuti, ‘Ambuya akankhuskike, kuti tiwone chimwemwe chinu,’ kweni ndiwo wo ŵakalengeskekanga.

⁶ “Andi, chiwawa chakutuwa mu muzi! Mazu ghakutuwa mu kasopi! Mazu gha Ambuya, apaska mphoto ku ŵakupindikana ŵawo!

⁷ “Ŵenga ŵandaŵe mu kuŵaŵa kwa nthumbo wanguchira; kuŵaŵa kwake kwenga kundamuziye wanguchira mwana munthurumi.

⁸ Njani wakuvwapo chinthu cha viyo? Njani wakuviwona vinthu vya viyo? Kumbi charu chikapapikanga mu zuŵa limoza? Kumbi mtundu ukapapikanga pa nyengo yimoza? Pakuti penipo Zioni wenga mu kuŵaŵa wangupapa ŵana ŵake ŵanthurumi.

⁹ Kumbi ndikafikiskanga ku kupapa ndi kureka kupapizga? atiti Ambuya; kumbi ine ndichitiska kubala ndikajaranga chibali? watiti Chiuta winu.

¹⁰ “Kondwani pamoza ndi Yerusalemu, musekere chifukwa chake, imwe mose mutuŵanja; kondwani nayo pamoza mu chimwemwe, imwe mose mutimutenjere;

¹¹ alinga monkhe ndi kukhorwa ndi naŵe gha ghasangaruska, kuti mumwe ukongwa ndi kukondwa kwakutuwa ku kuzala kwa unkhankhu wake.”

¹² Pakuti viyo atiti Ambuya: “Ehe, ndikarutizganga kusakata kwaku iyo uli ndi msinji, ndi usambasi wa ŵamitundu uli nkhamusinji kakusapatiya; ndipo ukawonkhanga, ukanyamulikanga pa pheŵa lake, ndi kukupembelezga pa makongono ghake.

¹³ Uli ndiyuwa anyina ŵasangaruska, viyo ndimu ndikakusangaruskiyanga; ukasangaruskikanga mu Yerusalemu.

¹⁴ Ukawonanga, ndipo mtima wako ukakondwanga; viwanga vyako vikakuwanga nge mbuteka; ndipo kukaziŵikwanga kuti janja la Ambuya lendi ŵateŵeti ŵawo, kukwiya kwawo kusunkhiya ŵakupindikana ŵawo.

¹⁵ “Pakuti ehe, Ambuya akazanga mu moto, ndi magareta ghawo nge ndi mphepo ya lirondo, kupereka ukari wowo mu ufyu, ndi kususka kwake nge nkhulipuka kwa moto.

¹⁶ Pakuti ndi moto Ambuya akachitanga cheruzgu, ndipo ndi lipanga lawo, pa nyama yose; wo ŵakabayikanga ndi Ambuya ŵakaŵanga ŵanandi.

¹⁷ “Wo ŵatijipatuwa ndi kujitoweska ŵeneko kuya ku minda, kurondo yo we pakati, ŵakurgha nyama ya nkhumba ndi mbeŵa ndi ukazuzi wawo, wakamariyanga pamoza atiti Ambuya.

¹⁸ “Pakuti ndiziŵa nchitu ndi maghanaghanu ghawo, ndipo ndituza kuzachiwunjika mitundu yose ndi malilime; ndipo ŵakazanga ndi ŵakawonanga unkhankhu wangu,

¹⁹ ndikamikanga chisimikizgu mukati mwawo. Ndipo kutuwa mwaku wo ndikatumanga ŵakujapo ku mitundu, ku Tarshishi, Puti, ndi Ludi, ŵeniwo ŵatweŵa uta, ku Tubala ndi Javani, ku vyaro vya mu malikumba kutali ukongwa, wo ŵalivi kuvwa mbiri yangu pamwenga kuwona unkhankhu wangu; ndipo wakataulanga unkhankhu wangu mukati mu mitundu.

²⁰ Ndipo ŵakazanga ndi ŵabali ŵinu wose kutuwa ku mitundu yose nge ndi mpasku ku Ambuya, pa ŵakavalo, mu magareta, mu machila, pa nyulu, ndi pa ŵagamila, kuza ku phiri langu lakupaturika Yerusalemu, atiti Ambuya, nge ndimo ŵa Yisraele ŵatuziya ndi mpasku wowo wa ufwa mu chiyaŵi chakutowa ku nyumba ya Ambuya.

²¹ Ndipo ŵanyake ŵaku wo so ndikaŵatonga kuŵa ŵazukuru ndi ŵaLevi, atiti Ambuya.

²² “Pakuti nge ndi machanya ghafya ndi charu chapasi chifya, vyenivyo ndikachitanga, vikajaliriyanga paurongo pangu, atiti Ambuya; viyo ndimu mphapu zinu ndi zina linu vikajaliriyanga.

²³ Kutuwa ku mwezi ufya kuya ku mwezi ufya, ndi kutuwa ku sabata kuya ku sabata, nyama yose yikazanga kusopa paurongo pangu, atiti Ambuya.

²⁴ “Ndipo ŵakarutanga kwachilereska pa viŵanda vya ŵanthu wo ŵakundigarukiya; pakuti fusi zawo kuti zikafwanga cha, moto wawo kuti ukazimwanga cha, ndipo ŵakaŵanga ŵakutinkhika ku nyama yose.”