Yesaya 64 - Tonga Bible 1986

Kurombe lisungu ndi chovyo

¹ Mphanyi iku munguparuwa kuchanya ndi mungusikiya pasi, kuti mapiri ghasukunike pa uŵapo winu

² uli ndi moto utocha tumphanda pamwenga mo moto uŵiriskiya maji kuchitiska zina linu kuti liziŵikwe ku ŵakupindikana ŵinu, ndi kuti mitundu yinjenjeme pa uŵapo winu!

³ Penipo munguchita vinthu vyakofya vyenivyo ifwe tangavi kuvipenja, mungusikiya pasi, mapiri ghangusukunika pa uŵapo winu.

⁴ Kutuwa ku mwaka palivi yumoza wa kuziŵa pamwenga wakuvwapo ndi gutu, palivi jiso lo likuwona Chiuta pade paku imwe, mweniyo watataliya wo ŵalindizga paku iyo.

⁵ Mukumana nayo yo wachita ukongorekwa ndi likondwa, wo ŵakumbuka imwe mu nthowa zinu. Ehe, ifwe tingulakwa imwe mungukaripa; mu uheni widu tajamo nyango yitali ukongwa, ndipo kumbi tikataskikanga?

⁶ Ifwe tose taŵa uli ndi yo ngwakukazuzgika, ndipo nchitu zidu zose za kurunjika ze nge ndi chivwalo cha ukazuzi. Tose tifota ulaka ndi jani, ndipo maulakwi ghidu, uli ndi mphepo ghatitiputiska.

⁷ Palivi mweniyo wadana pa zina linu, wakujipamphuska kumukoreskani imwe; pakuti mwabisa chisku chinu kwaku ifwe, ehe, mwatipereka mu janja la mphutupuru zidu.

⁸ Kweni Ambuya mwe, imwe Auskefwe; te dongo ifwe, imwe mwe muwumbi widu; ndipo tose te nchitu ya janja linu.

⁹ Mungakaripanga kwakurutilizga, Ambuya mwe; ndipo rekani kukumbuka kulakwa muyaya. Ehe, ghanaghanani, ifwe tose te ŵanthu ŵinu.

¹⁰ Mizi yinu yakupaturika yasanduka bozwa, Zioni wasanduka bozwa, Yerusalemu ndi mapopa.

¹¹ Nyumba yidu yakupaturika ndi yakunozga, mwenimo auskefwe wangurumba imwe, yafya ndi moto, malo ghidu ghose ghakukondweska ghasanduka mapopa.

¹² Kumbi nadi mukalereskangapo waka pa vinthu ivi Ambuya? Kumbi mukachetamanga waka ndi kutisuzga weniukongwa?