Yesaya 60 - Tonga Bible 1986

Unkhankhu waku Zioni Mukucha

¹ Yukani, ŵalani, pakuti ukweru winu waza, ndipo unkhankhu wa Ambuya wayukiya paku imwe.

² Pakuti ehe, mdima ukavimbanga charu chapasi, ndipo mdima wa munkhorwe ukavimbanga ŵanthu ŵa mitundu yose; kweni Ambuya akayukanga paku imwe, unkhankhu wawo ukawonekanga paku imwe.

³ Ndipo mitundu yikazanga ku ukweru winu, ndi ŵakaronga ku kutuwa kwa kuyuka kwinu.

⁴ Soska maso ghako kwakuzunguliya ndi wona; wose ŵawungana pamoza, ŵatuza kwako; ŵana ŵako ŵanthurumi ŵakatuwanga kutali, ndipo ŵana ŵako ŵanthukazi ŵakanyamulikanga mu manja.

⁵ Sono ŵakawonanga ndipo ukaŵalanga ndi chimwemwe mtima wako ukaziyanga ndi kujikuzga; chifukwa usambasi wa nyanja ukang'anamukiyanga kwaku iwe, usambasi wa mitundu ukazanga kwako.

⁶ Mzinda wa ŵagamila ukakuvimbanga, ŵagamila ŵampupuka ŵaku Midiyani ndi Efa; wose ŵakutuwa ku Sheba nawo wakazanga. Ŵakazanga ndi golide ndi vyachema, ndipo ŵazamtaula marumbu gha Ambuya.

⁷ Miskambu yaviŵetu yaku Kedara yazamuwunjikana kwaku iwe, ŵabira ŵaku Nebayoti ŵazamtataliya iwe; ŵakazanga ndi mipasku ya marondeka pa jochero langu, ndipo unkhankhu ukakuskikiyanga ko ku unkhankhu mu kasopi wangu.

⁸ Mbayani yaŵa wo ŵaphururuka uli ndi mtambo, nge ndi nkhunda ku madangazi ghawo?

⁹ Pakuti vyaru vyamu malikumba vikandilindizganga, ngaraŵa zaku Tarshishi ndizo zikadanganga, kuza ndi ŵana ŵako ŵanthurumi kutuwa kutali, ŵakupinga siliva ndi golide wawo pamoza nawo, kupingiya zina la Ambuya Chiuta winu, ndi chifukwa cha Mtuŵa Yumoza waku Yisraele, chifukwa wamukankhuskani imwe.

¹⁰ Ŵalendo ŵakazenganga malinga ghinu, ŵakaronga ŵawo ŵakakutataliyaninga; pakuti mu ukari wangu ndingukukosoni, kweni mu wezi wangu ndakuchitiyani, lisungu imwe.

¹¹ Malikomo ghinu ghakuŵanga gha mwazi rutaruta; msana ndi usiku kuti ghakajarikanga cha; mwakuti ŵanthu ŵaserenge kwaku imwe ndi usambasi wa mitundu, pamoza ndi ŵakaronga ŵawo ŵakulongozgeja mu chimpingu.

¹² Pakuti mtundu ndi ufumu wo urekenge kumutataliyani ukamaranga; mitundu yaviyo yikachitikanga mapopa kumariya limu.

¹³ Unkhankhu wa Lebanoni ukazanga kwaku imwe muti wa mlombwa, mbaŵa, ndi milanji, kunozeska malo ghangu ghakupaturika; ndikachitanga malo gha marundi ghangu kuŵa gha unkhankhu.

¹⁴ Ŵana ŵaku wo ŵangukuyuzgani wakazanga ndi kukotama pasi, kwaku imwe, wose wo ŵangukutonyorani, ŵakakotamanga pa marundi ghinu; ŵakakudananinga Muzi wa Ambuya, Zioni wa Mtuŵa Yumoza waku Yisraele.

¹⁵ Chingana mungujoworeka ndi kutinkhika, po pengavi nanga njumoza wakuporotamo, ndikamuchitaninga kuŵa wa ufumu muyaya, likondwa laku mgonezi ndi mgonezi.

¹⁶ Mukawonkhanga mkaka wa mitundu, mukawonkhanga maŵe gha ŵakaronga; ndipo mukaziŵanga kuti ine, Ambuya, ndine Mtaski winu, ndi Muwombozi winu Wanthazi yo waku Yakobe.

¹⁷ Mu malo ghambuŵa ndikazanga ndi golide, mu malo gha chisulo ndikazanga ndi siliva; mu malo gha muti, mkuŵa, ndipo mu malo mwa mya ndikazanga ndi chisulo. Ndikaŵachitiyanga chimangu ŵarongozgi ŵinu ndi ŵamazaza ŵinu ukongorekwa.

¹⁸ Chiwawa kuti chikavwikanga so chamu charu chinu, uyiku pamwenga phasulu mukati mu mphaka zinu; malinga ghinu mughadanenge Utaski, ndi malikomo ghinu Rumbu.

¹⁹ Lumwi kuti likaŵanga ukweru winu cha ndi msana nanga mwezi ungaŵala kuti ukapaskanga imwe ukweru cha ndi usiku; kweni Ambuya akaŵanga ukweru winu wa muyaya, ndipo Chiuta winu ndiyu wakaŵanga unkhankhu winu.

²⁰ Lumwi linu kuti likasikanga so cha, pamwenga mwezi winu kwachisere; pakuti Ambuya akaŵanga ukweru winu wa muyaya ndipo mazuŵa ghinu gha maliro ghakamaranga.

²¹ Ŵanthu ŵinu wose ŵakaŵanga ŵakongorekwa; wakaharanga charu cho muyaya, mphanda ya kupanda ine, nchitu ya manja ghangu, alinga kuti ndikankhuskike.

²² Yo ngwakumariya wakaŵanga khamu, mumana ukongwa wakaŵanga mtundu wakulimba; ndine Ambuya; pa nyengo yake ndikachitinthimiskanga.