Yesaya 55 - Tonga Bible 1986

Utaski ngwa wezi kwaku wose

¹ “Imwe, we yose wanyota, wazi ku maji, yose yo walivi ndrama, wazi wagule warghe! Zani, gulani vinyo ndi mukaka kwambura ndrama ndi kwambura mtengo.

² Chifukwa chine mutananga ndrama zinu paku cho kuti nchakurgha cha, ndi kutakataka kwinu paku cho kuti chigutiska cha? Tegherezgani kwarwana kwaku ine, murghe cho nchamampha, ndipo mujikondwereske ndi vyakununa.

³ Khazgani gutu linu, zani kwangu; vwani, alinga kuti mzimu winu uŵe wamoyo; ndipo ndikachitanga namwe phanganu la muyaya, chifundu changu, chanju changu nchakukho nadi paku Davidi.

⁴ Ehe, ndingumuchita kuŵa kaboni ku ŵanthu, murongozgi ndi wakulamula, wa ŵanthu.

⁵ Ehe, ukadananga mitundu yo kuti utiyiziŵa cha, ndipo mitundu yo yengavi kukuziŵa yikachimbiyanga kwaku iwe, chifukwa cha Ambuya Chiuta wako, ndi cha Mtuŵa Yumoza waku Yisraele, pakuti wakukankhuska iwe.

⁶ “Penjani Ambuya penipo angusanirika, danani paku iwo penipo ŵeche pafupi;

⁷ muheni wareke nthowa yake, ndi wakuwura urunji maghanaghanu ghake; wawere ku Ambuya, kuti amuŵiye ndi lisungu, ndi kwaku Chiuta widu, pakuti wagowokiyenge kwakuzala.

⁸ Pakuti maghanaghanu ghangu kuti ndi maghanaghanu ghinu cha, nanga ndi nthowa zinu kuti ndi nthowa zangu cha, atiti Ambuya.

⁹ Pakuti mo machanya ghaliri pachanya ndi charu chapasi, viyo ndimu ziliti nthowa zangu pachanya kuruska nthowa zinu ndi maghanaghanu ghangu kuruska maghanaghanu ghinu.

¹⁰ “Pakuti mo vuwa ndi chiuli viziya pasi kutuwa kuchanya, ndipo kuti viwere so kuwa cha kweni vizumbwiska charu chapasi, kuti chituzgenge ndi kumezga, kupaska mbeu ku wakumija ndi kurgha ku wakurgha,

¹¹ viyo ndimu ghakaŵiyanga mazu ghakutuwa mu mlomo wangu; kuti ghakawerenga kwangu ghambura kanthu cha, kweni ghakafiskanga chinecho ndakhumba, ndi kusakata mu chinthu cho ndingughatumiyako.

¹² “Pakuti mukatuwanga ndi likondwa, ndi kurongozgeka mu chimangu; mapiri ndi mitunthu vikambanga paurongo pinu, ndipo miti ya mudondo yikakuwanga manja ghawo.

¹³ Mu malo mwa minga mukamenga ming'ona; mu malo mwa kankhande mukatuwanga mulombwa; ndipo chikaŵanga chikumbusku ku Ambuya, chiziŵisku cha muyaya cho kuti chikadumulikanga cha.”