Yesaya 53 - Tonga Bible 1986

Kusuzgika kwa mteŵeti wa Ambuya

¹ Njani wavwana ndi chenicho tavwa? Ndipo nkhwakuyani ko lavumbukiya janja la Ambuya?

² Pakuti wangukuwa paurongo pakenge nkhamuti kateta, uli ndi msisi wakutuwa pa nyata yakumira; iyo wengavi kawonekedu pamwenga unozgi kuti timulereske, ndipo wengavi kutowa kuti timukhumbe.

³ Wangunyozeka ndi kupatika ndi ŵanthu; munthu wa vitima, ndi wakuziŵiriya vyakupweteka; ndi mweniyo ŵanthu ŵatumubisa visku vyawo wangunyozeka, ndipo ifwe tengavi kumtumbika.

⁴ Kwakuneneska iyo wakunyamuwa vyakupweteka vidu, ndi kupinga vitima vidu; kweni ifwe tingumuwona nge ngwakupamanthika, wakupumika ndi Chiuta, ndi wakusuzgika.

⁵ Kweni wangugwazika chifukwa cha vyakulakwa vidu, wangulasika chifukwa cha mauheni ghidu; pakuti iyo penga chilangu cho chingutitozga ifwe, ndipo ndi vikukusa vyake ifwe tikuchizgika.

⁶ Tose nge ndi mberere taranda; tang'anamukiya yumoza ndi yumoza ku nthowa yake; ndipo Ambuya ayirika paku iyo mauheni ghaku ifwe tose.

⁷ Wangusuzgika, ndi wangusunjizgika, kweni kuti wangubanuwa mlomo wake cha; nge ndi mberere yakurongozgeke kukubayika, ndi uli ndi mberere yo yili cheti paurongo pa ŵakuyisanga, viyo kuti wangubanuwa mlomo wake cha.

⁸ Ndi kuyuzgika ndi cheruzgu wangutoreka; ndipo nge mpha mugonezi wake, njani wangughanaghanapo, kuti wangudumulikako ku charu cha ŵamoyo, wangupumika chifukwa cha vyakulakwa vya ŵanthu ŵangu?

⁹ Ndipo ŵanguchita muunda wake pamoza ndi ŵaheni, ndi pamoza ndi ŵakupatika mu nyifwa yake, chingana iyo wengavi kuchita chiwawa, ndipo mwengavi urghargha mu mlomo wake.

¹⁰ Kweni lenga khumbo la Ambuya kumukomweska; amuŵika viyo mukuŵaŵa; penipo watijipereka iyo yija mpasku wapa ulakwi, wakawonanga ŵana ŵake, wakarutilizganga mazuŵa ghake; khumbu la Ambuya likasakatanga mu janja lake;

¹¹ wakawonanga chipasi chakutuwa musuzgu ya mzimu wake ndipo wakhorwenge; ndi zeru yake mteŵeti wangu murunji, wakanyoroskanga ŵanandi kuti ŵapimike ŵarunji; ndipo wakanyamuwanga mauheni ghawo.

¹² Chifukwa chenichi ndikamugaŵiyanga chigaŵa pamoza ndi ŵakuzirwa, wakagaŵananga vyakuskoŵa ndi virimbi, chifukwa wangupunguliya mzimu wake ku nyifwa, ndipo wenguŵerengeke pamoza ndi ŵakulakwa; kweni ndipuuli wangunyamuwa uheni wa ŵanandi, ndi kupepeske ŵakulakwa.