Yesaya 5 - Tonga Bible 1986

Ntharika ya munda wa mphereska

¹ Ndirekeni ndimbiye nkhwanjiwa wangu sumu ya chanju yapa munda wake wa mphereska: Nkhwanjiwa wangu wenga ndi munda wa mphereska pa mtunthu wa nyata yikuru.

² Wanguwulima wangutuzgamo mya, ndipo wangupandamo mphereska zakusankhika; wanguzenga chitanthali mukati mwake, wangusemiyamo thaŵali la mphereska mukati mwake; wanguwulereze kuti upasenge vipasi, kweni ungupasa vikorakora.

³ Ndipo sono, mwa ŵakuja mu Yerusalemu mwe, ndi ŵanthu ŵaku Yuda, mweruzge, nditukupemphani, pakati pangu ndi munda wangu wamphereska.

⁴ Kumbi mphanyi ndinguchita chine chinyake ndi munda wangu wa mphereska, cho ndengavi kuchita mwakuwo? Penipo ndinguwulereze kuti ukapasanga vipasi, chifukwa chine ungupasa vikorakora?

⁵ Sono ndikakuneniyaninga, cho ndikachitanga ku munda wangu wa mphereska. Ndikapasuwanga lisitu lake, ndipo ukaliwanga: ndibwanganduliyenge pasi linga lake, ndipo ukaphwatikiyanga pasi.

⁶ Ndikauchitanga mapopa, kuti ŵakaupanthiyanga chingana nkhuulima cha, kankhande ndi minga vikamengamo; ndikalanguliyanga mitambo kuti yireke kung'iyapo vuwa paku wo.

⁷ Pakuti munda wa mphereska wa Ambuya ŵa maŵanja ndi nyumba yaku Yisraele, ndipo ŵanthu ŵaku Yuda ndiwo chakupandika chake chakukondweska; wangulindizga cheruzgu chirunji, kweni awonani, kudika kwa ndopa; wangulindizga urunji, kweni awonani, kuliya!

⁸ Owe kwaku wo ŵalungizgana nyumba ku nyumba, wo ŵasazga munda ku munda, mpaka penipo malo ghalivi kujapo, ndipo mwachitika kuja paku mwija mukati mu charu cho.

⁹ Ambuya ŵa maŵanja arapa mu makutu ghangu: “Kwakuneneska nyumba zinandi zikaŵanga makunthu, nyumba zikuru ndi zamanyanda, mwambura munthu wakujamo.

¹⁰ Pakuti ndimi chumi za munda wa mphereska zipasenge vyakuzaza nkhari yimoza, ndipo mbeu ya sokora yimoza yikapasanga chise chimoza pe.”

¹¹ Owe kwaku wo ŵayuka ndi mlenji-lenji, alinga ŵasaniye vyakumwa vyakuloŵereska, wo ŵatandala penipo mpaka mazulo mpaka penipo vinyo watuwocha!

¹² Ŵendi kaligu ndi bangwi, mtangala fyorilo ndi vinyo pa madghera ghawo; kweni kuti ŵaphwereko machitidu gha Ambuya cha: pamwenga kuwona nchitu za manja ghawo.

¹³ Ndicho chifukwa ŵanthu ŵangu ŵaruta ku umkoli chifukwa chakusoŵa zeru; ŵanthu ŵawo ŵakuzirwa ŵatufwa ndi nja, ndipo ŵanandi ŵa ŵanthu ŵawo ŵatufwa chiparantha.

¹⁴ Viyo muunda wakuzgiyako nja yake ndipo wajura mlomo wake ukongwa, kuzirwa kwa Yerusalemu ndi mzinda wake vyabwanthukiya pasi, mzinda wake ndi ŵakutumbwa mwenimo.

¹⁵ Munthu wakotamiya pasi, ŵanthu ŵasiskikiya pasi, ndipo maso gha ŵakujikuzga ghafoteskeka.

¹⁶ Kweni Ambuya ŵa maŵanja ŵakuzgika mu cheruzgu chirunji, ndipo Chiuta wakupaturika watijirongo wakupaturika mu urunji.

¹⁷ Sono ŵana ŵamberere ŵakarghanga uli ndi mu chipozwa chawo, twakututuŵa ndi tumsese tukarghanga mukati mo mwabwanganduka.

¹⁸ Owe kwaku wo ŵaguza uheni ndi vingwi vya utesi, wo ŵaguguza kwananga nge ndi ng'ombe yo ye ku chingwi.

¹⁹ Ŵeniwo ŵatiti, “Murekeni watinthimike, murekeni wakankhamiske nchitu yake alinga kuti tiyiwone; yirekeni fundu ya Wakupaturika Yo waku Yisraele yindere pafupi, ndipo yirekeni yize, alinga kuti tiyiziŵe!”

²⁰ Soka kwaku wo ŵadana uheni kuti mbumampha ndi umampha kuti mbuheni, wo ŵaŵikapo mdima pa ukweru ndi pa ukweru mdima, wo ŵaŵikapo kuŵaŵa pa kunowa, kunowa pa kuŵaŵa!

²¹ Soka kwaku wo mu maso ghaŵeneko watiti mba zeru, ndi ŵakuchenje mu kujilereska iwo ŵeneko!

²² Soka kwaku wo ndi vilimbi pakumwa vinyo, ndi ŵanthu ŵakukhwima mu kusazga vyakuloŵeleska,

²³ wo ŵapozomoska ŵakulakwa chifukwa cha vinda, ndipo ŵatimuvinda wambura mlando, pa urunji wake!

²⁴ Viyo mo lilime la moto litoche mbuwa, mo uteka wakumira utakamiya mu mlipu, mdimu musisi wawo ukavundiyanga, ndi maluŵa ghawo ghakwere kuchanya uli ndi fuvu; pakuti ŵakana dangu la Ambuya ŵa maŵanja, ŵayuyuwa mazu gha Mtuŵa Yo waku Yisraele.

²⁵ Chifukwa cho kukara kwa Ambuya kungukole pa ŵanthu ŵawo, ndipo angutambaruliya janja lawo paku wo ndi anguŵakoso, maphiri ghanguyaghayika; ndipo viŵanda vyawo vyenga nge ndi choto mu miseu mukati. Paku vyose ivi kukara kwawo kuti kwakungunuka cha ndipo janja lake leche kutambaruka.

²⁶ Akayuskanga chiziŵisku ku khamu la kutali ukongwa, akalimbiyanga kayuzi kutuwa ku umari wa charu chapasi; ndipo ehe, mwa ruŵiruŵi, kwambura kuswera likazanga!

²⁷ Palivi wakuvuka, palivi wakuguŵa, palivi wakusiwa chingana nkhugona, lamba wa muchiunu kuti wafwatuka cha, kachikumba ka viyato nako kudumukapo cha;

²⁸ mivwi yawo njakuthwa, mauta ghawo ghose ngakupinda, vitende vya ŵakavalo ŵawo viwoneka uli ndi sangarawe, mikombelo yawo uli ndi kavuruvuru.

²⁹ Kuuruma kwawo kwe nge nkhwa nkharamu, ŵauruma nge ndi nkharamu zampupuka; ŵajuma ndi kuko nyama yawo, ŵaruta nayo, ndipo palivi yo wangapokeska.

³⁰ Ŵakakoromanga paku yo mu zuŵa liya, uli nkhuuruma kwa nyanja. Asani yumoza walereskenge ku charu, awonani, mdima ndi suzgu; ndipo ukweru wafipiskika ndi mitambo yake.