Yesaya 48 - Tonga Bible 1986

Kususkika kwaku Yisraele

¹ Ivwa ichi, wa nyumba yaku Yakobe we, imwe mudanika ndi zina laku Yisraele, ndi imwe mungutuwa mu viunu vyake Yuda, imwe murapa pa zina la Ambuya, ndi kuzomera Chiuta waku Yisraele, kweni mu uneneska pamwenga kwakurunjika cha.

² Pakuti ŵatijidaniya ŵija mu msumba wakupaturika, ndi kujijarika ŵija paku Chiuta waku Yisraele; Ambuya ŵa maŵanja ndilu zina lake.

³ “Vinthu vya kudanga ndingutaula mwaka vingutuwa mo mlomo wangu ndine ndinguviziŵiska; sono kwa mabuchibuchi ndinguvichita ndipo vinguchitika.

⁴ Chifukwa ndiziŵa kuti mwe ŵanonono, khosi linu ndi msipi wa chisulo mphunu yinu nja mkuŵa,

⁵ ndinguvitaula kwinu kutuliya ku mwaka, vyenga vindachitike ndinguvitaula kwaku imwe vinu mungakamba ngoza wangu ndiyu wanguvichita, ngoza wangu wakusema, ‘Ndi ngoza wangu wakwenguwa ndiyo wangulangura.’

⁶ “Mukuvwa, sono onani ivi vyose; kumbi kuti muchitaulenge cha? Kwamba nyengo yino kuya kuurongo nditumuvwiskani vinthu vifya, vinthu vyakubisika vyo mulivi kuviziŵa.

⁷ Vyalengeka sono, kale viŵi cha; mpaka msana wale mulivi kuvivwa, vinu mungakamba, ‘Ehe, ndikuviziŵa.’

⁸ Mulivi kuvwapo, mulivi kuviziŵapo, kutuliya ku mwaka gutu linu lilivi kujurikapo. Pakuti ndinguziŵa kuti mwatinge muchitenge mwakupusika, ndi kuti kutuliya ku kawi mungudanika ŵachigaruka.

⁹ “Chifukwa cha zina langu ndilekezga danga ukari wangu, chifukwa cha rumbu langu, nditiumikiya imwe, kuti ndileke ku kudumuwaniko.

¹⁰ Ehe, ndakusongononi, kweni uli ndi siliva cha; ndamwesani mu ng'anjo ya suzgu.

¹¹ Pa chifukwa chaku ndamweni, chaku ndamweni pe, ndichita ichi, pakuti zina langu lingafipiskika uli? Unkhankhu wangu kuti ndipaskenge ku munyake cha.

¹² “Tegherezga kwangu, Yakobe we, ndi Yisraele, mweniyo ndingudana! Ndine Iyo, ndine wakudanga, ndipo nde wakumariya.

¹³ Janja langu linguchita chiŵanja cha charu chapasi, ndipo janja langu lamarghe lingutandika machanya; ndichighadana, ghanguza ndi kuma pamoza.

¹⁴ “Unjikanani, mose, avwani! Njani mukati mwawo wakutaulapo vinthu ivi? Ambuya atumwanja akafiskanga cho akhumba pa Babiloni, ndipo janja lawo likalimbananga ndi ŵaKaldiya.

¹⁵ Ndine, ndine ndamweni, ndakamba ndi kumudana ndaza nayo, ndipo wakasakatanga mu nthowa yake.

¹⁶ Ndereni kwangu kufupi, avwani ichi; kwamba pa mtendeko ndilivi kukamba ku ubende, kwamba pa nyengo yo chingwamba kuŵako ndenga penipa.” Ndipo sono Ambuya Chiuta wandituma ine ndi Mzimu wake.

¹⁷ Viyo atiti Ambuya, Muwombozi winu, Mtuŵa Yumoza waku Yisraele: “Ndine Ambuya Chiuta wako, mweniyo watikurunguchizga kusakata, mweniyo watikurongozga mu nthowa yeniyo utenere kwendamo.

¹⁸ Inya mphanyi ungutegherezga ku marangu ghangu! Po ndipo chimangu chako phatinge chiŵenge uli ndi msinji ndipo urunji wako uli ndi mayigha gha nyanja;

¹⁹ ŵana ŵako ŵatinge ŵaŵenge nge ndi muchenga, ndipo mphapu yako uli ndi mbuto yake; zina lawo mphanyi kuti lingudumulikako cha pamwenga kuliparang'a paurongo pangu.”

²⁰ Tuwanimo mu Babiloni, thaŵaniko ku Kaldiya, taulani ichi ndi kubongo kwa likondwa, uchimemeze, ichitume chirute ku chigoti cha charu chapasi; unene, “Ambuya apozomoska muŵanda wawo Yakobe!”

²¹ Ŵengavi kuvwa nyota penipo wanguŵarongozga ŵachiporota mu mabozwa; wangupopomeska maji ghakumwa iwo, kutuwa ku jarawe; wanguwaruwa jarawe ndipo maji ghangupopome kubwalo.

²² “Kulivi chimangu,” atiti Ambuya “ku ŵaheni.”