Yesaya 46 - Tonga Bible 1986

Akambiya limu za kupasuka kwa ŵangoza ŵaku Babiloni

¹ Belo wajikama pasi, Nebo wakotama, ŵangoza ŵawo ŵe pa viŵetu ndi ng'ombe; ivi vinthu mupinga vinyekezgeka uli ndi katundu pa nyama zakuvuka.

² Zikotama, ndi kujimiya pamoza, kuti zingataska katundu cha, kweni izo zeneko ziruta mu uŵanda.

³ “Tegherezgani kwangu, mwa nyumba yaku Yakobe, ŵakujapo wose wa nyumba yaku Yisraele, ŵeniwo ŵanyamulika ndi ine kutuwa ku kawi kinu, ŵakunyamulika kutuwa ku chibali;

⁴ chingana ndi mu unkhongwi winu Ndine Iyo, ndi juŵanyivu ndikunyamuweninga. Ndalenga, ndipo ndikanyamuwanga; ndikanyamuwanga ndi ndikataskanga.

⁵ “Nkhwaku yani ko mulinganizgenge ine ndi kundiyaniska, ndi kundesa, kuti tiŵi ŵakuyana?

⁶ Ŵeniwo ŵasakaza golide kutuwa mu chikwama, ndi kupima siliva pa myeso, ŵalembera ŵakusula golide, ndipo iyo wativipanga kuŵa chiuta: sono iwo ŵatuwa pasi ndi kumusopa!

⁷ Ŵatimunyamuliya pa mapheŵa ghawo, ŵatimupinga, ŵatimuŵika pa malo ghake, ŵatuma penipo; kuti ŵaziŵa cha kunderepo, pa malo ghake. Asani munthu watimuliriya, kuti watamuka pamwenga ku mutaska ku suzgu yake cha.

⁸ “Kumbukani ichi ndi ghanaghanani, jikumbuskeni, imwe mwaŵatimbanizi,

⁹ kumbukani vinthu vyakudanga vya mwaka; chifukwa ndine Chiuta, ndipo kulivi so munyake; ndine Chiuta ndipo kulivi nanga njumoza wakukozgana nane,

¹⁰ kutaula vya umari kwamba ku vyaru mtendeko kutuliya ku vyanyengo zamwaka mpaka ku vinthu vyo vindachitike, kunena kuti, ‘Fundu yangu vikamanga, ndipo ndikafiskanga vyose vyo ndakhumba kufiska.’

¹¹ Kudana chiyuni chikari kutuwa kuvuma munthu wa fundu yangu kutuwa ku charu cha kutali. Ndarongoro, ndipo ndikafiskanga; ndanozga kuchichita ndipo ndikachitangadi.

¹² “Tegherezgani kwangu, mwa mitima yinonono, imwe mwe kutali ku chipozomosku:

¹³ Ndituza nacho pafupi chipozomosku changu, kuti che kutali cha, ndipo utaski wangu kuti ukasweranaga cha; ndikaŵikanga utaski mu Zioni; chifukwa chaku Yisraele unkhankhu wangu.”