Yesaya 43 - Tonga Bible 1986

Ambuya ndi mtaski

¹ Kweni sono atiti viyo Ambuya, yo wangukulenga iwe, Yakobe we, yo wangukuumba, Yisraele we: “Ungopanga cha, pakuti ndakuwombo; ndakudana iwe ndi zina, we wangu.

² Uchiporota mu maji ndikaŵanga nawe; pakuporota, mu misinji, kuti yikakubizganinga cha, muchenda mukati mu moto kuti mukafyanga cha, ndipo mulipu kuti ukakurghaninga cha.

³ Pakuti ndine Ambuya Chiuta winu, Mtuŵa Yumoza waku Yisraele, Mtaski winu. Ndipereka Egipiti nge ndi thumba linu, Etiopia ndi Seba mukugulizgana ndi imwe.

⁴ Pakuti mwe ŵakuzirwa mu maso ghangu, ndi ŵatumbiku, ndipo nditumwanjani, ndipereka ŵanthu kuripila paku imwe, ŵanthu mu kugulizgana ndi umoyo winu.

⁵ Mungopanga cha, pakuti nde namwe pamoza; ndikakuziyaninga ndi mphapu yinu kutuwa ku vuma, ndipo kutuwa ku zambwe ndikamuwunjikaninga.

⁶ Ndikakambiyanga nkhonde, ‘Pereka,’ ndi ku malaŵi, ‘Ungakaniliyanga cha;’ wawezge ŵana ŵangu ŵanthurumi kutuwa kutali ndi ŵana ŵangu ŵanthukazi kutuwa kuchigoti cha charu chapasi,

⁷ we yose wakudanika ndi zina langu, mweniyo ndingulenge ku unkhankhu wangu, yo ndinguumba ndi ndinguchita.”

⁸ Uŵatuzge ŵanthu wo mba chiburumutiya, kweni maso ŵe nagho, wo mbamugota, kweni makutu ŵe nagho!

⁹ Mitundu yose yiwungane pamoza, ndipo ŵanthu ŵakumane pamoza. Njani mukati mwawo wangaziŵa kutaula ichi, ndi kutirongo vinthu vya mwaka? Wazi ndi ŵakaboni ŵawo ŵakuŵazomerezga, ŵazichivwa ndi ŵanene, mbuneneska.

¹⁰ “Mwe ŵakaboni ŵangu,” atiti Ambuya, “ndi ŵateŵeti ŵangu wo ndasankha, alinga muziŵe ndi kuvwana nane ndi kuwamo kuti ndine Iyo. Paurongo pangu palivi kuumbika chiuta, chingana nkhuti kukaŵangako munyake so pavuli pangu.

¹¹ Ine, ndine Ambuya ndipo pade paku ine palive mtaski.

¹² Ndingutaula, ndingutaska, ndi kumemeza, pa nyengo yeniyo mwengavi chiuta mlendo mukati mwinu; ndipo imwe mwe ŵakaboni ŵangu”, atiti Ambuya.

¹³ “Ndine Chiuta, ndipo so kwamba sono ndine Iyo; palivi chingana njumoza mweniyo wangaziŵa kutaska ku janja langu; nditata ndipo njani wangakanizga ichi?”

¹⁴ Ambuya atiti viyo, Muwombozi winu, Mtuŵa Yumoza waku Yisraele, “Chifukwa chinu ndikatumanga ku Babiloni ndi kubwanganduliya pasi mphanjizgu zose, ndi chiwawa cha ŵaKaldiya chikasandukanga vitenje.

¹⁵ Ndine Ambuya, Mtuŵa winu Yumoza, Mlengi waku Yisraele, Karonga winu.”

¹⁶ Ambuya atiti viyo, mweniyo watata nthowa mu nyanja, kanthowa mu maji ghakulimba,

¹⁷ mweniyo watuzga gareta ndi kavalo, liŵanja la nkhondo ndi ŵakurwa; ŵagona pasi kuti ŵangayuka cha, ŵamara, ŵazimwa nge nchisunda.

¹⁸ “Rekani kukumbuka vinthu vya kale, chingana nkhughanaghana vinthu vya mwaka.

¹⁹ Ehe, ndichita chinthu chifya; sono chifwatapuka, kuti mutichiteska cha? Ndikachitanga nthowa mu bozwa ndi misinji mu bozwa.

²⁰ Nyama za mudondo zikanditumbikanga, ŵakambwe ndi makungundembo; pakuti ndipaska maji mubozwa, misinji mu charu chachiparamba, kupaska kumwa ku ŵanthu ŵangu ŵakusankhika,

²¹ ŵanthu ŵeniwo ndingwata chifukwa chaku ndamweni kuti ŵataule rumbu langu.

²² “Kweni kuti ungudana paku ine cha Yakobe we; inya wavuka nane, Yisraele we!

²³ Mulivi kundiziya ndi mberere za visopo vya kocha, pamwenga kundipaska thumbiku ndi mipasku yinu. Ndilivi kukupingizgani ndi mipasku, pamwenga kumuvuskani ndi vyachema.

²⁴ Mulivi kundiguliya mijuŵa ya zinde ndi ndarama, pamwenga kundigutiska ndi mafuta gha mipasku yinu. Kweni mwandizitiska ndi mauheni ghinu, ndipo mwandivuska ndi mphurupuru zinu.

²⁵ “Ine, Ndine Iyo mweniyo wasisita mautimbanizi ghinu chifukwa cha zina langu, ndipo kuti ndikakumbukanga mauheni ghinu cha.

²⁶ Andikumbukeni, tiyeni tisuskane pamoza; kambani mulando winu kuti musanirike wakurunjika.

²⁷ Auskemwe ŵakudanga ŵangulakwa, ndipo ŵamwenda pakati ŵinu ŵangundinangiya.

²⁸ Chifukwa chenichi ndikuŵanangiska ŵara ŵa malo ghakupaturika, ndingumupereka Yakobe ku wanangi ku ukuru ndi Yisraele kukunyozeka.