Yesaya 41 - Tonga Bible 1986

Ambuya ndiyo Chiuta Yisraele wagomezge Ambuya

¹ Tegherezgani chisisi kwangu, mwa vyaru vya malikumba, ŵanthu ŵawerezgiyemo mthazi zawo ŵandere pafupi, ndipo ŵarongoro, tiyeni tose tindere pafupi ku cheruzgu.

² Njani wanguyuska munyake kutuwa ku vuma mweniyo kupunda kukumana nayo pa mchapu wose? Wapereka mitundu paurongo pake, viyo kuti waphwata akaronga ndi rundi lake; wati ŵachita nge ndi fuvu ndi lipanga lake, uli ndi mbuwa yakuputiskika ndi uta wake.

³ Wati ŵandondoloska ndi walutiriyapo umamphavi, mu nthowa zo marundi ghake ghalivi kwendamo.

⁴ Njani yo wafiska ndi kuchita ichi, kudana migonezi kutuliya pa mtendeko? Ine, Ambuya, wakudanga yo, ndi waumari, ndine pe.

⁵ Vyaru vya malikumba vyawona ndipo vitopa, vigoti vya charu chapasi vinjenjeme; vyendere pafupi, vyaza.

⁶ We yose watovya ŵakuzengezgana nayo, ndipo watiti ku mwanamunyake, “Khwima mtima!”

⁷ Wakusula wakhwimiska wakwenga golide, yo wasililiska ndi nyundo ndi yo wadina mwa wa livumbu, wakamba gha kusongono, “Chanozga,” ndipo ŵatichikhozga ndi mizumali kuti chireke kusukunika.

Pempho laku ŵamkoli

⁸ Kweni iwe, Yisraele, muŵanda wangu, Yakobe, yo ndatondo, mphapu yaku Abrahamu, bwezi langu;

⁹ iwe ndingukuto ku vigoti vya charu chapasi kukudana ku visongo vyake vya kunthazi limu, po ndinguti kwaku iwe, “Ndiwe muŵanda wangu, ndakusankha ndipo ndilivi kukutaya kuwa”;

¹⁰ ungopanga cha, pakuti ndenawe pamoza, ungatenthemanga cha pakuti ndine Chiuta wako; ndikakukhomeskan'ga, ndikakovyanga, ndikakusunganga ndi janja langu, lakurghiya la upundi.

¹¹ Ehe, wose wo ŵatikuyukiya ŵakalengeskekanga ndi kutimbanizgika, wo ŵalimbana nawe kuti ŵakaŵanga kanthu cha, ŵakamaranga.

¹² Ukaŵapenjanga ŵakubayana nawe, kweni kuti ukaŵasaniyanga cha; wakuchita nkhondo ndi iwe, wakaŵanga nge nkhanthu cha.

¹³ Pakuti ine, Ambuya Chiuta wako, ndiko janja lako lakurghiya; ndine ndititi kwaku iwe, “Ungopanga cha, ndikakovyanga.”

¹⁴ Ungopanga cha, owe fusi Yakobe, imwe mwa ŵanthu ŵaku Yisraele! Ndikovyeninge, atiti Ambuya; muwobozi winu ndi Mtuŵa Yumoza yo waku Yisraele.

¹⁵ Ehe, ndikakuchitanga kuŵa mbuli ufya, wakuthwa ndi wakuŵa ndi minyu; iwe ukabulanga mapiri ndi kughaswa, ndipo mitunthu ukayichitanga kuŵa mwere.

¹⁶ Ukayipepetanga ndipo mphepo yikayitolenga kutali, ndipo lirondo likayiparghang'anga. Ndipo iwe ukakondwanga mu Ambuya; mu Mtuŵa Yumoza yo waku Yisraele, ukatumbwanga.

¹⁷ Penipo ŵasauchi ndi ŵasokwa ŵapenja maji, ndipo palivi, ndipo lilime lawo lomilwa ndi nyota, ine Ambuya ndiŵamukenge, ine Chiuta waku Yisraele kuti ndikaŵajowonga cha.

¹⁸ Ndikabanuwanga misinji pa mitunthu yiyumu, ndi visima mukati mu madambo. Ndikasanduskanga bozwa lo chisima cha maji, ndi charu chiyumu maji ghakubwibwituka.

¹⁹ Ndikaŵikangamo mu bozwa miti ya masidara, akashia, ndi miritili ndi olive; ndikaŵikangamo mu bozwa mu lombwa, mkuyu, ndi nyaphini pamoza;

²⁰ alinga kuti ŵanthu ŵawone ndi kuziŵa, ŵaghanaghane ndi kuwamo pamoza kuti janja la Ambuya lachita ichi, Mtuŵa Yumoza yo waku Yisraele wachita ichi.

²¹ Rongoni mulandu winu, atiti Ambuya; tuzgani vifukwa vinu, watiti Karonga waku Yakobe.

²² Wavituzge, ndipo watinene cho chikaŵangako. Tineniyeni vinthu vya kale, kuti vine, kuti tivighanaghane, kuti tiziŵe ko vituliya, pamwenga titauliyeni vinthu vyo vikazanga.

²³ Tineniyeni vyo vikazanga pavuli pasono, kuti tiziŵe kuti mwe ŵachiuta; chitani umampha pamwenga chitani urwani alinga kuti tope ndi kutenthemeskeka.

²⁴ Ehe, kuti mwe kanthu cha, ndi nchitu yinu nayo njawakawaka; waukazuzi ndi mweniyo wasankha imwe.

²⁵ Ndinguyuska yumoza ku nkhonde, ndipo waza, kutuliya ko lituwa lumwi, ndipo wakadananga pa zina langu; wakendanga pa ŵakutuduliya uli mpha thuli, uli ndimo muumbi wadiniya dongo.

²⁶ Kumbi njani wanguziŵiska ichi kutuliya pa chiyambo, kuti tiziŵe, ndi paurongo pa nyengo yo alinga kuti tinene, “Warunjika”? Pengavi nanga njumoza wanguchiziŵiska, nanga njumoza wangumemeza nanga njumoza wanguvwa mazu ghinu.

²⁷ Ndadanga kuchimemeza ku Zioni, ndipo ndipereka kwaku Yerusalemu wakumemeza uthanga wamampha.

²⁸ Kweni ndichilereska palivi yumoza, mukati mwaku yaŵa palivi nduna yimoza mweniyo ndichifumba, watamuka.

²⁹ Ehe, wose mbatesi; nchitu zawo zawaka ŵangoza ŵawo ŵakwenguwa ndi mphepo yiyumu.