Yesaya 38 - Tonga Bible 1986

Kutama kwaku Hezekiya ndi kuchira kwake

¹ Mu mazuŵa ghenigha Hezekiya wangutama ndipo wenga pafupi kufwa. Ndipo Yesaya mchimi mwana waku Amozi wanguza kwaku iyo, wanguti, “Viyo atiti Ambuya: Nozga umampha nyumba yako; pakuti ukafwanga, kuti ukachiranga cha.”

² Sono Hezekiya wangung'anamukiya chisku chake ku chimati, wanguromba ku Ambuya,

³ wanguti, “Kumbukani sono Ambuya, nditukuŵeyereni, mwenimo ine ndayende paurongo pinu mu ukongorekwa ndi mtima wose, ndipo ndachita cho nchamampha mu maso ghinu.” Hezekiya wanguliya kwakuŵaŵa.

⁴ Sono mazu gha Ambuya ghanguza kwaku Yesaya,

⁵ “Ruta, ukanene kwaku Hezekiya, Viyo atiti Ambuya, Chiuta waku Davidi ausu: Ndavwa rombu lako, ndawona masozi ghako; ehe, ndikasazgiyangako ku umoyo wako virimika chumi ndi vinkhonde.

⁶ Ndikakutaskanga iwe ndi muzi uwu ku janja la karonga wa Asiriya, ndi kuvikiriya muzi uwu.

⁷ “Ichi nchisimikizgu kwaku iwe chakutuliya ku Ambuya, kuti Ambuya akachitanga chinthu cho apangana:

⁸ Ehe, ndikachitanga chiduzi lichivulumutiya lumwi pa chakwesiyapo chaku Ahazi kuwere vuli pamakwerero chumi.” Viyo lumwi linguwere vuli pachakupimiyapo makwerero chumi ghenigho chingutuwako.

Sumu ya kuwonga

⁹ Chakulemba chaku Hezekiya karonga waku Yuda, pavuli wati watama ndi kuchira ku utenda wake:

¹⁰ Ndingukamba, mukati mu kuŵala kwa mwezi kwa mazuŵa ghangu ndikarutanga: ndalangulikiya kuya ku malikmo gha Muunda mu virimika vyangu vyakujako.

¹¹ Ndinguti, kuti ndiwonenge Ambuya cha mu charu cha ŵamoyo; kuti ndikalereskanga so pa munthu cha mukati mu ŵakuja mu charu.

¹² Uja wangu wazuwika watuzgikako kwangu, uli ndi hema la mliska; uli ndi muwomba saru ndazinga umoyo wangu; watindidumuwapo pa chakuwombe; kwamba ku msana kuya ku usiku imwe mutinditole ku chigoti;

¹³ ndiliriya chovyo mpaka mlenji; uli ndi nkharamu wafyo viwanga vyangu; kwamba ku musana kuya ku usiku mutinditole ku chigoti.

¹⁴ Uli ndi kaŵeruŵeru pamwenga tofu ndibangula, nditamantha uli ndi nkhunda. Maso ghangu ghavuka ndi kulereska, kuchanya. Ambuya mwe ndisuzgika; muŵe imwe akundivikiriya!

¹⁵ Kweni ndingakambanje? Pakuti akamba kwaku ine, ndipo iwo ŵeneko achichita. Tulo twangu tose twambininika, chifukwa cha kuŵaŵa kwa mzimu wangu.

¹⁶ Ambuya, ŵanthu ŵaja ŵamoyo ndi vinthu ivi, ndipo mwaku vyenivi vyose mwe umoyo wa mzimu wangu. Owe, ndiwezgiyeni ku kututa ndi ndichiteni kuŵa wamoyo!

¹⁷ Ehe nchifukwa chaku ndamweni ndinguŵa ndi urwirwi ukuru; kweni imwe mwawezgako umoyo wangu ku zenje la pharghaniko, pakuti mwapong'a uheni wangu wose kuvuli ku msana winu.

¹⁸ Pakuti Muunda kuti uziŵa kumuwongani cha, nyifwa kuti yiziŵa kumurumbani cha; wo ŵasikiya ku muunda kuti ŵangagomekezga uneneska winu cha.

¹⁹ Wamoyo, wamoyo, ndiyo wawonga imwe uli ndimo ndichitiya ine msana wale; wiske waziŵiska ku ŵana uneneska winu.

²⁰ Ambuya akanditaskanga, ndipo tikambanga pa vyamalisinga mazuŵa ghose gha umoyo widu, pa nyumba ya Ambuya.

²¹ Sono Yesaya wanguti, “Ŵato chiŵande cha nkhuyu, ŵanyaske pa chakutupa, alinga wachire.”

²² Hezekiya wangukamba so kuti, “Chisimikizgu nchine chakurongo kuti ndikakweriyanga ku nyumba ya Ambuya?”